ਗੋਰਖਪੁਰ, 18 ਅਗਸਤ (ਪੋਸਟ ਬਿਊਰੋ)- ਗੋਰਖਪੁਰ ਦੇ ਖੋਰਾਬਾਰ ਥਾਣਾ ਖੇਤਰ ਵਿੱਚ ਅਜੀਬ ਕੇਸ ਸਾਹਮਣੇ ਆਇਆ ਹੈ। ਪੰਚਾਇਤ ਨੇ 71 ਭੇਡਾਂ ਬਦਲੇ ਇੱਕ ਔਰਤ ਨੂੰ ਉਸ ਦੇ ਪ੍ਰੇਮੀ ਦੇ ਹਵਾਲੇ ਕਰ ਦਿੱਤਾ ਹੈ। ਪੰਚਾਇਤ ਦੇ ਇਸ ਫੈਸਲੇ ਨੂੰ ਪ੍ਰੇਮੀ ਦੇ ਪਿਤਾ ਰਾਮਨਰੇਸ਼ ਨੇ ਮੰਨਣ ਤੋਂ ਇਨਕਾਰ ਕਰ ਦਿੱਤਾ ਹੈ ਅਤੇ ਖੋਰਾਬਾਰ ਥਾਣੇ ਵਿੱਚ ਸ਼ਿਕਾਇਤ ਦੇ ਕੇ ਭੇਡਾਂ ਵਾਪਸ ਦਿਵਾਉਣ ਦੀ ਮੰਗ ਕੀਤੀ ਹੈ।
ਇਹ ਮਾਮਲਾ ਹੱਲ ਹੋਣ ਦੀ ਥਾਂ ਤਿੰਨ ਥਾਣਿਆਂ ਵਿੱਚ ਘੁੰਮਦਾ ਰਿਹਾ। ਖੋਰਾਬਾਰ ਪੁਲਸ ਨੇ ਪਿਪਰਾਈਚ ਖੇਤਰ ਦਾ ਕੇਸ ਦੱਸ ਕੇ ਉਸ ਥਾਣੇ ਭੇਜ ਦਿੱਤਾ। ਪਿਪਰਾਈਚ ਥਾਣੇ ਦੇ ਮੁਖੀ ਨੇ ਵੀ ਰਾਮਨਰੇਸ਼ ਦੀ ਗੱਲ ਨਹੀਂ ਸੁਣੀ ਅਤੇ ਪੰਚਾਇਤ ਬੇਲੀਪਾਰ ਖੇਤਰ ਦੇ ਗ੍ਰਾਮ ਚਾਰਪਾਨੀ ਵਿੱਚ ਹੋਣਾ ਦੱਸ ਕੇ ਓਥੇ ਭੇਜ ਦਿੱਤਾ। ਆਖਰ ਵਿੱਚ ਪਿਪਰਾਈਚ ਖੇਤਰ ਦੇ ਗ੍ਰਾਮ ਬੈਲੋ ਦੇ ਰਾਮਨਰੇਸ਼ ਨੇ ਕੱਲ੍ਹ ਸਮੂਹਿਕ ਸਮੱਸਿਆ ਦਿਵਸ ਮੌਕੇ ਐਸ ਐਸ ਪੀ ਤੋਂ ਇਨਸਾਫ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਪੰਚਾਇਤ ਦਾ ਫੈਸਲਾ ਸਾਨੂੰ ਮਨਜ਼ੂਰ ਨਹੀਂ। ਉਨ੍ਹਾਂ ਨੇ ਦੋਸ਼ ਲਾਇਆ ਕਿ ਪੰਚਾਂ ਨੇ ਇੱਕ ਵਿਅਕਤੀ ਦਾ ਵਸਿਆ ਘਰ ਉਜਾੜ ਦਿੱਤਾ ਤੇ ਬਿਨਾਂ ਤਲਾਕ ਕਰਵਾਏ ਵਿਆਹੁਤਾ ਮਹਿਲਾ ਨੂੰ ਮੇਰੇ ਬੇਟੇ ਦੇ ਗਲੇ ਬੰਨ੍ਹਣ ਦਾ ਫੈਸਲਾ ਸੁਣਾ ਦਿੱਤਾ।
ਪੰਚਾਇਤ ਦੇ ਫੈਸਲੇ ਦੇ ਬਾਅਦ ਮਹਿਲਾ ਆਪਣੇ ਪਤੀ ਨਾਲ ਰਹਿਣ ਨੂੰ ਤਿਆਰ ਹੈ। ਉਸ ਦਾ ਕਹਿਣਾ ਹੈ ਕਿ ਕਿਸੇ ਨੇ ਉਸ ਨਾਲ ਜ਼ਬਰਦਸਤੀ ਕੀਤੀ ਤਾਂ ਖੁਦਕੁਸ਼ੀ ਕਰ ਲਵੇਗੀ। ਉਸ ਦੇ ਵਿਆਹ ਨੂੰ ਪੰਜ ਸਾਲ ਹੋ ਗਏ ਹਨ, ਪਰ ਮਾਂ ਬਣਨ ਦਾ ਸੁੱਖ ਪ੍ਰਾਪਤ ਨਹੀਂ ਹੋਇਆ। ਉਸ ਦੇ ਪ੍ਰੇਮੀ ਦਾ ਕਹਿਣਾ ਹੈ ਕਿ ਪਿਤਾ ਦੀ ਜਾਇਦਾਦ ਵਿੱਚ ਪੁੱਤਰ ਦਾ ਵੀ ਹੱਕ ਹੁੰਦਾ ਹੈ। ਅਸੀਂ 142 ਵਿੱਚੋਂ 50 ਫੀਸਦੀ ਭੇਡਾਂ ਨੂੰ ਆਪਣਾ ਮੰਨਿਆ ਤੇ ਪੰਚਾਇਤ ਦੇ ਫੈਸਲੇ ਅਨੁਸਾਰ 71 ਭੇਡਾਂ ਮਹਿਲਾ ਦੇ ਪਤੀ ਨੂੰ ਦੇ ਦਿੱਤੀਆਂ। ਪਿਤਾ ਰਾਮਨਰੇਸ਼ ਵਿਰੋਧੀਆਂ ਦੇ ਉਕਸਾਉਣ ਉਤੇ ਸਾਡੇ ਖਿਲਾਫ ਖੜ੍ਹੇ ਹੋ ਗਏ ਹਨ।