ਸਿੰਗਾਪੁਰ, 14 ਅਕਤੂਬਰ (ਪੋਸਟ ਬਿਊਰੋ)- ਸਿੰਗਾਪੁਰ ਦੀ ਉਚ ਅਦਾਲਤ ਨੇ ਆਪਣੀ ਵਿਦਿਆਰਥਣ ਨਾਲ ਕਈ ਵਾਰ ਛੇੜਛਾੜ ਕਰਨ ਤੇ ਧਮਕੀਆਂ ਦੇਣ ਵਾਲੇ ਭਾਰਤੀ ਯੋਗ ਅਧਿਆਪਕ ਦੀ ਸਜ਼ਾ ਵਧਾ ਦਿੱਤੀ ਹੈ। ਪਿਛਲੇ ਸਾਲ ਅਪ੍ਰੈਲ ਵਿੱਚ ਰਾਕੇਸ਼ ਕੁਮਾਰ ਪ੍ਰਸਾਦ ਨੂੰ ਇਸ ਕੇਸ ਵਿੱਚ ਨੌਂ ਮਹੀਨੇ ਦੀ ਸਜ਼ਾ ਹੋਈ ਸੀ। ਉਸ ਨੇ ਸਜ਼ਾ ਖਿਲਾਫ ਹਾਈ ਕੋਰਟ 'ਚ ਅਪੀਲ ਕੀਤੀ ਸੀ। ਅਪੀਲ ਰੱਦ ਕਰਦੇ ਹੋਏ ਅਦਾਲਤ ਨੇ ਉਸ ਦੀ ਸਜ਼ਾ ਵਧਾ ਕੇ ਇੱਕ ਸਾਲ ਕਰ ਦਿੱਤੀ ਹੈ। ਇਸ ਦੇ ਨਾਲ ਹੀ ਉਸ ਨੂੰ ਤਿੰਨੇ ਕੌੜੇ ਮਾਰਨ ਦੀ ਸਜ਼ਾ ਵੀ ਸੁਣਾਈ ਗਈ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਰਾਕੇਸ਼ ਨੇ 26 ਅਪ੍ਰੈਲ 2015 ਨੂੰ ਰੀਅਲ ਯੋਗਾ ਸਟੂਡੀਓ 'ਚ ਆਪਣੀ ਵਿਦਿਆਰਥਣ ਨਾਲ ਛੇੜਛਾੜ ਕੀਤੀ ਅਤੇ ਉਸ ਦੀ ਗਰਦਨ ਵੀ ਦੱਬੀ ਸੀ। ਪੀੜਤ ਨੇ ਅਗਲੇ ਹੀ ਦਿਨ ਇਸ ਦੀ ਸ਼ਿਕਾਇਤ ਪੁਲਸ ਨੂੰ ਕੀਤੀ। ਜਾਂਚ ਕਰਨ 'ਤੇ ਹੇਠਲੀ ਅਦਾਲਤ 'ਚ ਰਾਕੇਸ਼ ਨੂੰ ਦੋਸ਼ੀ ਪਾਇਆ ਗਿਆ। ਛੇੜਛਾੜ ਕਰਨ ਲਈ ਉਸ ਨੂੰ ਨੌਂ ਮਹੀਨੇ ਦੀ ਸਜ਼ਾ ਤੇ ਗਰਦਨ ਫੜਨ ਕਰ ਕੇ ਉਸ ਨੂੰ ਇੱਕ ਹਜ਼ਾਰ ਸਿੰਗਾਪੁਰ ਡਾਲਰ ਜੁਰਮਾਨਾ ਹੋਇਆ ਸੀ। ਰਾਕੇਸ਼ ਨੇ ਸਜ਼ਾ ਦੇ ਖਿਲਾਫ ਅਪੀਲ ਕੀਤੀ ਤਾਂ ਉਸ ਦੇ ਵਕੀਲ ਦਾ ਕਹਿਣਾ ਸੀ ਕਿ ਘਟਨਾ ਦੀਆਂ ਤਸਵੀਰਾਂ 'ਚ ਸਾਫ ਦਿੱਸਦਾ ਹੈ ਕਿ ਰਾਕੇਸ਼ ਵਿਦਿਆਰਥਣ ਨਾਲ ਉਸ ਤਰ੍ਹਾਂ ਛੇੜਛਾੜ ਨਹੀਂ ਕਰ ਰਿਹਾ, ਜਿੱਦਾਂ ਉਸ ਨੇ ਦੱਸਿਆ ਹੈ। ਹਾਈ ਕੋਰਟ ਦੇ ਜੱਜ ਨੇ ਇਹ ਕਹਿ ਕੇ ਦਲੀਲ ਰੱਦ ਕਰ ਦਿੱਤੀ ਕਿ ਤਸਵੀਰਾਂ ਸਾਫ ਨਹੀਂ। ਇਸ ਵਿੱਚ ਰਾਕੇਸ਼ ਦੇ ਹੱਕ ਦੀ ਕੋਈ ਗੱਲ ਸਾਹਮਣੇ ਨਹੀਂ ਆਈ। ਸਜ਼ਾ ਵਧਾ ਕੇ ਜੱਜ ਨੇ ਕਿਹਾ ਕਿ ਰਾਕੇਸ਼ ਨੇ ਭਰੋਸਾ ਤੋੜਿਆ ਹੈ। ਪੀੜਤ ਦੇ ਰੋਕਣ ਪਿੱਛੋਂ ਵੀ ਉਸ ਨੇ ਆਪਣੀਆਂ ਹਰਕਤਾਂ ਨਹੀਂ ਛੱਡੀਆਂ। ਉਸ ਨੇ ਪੀੜਤ ਨੂੰ ਧਮਕਾਇਆ ਵੀ, ਇਸ ਲਈ ਉਸ ਨੂੰ ਕੌੜੇ ਮਾਰਨੇ ਜਾਣੇ ਚਾਹੀਦੇ ਹਨ।