ਪਟਨਾ, 14 ਅਗਸਤ (ਪੋਸਟ ਬਿਊਰੋ)- ਬਿਹਾਰ ਵਿਖੇ ਹੋਏ ਸਮੂਹਿਕ ਬਲਾਤਕਾਰ ਦੀ ਘਟਨਾ ਨੇ ਦਿੱਲੀ ਦੇ ਨਿਰਭੈਆ ਕਾਂਡ ਦੀ ਯਾਦ ਨੂੰ ਤਾਜ਼ਾ ਕਰ ਦਿੱਤਾ ਹੈ। ਉਕਤ ਕਾਂਡ ਦਸੰਬਰ 2012 ਵਿੱਚ ਵਾਪਰਿਆ ਸੀ।
ਨਿਰਭੈਆ ਕਾਂਡ ਵਾਂਗ ਹੀ ਬਿਹਾਰ ਦੇ ਸਾਰਨ ਜ਼ਿਲ੍ਹੇ ਦੀ ਰਹਿਣ ਵਾਲੀ ਇੱਕ ਕੁੜੀ ਨਾਲ ਸਮੂਹਿਕ ਬਲਾਤਕਾਰ ਦੀ ਘਟਨਾ ਵਾਪਰੀ। ਇਸ ਦਾ ਸਭ ਤੋਂ ਵੱਧ ਦੁਖਦਾਈ ਪੱਖ ਇਹ ਹੈ ਕਿ ਡਾਕਟਰਾਂ ਨੇ ਪੀੜਤ ਕੁੜੀ ਦਾ ਇਲਾਜ ਕਰਨ ਵਿੱਚ ਤਿੰਨ ਘੰਟੇ ਦੀ ਦੇਰੀ ਕਰ ਦਿੱਤੀ ਕਿਉਂਕਿ ਡਾਕਟਰਾਂ ਦਾ ਕਹਿਣਾ ਸੀ ਕਿ ਇਹ ਪੁਲਸ ਕੇਸ ਹੈ ਤੇ ਪਰਵਾਰ ਦੇ ਮੈਂਬਰਾਂ ਨੂੰ ਪਹਿਲਾਂ ਪੁਲਸ ਕੋਲ ਕੇਸ ਦਰਜ ਕਰਵਾਉਣਾ ਚਾਹੀਦਾ ਹੈ। ਪੁਲਸ ਅਤੇ ਪਿੰਡ ਵਾਲਿਆਂ ਕੋਲੋਂ ਮਿਲੀਆਂ ਰਿਪੋਰਟਾਂ ਮੁਤਾਬਕ ਕੁੜੀ ਨੂੰ ਉਸ ਦੇ ਜਾਣ ਪਛਾਣ ਵਾਲੇ ਗੁੰਮਰਾਹ ਕਰ ਕੇ ਲੈ ਗਏ ਅਤੇ ਸਮੂਹਿਕ ਬਲਾਤਕਾਰ ਦੀ ਘਟਨਾ ਹੋ ਗਈ। ਦੋਸ਼ੀਆਂ ਨੇ ਕੁੜੀ ਦੇ ਪ੍ਰਾਈਵੇਟ ਪਾਰਟ ਵਿੱਚ ਲੋਹੇ ਦੀ ਰਾਡ ਪਾ ਦਿੱਤੀ। ਅਜਿਹਾ ਹੀ ਦਿੱਲੀ ਵਿੱਚ ਨਿਰਭੈਆ ਕਾਂਡ ਦੌਰਾਨ ਹੋਇਆ ਸੀ। ਇਸ ਵਾਰ ਦੋਸ਼ੀਆਂ ਦਾ ਇਰਾਦਾ ਕੁੜੀ ਦੇ ਕਤਲ ਦਾ ਸੀ। ਕਿਸੇ ਤਰ੍ਹਾਂ ਕੁੜੀ ਬਚ ਕੇ ਆਪਣੇ ਘਰ ਪਹੁੰਚੀ ਤੇ ਬੇਹੋਸ਼ ਹੋ ਗਈ। ਪਰਵਾਰ ਦੇ ਮੈਂਬਰ ਉਸ ਨੂੰ ਇੱਕ ਨੇੜਲੇ ਹਸਪਤਾਲ ਲੈ ਗਏ। ਹੋਸ਼ ਆਉਣ ਉਤੇ ਕੁੜੀ ਨੇ ਆਪਣੇ ਪਰਵਾਰਕ ਮੈਂਬਰਾਂ ਨੂੰ ਆਪਣੇ ਨਾਲ ਵਾਪਰੀ ਘਟਨਾ ਬਾਰੇ ਦੱਸਿਆ। ਕੁੜੀ ਦੀ ਹਾਲਤ ਚਿੰਤਾਜਨਕ ਦੇਖਦਿਆਂ ਡਾਕਟਰਾਂ ਨੇ ਉਸ ਨੂੰ ਪਟਨਾ ਦੇ ਮੈਡੀਕਲ ਕਾਲਜ ਤੇ ਹਸਪਤਾਲ ਭੇਜ ਦਿੱਤਾ। ਪਰਵਾਰ ਦਾ ਦੋਸ਼ ਹੈ ਕਿ ਇਸ ਹਸਪਤਾਲ ਦੇ ਡਾਕਟਰਾਂ ਨੇ ਕੁੜੀ ਦਾ ਇਲਾਜ ਤਿੰਨ ਘੰਟੇ ਤੱਕ ਨਹੀਂ ਕੀਤਾ। ਉਹ ਪਹਿਲਾਂ ਦਰਜ ਕੀਤੇ ਕੇਸ ਦੀ ਕਾਪੀ ਦੇਖਣੀ ਚਾਹੰੁਦੇ ਸਨ, ਪਰ ਸਥਾਨਕ ਮੀਡੀਆ ਦੇ ਹਸਪਤਾਲ ਪਹੁੰਚਣ 'ਤੇ ਡਾਕਟਰਾਂ ਨੇ ਇਲਾਜ ਸ਼ੁਰੂ ਕਰ ਦਿੱਤਾ। ਪੁਲਸ ਨੇ ਇਸ ਕਸੇ ਦੇ ਦੋਸ਼ੀਆਂ ਨੂੰ ਫੜ ਲਿਆ ਹੈ। ਤੀਜਾ ਅਜੇ ਫਰਾਰ ਹੈ। ਬਿਹਾਰ ਦੀ ਸਿਆਸਤ 'ਚ ਇਹ ਮੁੱਦਾ ਨਿਰਭੈਆ ਕਾਂਡ ਵਾਂਗ ਭਖ ਗਿਆ ਹੈ।