ਹਿਸਾਰ, 11 ਅਕਤੂਬਰ, (ਪੋਸਟ ਬਿਊਰੋ)- ਹਰਿਆਣਾ ਦੇ ਸਤਲੋਕ ਆਸ਼ਰਮ ਦੇ ਸੰਚਾਲਕ ਰਾਮਪਾਲ, ਉਸ ਦੇ ਪੁੱਤਰ ਬਿਜੇਂਦਰ ਉਰਫ਼ ਵਿਰੇਂਦਰ ਅਤੇ ਭਣੇਵੇਂ ਜੋਗੇਂਦਰ ਉਰਫ਼ ਬਿੱਲੂ ਸਮੇਤ 29 ਵਿਅਕਤੀਆਂ ਨੂੰ ਅਦਾਲਤ ਨੇ ਹੱਤਿਆ, ਬੰਦੀ ਬਣਾਉਣ ਤੇ ਸਾਜ਼ਿਸ਼ ਰਚਣ ਦੇ ਦੋ ਕੇਸਾਂ ਵਿੱਚ ਦੋਸ਼ੀ ਕਰਾਰ ਦਿੱਤਾ ਹੈ। ਦੋਸ਼ੀਆਂ ਵਿਚ ਇਸਤਰੀ ਵਿੰਗ ਦੀ ਸਾਬਕਾ ਮੁਖੀ ਬਬੀਤਾ, ਉਸ ਦੀ ਭੈਣ ਪੂਨਮ, ਮਾਸੀ ਸਵਿੱਤਰੀ ਵੀ ਸ਼ਾਮਲ ਹਨ। ਸਜ਼ਾ ਦਾ ਫ਼ੈਸਲਾ 16 ਤੇ 17 ਅਕਤੂਬਰ ਨੂੰ ਸੁਣਾਇਆ ਜਾਵੇਗਾ। ਤਿੰਨ ਦੋਸ਼ੀਆਂ ਨੂੰ ਤੱਕ ਅਜੇ ਫੜਿਆ ਨਹੀਂ ਜਾ ਸਕਿਆ। ਇਨ੍ਹਾਂ ਵਿਚ ਰਾਮਪਾਲ ਦੀ ਧੀ ਨੀਲਮ, ਰਿਸ਼ਤੇਦਾਰ ਰਾਜਬਾਲਾ ਅਤੇ ਸੰਜੇ ਫ਼ੌਜੀ ਸ਼ਾਮਲ ਦੱਸੇ ਜਾਂਦੇ ਹਨ।
ਵਰਨਣ ਯੋਗ ਹੈ ਕਿ ਸਾਲ 2014 ਵਿੱਚ ਰਾਮਪਾਲ ਨੂੰ ਪੰਜਾਬ ਹਰਿਆਣਾ ਹਾਈ ਕੋਰਟ ਨੇ ਤਲਬ ਕੀਤਾ ਸੀ, ਪਰ ਉਹ ਪੇਸ਼ ਨਹੀਂ ਸੀ ਹੋਇਆ। ਜਦੋਂ ਪੁਲਿਸ ਉਸ ਨੂੰ ਫੜਨ ਲਈ 18 ਨਵੰਬਰ 2014 ਨੂੰ ਬਰਵਾਲਾ ਦੇ ਸਤਲੋਕ ਆਸ਼ਰਮ ਦੇ ਬਾਹਰ ਗਈ ਤਾਂ ਰਾਮਪਾਲ ਦੇ ਸਮਰਥਕਾਂ ਤੇ ਪੁਲਿਸ ਵਾਲਿਆਂ ਦਾ ਟਕਰਾਅ ਹੋ ਗਿਆ। ਓਦੋਂ ਰਾਮਪਾਲ ਨੇ ਪੁਲਿਸ ਦੀ ਕਾਰਵਾਈ ਤੋਂ ਬਚਣ ਲਈ ਔਰਤ ਪੈਰੋਕਾਰਾਂ ਤੇ ਬੱਚਿਆਂ ਨੂੰ ਢਾਲ਼ ਬਣਾ ਕੇ ਆਸ਼ਰਮ ਦੇ ਗੇਟ ਉੱਤੇ ਬਿਠਾ ਦਿੱਤਾ ਅਤੇ ਆਸ਼ਰਮ ਖ਼ਾਲੀ ਹੋਣ ਉੱਤੇ ਪੁਲਿਸ ਨੂੰ ਪੰਜ ਔਰਤਾਂ ਤੇ ਇਕ ਬੱਚੇ ਦੀ ਲਾਸ਼ ਮਿਲੀ ਸੀ। ਪੁਲਿਸ ਨੇ 19 ਨਵੰਬਰ 2014 ਨੂੰ ਹੱਤਿਆ ਦੇ ਦੋ ਕੇਸ ਦਰਜ ਕੀਤੇ ਸਨ। ਅਦਾਲਤ `ਚ ਸ਼ਿਕਾਇਤ ਕਰਤਾ ਗਾਜ਼ੀਆਬਾਦ ਦਾ ਵਾਸੀ ਸੁਰੇਸ਼ ਤੇ ਦਿੱਲੀ ਦਾ ਵਾਸੀ ਸ਼ਿਵਪਾਲ ਆਪਣੇ ਬਿਆਨ ਤੋਂ ਮੁੱਕਰ ਗਏ ਸਨ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਛੇ ਮੌਤਾਂ ਰਾਮਪਾਲ ਕਾਰਨ ਨਹੀਂ, ਸਗੋਂ ਪੁਲਿਸ ਵੱਲੋਂ ਵਰਤੀ ਗਈ ਫੋਰਸ ਦੇ ਕਾਰਨ ਹੋਈਆਂ ਹਨ।