ਟੋਰਾਂਟੋ, 19 ਅਗਸਤ (ਪੋਸਟ ਬਿਊਰੋ) : ਓਨਟਾਰੀਓ ਅਗਲੇ ਸਾਲ ਆਪਣੀਆਂ ਵਿਵਾਦਗ੍ਰਸਤ ਪਬਲਿਕ ਹੈਲਥ ਤੇ ਚਾਈਲਡ ਕੇਅਰ ਲਈ ਮਿਉਂਸਪਲ ਫੰਡਿੰਗ ਕਟੌਤੀਆਂ ਨਾਲ ਅੱਗੇ ਵਧੇਗਾ।
ਪ੍ਰੀਮੀਅਰ ਡੱਗ ਫੋਰਡ ਵੱਲੋਂ ਅੱਜ ਓਟਵਾ ਵਿੱਚ ਮਿਉਂਸਪਲ ਆਗੂਆਂ ਦੇ ਹੋਣ ਵਾਲੇ ਇੱਕਠ ਵਿੱਚ ਇਸ ਦਾ ਐਲਾਨ ਕੀਤੇ ਜਾਣ ਦੀ ਸੰਭਾਵਨਾ ਹੈ। ਫੋਰਡ ਦੇ ਆਫਿਸ ਦਾ ਕਹਿਣਾ ਹੈ ਕਿ ਪ੍ਰੀਮੀਅਰ ਇਹ ਐਲਾਨ ਕਰਨਗੇ ਕਿ ਫੰਡਿੰਗ ਵਿੱਚ ਇਹ ਤਬਦੀਲੀਆਂ ਪਹਿਲੀ ਜਨਵਰੀ, 2020 ਤੋਂ ਹੋਣਗੀਆਂ। ਜਿ਼ਕਰਯੋਗ ਹੈ ਕਿ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਸਰਕਾਰ ਨੇ ਇਸ ਸਾਲ ਵੀ ਇਨ੍ਹਾਂ ਕਟੌਤੀਆਂ ਨੂੰ ਲਾਗੂ ਕਰਨ ਦਾ ਫੈਸਲਾ ਕੀਤਾ ਸੀ ਪਰ ਉਨ੍ਹਾਂ ਨੂੰ ਮਜਬੂਰਨ ਆਪਣਾ ਇਹ ਫੈਸਲਾ ਰੱਦ ਕਰਨਾ ਪਿਆ ਕਿਉਂਕਿ ਮਿਉਂਸਪਲ ਆਗੂਆਂ ਵੱਲੋਂ ਇਹ ਸਿ਼ਕਾਇਤ ਕੀਤੀ ਗਈ ਸੀ ਕਿ ਉਹ ਆਪਣੇ ਸਾਲਾਨਾ ਬਜਟ ਪਹਿਲਾਂ ਹੀ ਪਾਸ ਕਰ ਚੁੱਕੇ ਹਨ ਤੇ ਇਹ ਕਟੌਤੀਆਂ ਨਹੀਂ ਕਰ ਸਕਦੇ।
ਨਵੀਂ ਯੋਜਨਾ ਤਹਿਤ ਟੋਰਾਂਟੋ ਸਮੇਤ ਸਾਰੀਆਂ ਮਿਉਂਸਪੈਲਿਟੀਜ਼ ਨੂੰ ਪਬਲਿਕ ਹੈਲਥ ਕੇਅਰ ਕੌਸਟ ਦੀ 30 ਫੀ ਸਦੀ ਕਟੌਤੀ ਕਰਨੀ ਹੋਵੇਗੀ। ਪਰ ਸ਼ੁਰੂਆਤੀ ਯੋਜਨਾ ਵਿੱਚ ਟੋਰਾਂਟੋ ਨੂੰ 50 ਫੀ ਸਦੀ ਕਟੌਤੀਆਂ ਕਰਨੀਆਂ ਪੈਣੀਆਂ ਸਨ। ਪਹਿਲੀ ਜਨਵਰੀ, 2020 ਤੋਂ ਹੀ ਮਿਉਂਸਪੈਲਿਟੀਜ਼ ਨੂੰ ਨਵੀਆਂ ਚਾਈਲਡ ਕੇਅਰ ਸਪੇਸਿਜ਼ ਲਈ ਲਾਗਤ ਦੀ 20 ਫੀ ਸਦੀ ਅਦਾਇਗੀ ਕਰਨੀ ਹੋਵੇਗੀ। ਇਸ ਤੋਂ ਪਹਿਲਾਂ ਪ੍ਰੋਵਿੰਸ ਇਨ੍ਹਾਂ ਸਪੇਸਿਜ਼ ਲਈ ਪੂਰੀ ਤਰ੍ਹਾਂ ਫੰਡ ਮੁਹੱਈਆ ਕਰਵਾਉਂਦੀ ਸੀ।
ਇਸੇ ਓਟਵਾ ਇੱਕਠ ਵਿੱਚ ਫੋਰਡ ਵੱਲੋਂ ਲੈਂਡ ਐਂਬੂਲੈਂਸ ਫੰਡਿੰਗ ਵਿੱਚ ਕੀਤੀਆਂ ਜਾਣ ਵਾਲੀਆਂ ਤਬਦੀਲੀਆਂ ਦਾ ਐਲਾਨ ਕੀਤੇ ਜਾਣ ਦੀ ਵੀ ਸੰਭਾਵਨਾ ਹੈ। ਟੋਰੀ ਸਰਕਾਰ ਦਾ ਕਹਿਣਾ ਹੈ ਕਿ ਫੰਡਾਂ ਵਿੱਚ ਇਹ ਕਟੌਤੀਆਂ ਬਹੁਤ ਜ਼ਰੂਰੀ ਹਨ ਤਾਂ ਕਿ ਪ੍ਰੋਵਿੰਸ ਸਿਰ ਚੜ੍ਹੇ 11.7 ਬਿਲੀਅਨ ਡਾਲਰ ਦੇ ਘਾਟੇ ਨੂੰ ਖ਼ਤਮ ਕੀਤਾ ਜਾ ਸਕੇ।