ਡਰੇਅਟਨ ਵੈਲੀ, ਅਲਬਰਟਾ, 19 ਅਗਸਤ (ਪੋਸਟ ਬਿਊਰੋ) : ਅਲਬਰਟਾ ਐਨਰਜੀ ਰੈਗੂਲੇਟਰ ਦਾ ਕਹਿਣਾ ਹੈ ਕਿ ਪਾਈਪਲਾਈਨ ਲੀਕ ਹੋਣ ਕਾਰਨ 40,000 ਲੀਟਰ ਕੱਚਾ ਤੇਲ ਖਾੜੀ ਵਿੱਚ ਵਗ ਗਿਆ।
ਰੈਗੂਲੇਟਰ ਵੱਲੋਂ ਆਪਣੀ ਵੈੱਬਸਾਈਟ ਉੱਤੇ ਇਹ ਆਖਿਆ ਗਿਆ ਹੈ ਕਿ ਇਹ ਘਟਨਾ ਵੀਰਵਾਰ ਨੂੰ ਡਰੇਅਟਨ ਵੈਲੀ, ਅਲਬਰਟਾ ਤੋਂ 14 ਕਿਲੋਮੀਟਰ ਦੱਖਣ ਵੱਲ ਬੌਨਟੈਰਾ ਐਨਰਜੀ ਕਾਰਪੋਰੇਸ਼ਨ ਦੀ ਲਾਈਨ ਉੱਤੇ ਵਾਪਰੀ। ਇਹ ਵੀ ਆਖਿਆ ਗਿਆ ਹੈ ਕਿ ਇਸ ਲੀਕੇਜ ਦਾ ਪਤਾ ਲੱਗਣ ਤੋਂ ਬਾਅਦ ਲਾਈਨ ਬੰਦ ਕਰ ਦਿੱਤੀ ਗਈ। ਏਈਆਰ ਨੇ ਆਖਿਆ ਕਿ ਵਾਈਲਡਲਾਈਫ ਨੂੰ ਕਿਸੇ ਤਰ੍ਹਾਂ ਦਾ ਖਤਰਾ ਨਹੀਂ ਦੱਸਿਆ ਜਾ ਰਿਹਾ ਹੈ।
ਕੈਲਗਰੀ ਸਥਿਤ ਬੌਨਟੈਰਾ ਨੇ ਇੱਕ ਨਿਊਜ਼ ਰਲੀਜ਼ ਵਿੱਚ ਆਖਿਆ ਕਿ ਉਨ੍ਹਾਂ ਵੱਲੋਂ ਮਾਮਲੇ ਦੀ ਜਾਂਚ ਸਵੇਰੇ 8:00 ਵਜੇ ਸੁ਼ਰੂ ਕਰ ਦਿੱਤੀ ਗਈ ਸੀ। ਵੀਰਵਾਰ ਨੂੰ ਉਨ੍ਹਾਂ ਨੂੰ ਰਾਤੀਂ 1:00 ਵਜੇ ਵਾਸ਼ਆਊਟ ਕ੍ਰੀਕ ਵਿੱਚ ਲੀਕੇਜ ਦਾ ਪਤਾ ਲੱਗਿਆ। ਉਨ੍ਹਾਂ ਦੱਸਿਆ ਕਿ ਤੇਲ ਨੂੰ ਵੈਕਿਊਮ ਦੀ ਮਦਦ ਨਾਲ ਹਟਾਇਆ ਜਾ ਰਿਹਾ ਹੈ। ਸਥਾਨਕ ਲੋਕਾਂ ਤੇ ਜੰਗਲੀ ਜੀਵਾਂ ਨੂੰ ਵੀ ਕੋਈ ਖਤਰਾ ਨਾ ਹੋਵੇ ਇਸ ਦਾ ਵੀ ਪੂਰਾ ਖਿਆਲ ਰੱਖਿਆ ਜਾ ਰਿਹਾ ਹੈ।
ਵਾਸ਼ਆਊਟ ਖਾੜੀ ਉੱਤਰੀ ਸਸਕੈਚਵਨ ਨਦੀ ਵਿੱਚ ਮਿਲਦੀ ਹੈ ਤੇ ਇਹੋ ਨਦੀ ਐਡਮੰਟਨ ਵਿੱਚ ਪਾਣੀ ਦਾ ਮੁੱਖ ਸਰੋਤ ਹੈ। ਬੌਨਟੈਰਾ ਨੇ ਆਖਿਆ ਕਿ ਜਿਸ ਥਾਂ ਉੱਤੇ ਖਾੜੀ ਤੇ ਨਦੀ ਮਿਲਦੇ ਹਨ ਉੱਥੇ ਇਸ ਤੇਲ ਦੀ ਸਫਾਈ ਦੇ ਜਿ਼ਆਦਾ ਪ੍ਰਬੰਧ ਕੀਤੇ ਗਏ ਹਨ। ਕੰਪਨੀ ਦਾ ਕਹਿਣਾ ਹੈ ਕਿ ਇਹ ਸਾਫ ਸਫਾਈ ਅਗਲੇ ਤਿੰਨ ਹਫਤਿਆਂ ਤੱਕ ਚੱਲਣ ਦੀ ਸੰਭਾਵਨਾ ਹੈ।