ਪਾਉਂਟਾ ਸਾਹਿਬ, 14 ਅਗਸਤ (ਪੋਸਟ ਬਿਊਰੋ)- ਇਸ ਨਗਰ ਦੇ ਬਦਰੀਪੁਰ ਚੌਕ ਨੇੜੇ ਇੱਕ ਕੰਪਨੀ ਵਿੱਚ ਚਿੱਟੇ ਦਿਨ ਲੁੱਟ ਹੋ ਗਈ ਹੈ। ਵਾਰਡ ਨੰਬਰ ਵਿੱਚ ਇੱਕ ਕਿਰਾਏ ਦੇ ਮਕਾਨ ਤੋਂ ਚੱਲਦੀ ਸੇਟਿਨ ਕ੍ਰੇਡਿਟ ਕੇਅਰ ਨੈੱਟਵਰਕ ਲਿਮਟਿਡ ਕੰਪਨੀ 'ਚੋਂ ਚੋਰਾਂ ਨੇ ਤਿਜੌਰੀ ਨੂੰ ਕੱਟ ਕੇ ਨੌਂ ਲੱਖ ਅੱਠ ਹਜ਼ਾਰ 32 ਰੁਪਏ ਨਕਦੀ 'ਤੇ ਹੱਥ ਸਾਫ ਕੀਤਾ ਹੈ। ਚੋਰੀ ਦੀ ਇਹ ਵਾਰਦਾਤ ਓਦੋਂ ਕੀਤੀ ਗਈ, ਜਦੋਂ ਕੰਪਨੀ ਦੇ ਕਰਮਚਾਰੀ ਫੀਲਡ ਵਿੱਚ ਗਏ ਹੋਏ ਸਨ।
ਮਿਲੀ ਜਾਣਕਾਰੀ ਮੁਤਾਬਕ ਕੰਪਨੀ ਮੈਨੇਜਰ ਦੀਪਕ ਕੁਮਾਰ, ਮੈਨੇਜਰ ਕੁਲਦੀਪ ਕੁਮਾਰ, ਨਿਤਿਨ ਕੁਮਾਰ ਤੇ ਗੋਪੀ ਚੰਦ ਬੀਤੇ ਸੋਮਵਾਰ ਸਵੇਰੇ ਸਾਢੇ ਸੱਤ ਵਜੇ ਕੰਮ ਲਈ ਫੀਲਡ ਵਿੱਚ ਗਏ ਸਨ। ਸਾਰੇ ਕਰਮਚਾਰੀ ਸ਼ਾਮ ਸਾਢੇ ਅੱਠ ਵਜੇ ਦੇ ਕਰੀਬ ਜਦ ਦਫਤਰ ਗਏ ਤਾਂ ਉਨ੍ਹਾਂ ਨੇ ਦਫਤਰ ਦੇ ਦਰਵਾਜ਼ੇ ਖੁੱਲ੍ਹੇ ਪਾਏ। ਅੰਦਰ ਜਾ ਕੇ ਤਿਜੌਰੀ ਦੇਖੀ ਤਾਂ ਉਹ ਕਟਰ ਮਸ਼ੀਨ ਨਾਲ ਕੱਟੀ ਹੋਈ ਮਿਲੀ। ਇਸ ਵਿੱਚ ਚੋਰ ਨੌਂ ਲੱਖ 8 ਹਜ਼ਾਰ 21 ਰੁਪਏ ਨਕਦੀ ਨੂੰ ਚੋਰੀ ਕਰ ਕੇ ਲੈ ਗਏ। ਕੰਪਨੀ ਦੇ ਮੁਲਾਜ਼ਮਾਂ ਨੇ ਪੁਲਸ ਨੂੰ ਇਸ ਦੀ ਸੂਚਨਾ ਦਿੱਤੀ। ਕੰਪਨੀ ਦੇ ਮੈਨੇਜਰ ਦੀਪਕ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਨੇ ਸਫਾਈ ਕਰਨ ਵਾਲੀ ਮਹਿਲਾ ਤੋਂ ਬੀਤੇ ਸੋਮਵਾਰ ਨੂੰ ਆਉਣ ਬਾਰੇ ਪੁੱਛਿਆ ਤਾਂ ਉਸ ਨੇ ਦੱਸਿਆ ਕਿ ਉਹ ਸਾਢੇ 11 ਵਜੇ ਦਫਤਰ ਆਈ ਸੀ। ਇਥੇ ਤਿੰਨ ਵਿਅਕਤੀ ਦਫਤਰ ਦੇ ਨਾਲ ਦੇ ਕਮਰੇ ਵਿੱਚ ਸੁੱਤੇ ਸਨ ਅਤੇ ਇੱਕ ਵਿਅਕਤੀ ਦੂਸਰੇ ਕਮਰੇ ਵਿੱਚ ਸੁੱਤਾ ਹੋਣ 'ਤੇ ਮਹਿਲਾ ਨੇ ਦਫਤਰ ਦੇ ਕਰਮਚਾਰੀ ਸਮਝ ਕੇ 15 ਮਿੰਟ ਵਿੱਚ ਸਫਾਈ ਕਰ ਕੇ ਵਾਪਸ ਚਲੀ ਗਈ।
ਵਰਨਣ ਯੋਗ ਹੈ ਕਿ ਸੇਟਿਨ ਕ੍ਰੇਡਿਟਕੇਅਰ ਨੈੱਟਵਰਕ ਲਿਮਟਿਡ ਕੰਪਨੀ ਜ਼ਿਲ੍ਹਾ ਸਿਰਮੌਰ ਦੇ ਪਾਉਂਟਾ ਸਾਹਿਬ ਵਿੱਚ ਚਾਰ ਸਾਲ ਤੋਂ ਕੰਮ ਕਰ ਰਹੀ ਹੈ। ਉਕਤ ਕੰਪਨੀ ਬੇਰੋਜ਼ਗਾਰ ਮਹਿਲਾਵਾਂ ਦੇ ਗਰੁੱਪ ਨੂੰ ਸਵੈ ਰੋਜ਼ਗਾਰ ਸ਼ੁਰੂ ਕਰਨ ਦੇ ਲਈ ਕਰਜ਼ਾ ਮੁਹੱਈਆ ਕਰਵਾਉਂਦੀ ਹੈ। ਐੱਸ ਐੱਚ ਓ ਸੰਜੇ ਸ਼ਰਮਾ ਨੇ ਦੱਸਿਆ ਕਿ ਉਨ੍ਹਾਂ ਦੇ ਕੋਲ ਚੋਰੀ ਦੀ ਸ਼ਿਕਾਇਤ ਆਈ ਹੈ। ਪੁਲਸ ਨੇ ਮਾਮਲਾ ਦਰਜ ਕਰ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।