ਚੰਡੀਗੜ੍ਹ, 14 ਅਗਸਤ (ਪੋਸਟ ਬਿਊਰੋ)- ਮੋਰਿੰਡਾ ਕੋਆਪ੍ਰੇਟਿਵ ਸ਼ੂਗਰ ਮਿੱਲ ਵਿੱਚ ਤਿੰਨ ਸਾਲ ਪਹਿਲਾਂ ਖੰਡ ਦੀ ਸੇਲ ਵਿੱਚ ਹੋਏ ਘਪਲੇ ਕਾਰਨ ਕਰੋੜਾਂ ਰੁਪਏ ਦੇ ਨੁਕਸਾਨ ਦੀ ਰਿਕਵਰੀ ਅਤੇ ਦੋਸ਼ੀ ਅਧਿਕਾਰੀਆਂ ਦੇ ਵਿਰੁੱਧ ਕਾਰਵਾਈ ਦਾ ਮਾਮਲਾ ਇਕ ਵਾਰ ਫਿਰ ਉਠ ਖੜਾ ਹੋਇਆ ਹੈ। ਇਸ ਮਾਮਲੇ ਦੀ ਕਈ ਵਾਰ ਹੋਈ ਜਾਂਚ ਵਿੱਚ ਆਪਸੀ ਵਿਰੋਧ ਵਾਲੀਆਂ ਰਿਪੋਰਟਾਂ ਦੇ ਕਾਰਨ ਅਜੇ ਤੱਕ ਨਾ ਨੁਕਸਾਨ ਦੀ ਰਿਕਵਰੀ ਹੋ ਸਕੀ ਹੈ ਅਤੇ ਨਾ ਹੀ ਨਿਯਮਾਂ ਅਤੇ ਨਿਰਦੇਸ਼ਾਂ ਦੇ ਅਨੁਸਾਰ ਕਸੂਰਵਾਰ ਮਿੱਲ ਅਧਿਕਾਰੀਆਂ ਦੇ ਵਿਰੁੱਧ ਕਾਰਵਾਈ ਹੋਈ ਹੈ।
ਕੋਆਪਰੇਟਿਵ ਵਿਭਾਗ ਦੇ ਵਿੱਤ ਕਮਿਸ਼ਨਰ ਨੂੰ ਭੇਜੀ ਸ਼ਿਕਾਇਤ ਵਿੱਚ ਫਤਹਿਗੜ੍ਹ ਸਾਹਿਬ ਜ਼ਿਲੇ ਦੇ ਇੰਡੀਅਨ ਫਾਰਮਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ ਭੁਪਿੰਦਰ ਸਿੰਘ ਨਡਿਆਲੀ ਨੇ ਮਾਮਲਾ ਉਠਾਉਂਦੇ ਹੋਏ ਘਪਲੇ ਵਿੱਚ ਹੋਏ ਨੁਕਸਾਨ ਦੀ ਰਿਕਵਰੀ ਕਰਨ ਤੇ ਦੋਸ਼ੀ ਅਧਿਕਾਰੀਆਂ ਵਿਰੁੱਧ ਨਿਯਮ ਅਨੁਸਾਰ ਸਖਤ ਕਾਰਵਾਈ ਦੇ ਨਾਲ ਦੋਸ਼ੀ ਅਧਿਕਾਰੀਆਂ ਨੂੰ ਦੂਸਰੀ ਜਗ੍ਹਾ ਤਬਦੀਲ ਕਰਨ ਦੀ ਮੰਗ ਕੀਤੀ ਹੈ। ਇਸ ਸਿ਼ਕਾਇਤ ਦੀ ਇਕ ਕਾਪੀ ਮੁੱਖ ਮੰਤਰੀ ਦਫਤਰ ਨੂੰ ਭੇਜੀ ਗਈ ਹੈ। ਨਡਿਆਲੀ ਨੇ ਦੱਸਿਆ ਕਿ ਸ਼ੂਗਰਫੈਡ ਵੱਲੋਂ ਘਪਲੇ ਦੀ ਜਾਂਚ ਦੀ ਨਵੰਬਰ 2016 ਦੀ ਰਿਪੋਰਟ ਵਿੱਚ ਨੁਕਸਾਨ ਦੀ ਰਕਮ 297.60 ਲੱਖ ਮੰਨ ਕੇ ਇਸ ਦੀ ਰਿਕਵਰੀ ਮਿੱਲ ਦੇ ਛੇ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਤੋਂ ਕੀਤੇ ਜਾਣ ਦੀ ਸਿਫਾਰਸ਼ ਕੀਤੀ ਗਈ ਸੀ। ਇਸ ਰਿਪੋਰਟ ਉਤੇ ਸ਼ੂਗਰਫੈਡ ਮੈਨੇਜਮੈਂਟ ਨੇ ਭੋਗਪੁਰ ਸ਼ੂਗਰ ਮਿੱਲ ਦੇ ਡਾਇਰੈਕਟਰ ਬੀ ਐਸ ਗਿੱਲ ਤੋਂ ਰਿਪੋਰਟ ਮੰਗੀ ਤਾਂ ਨੁਕਸਾਨ ਦੀ ਰਕਮ 38.46 ਲੱਖ ਰੁਪਏ ਮੰਨੀ ਗਈ। ਇਸ ਸਾਲ ਸਤੰਬਰ ਵਿੱਚ ਗਿੱਲ ਅਤੇ ਸ਼ੂਗਰਫੈਡ ਦੇ ਏ ਏ ਓ ਨੇ ਉਸ ਘਪਲੇਬਾਜ਼ੀ 'ਤੇ ਭੇਜੀ ਸਾਂਝੀ ਰਿਪੋਰਟ ਵਿੱਚ ਨੁਕਸਾਨ ਦੀ ਰਕਮ 1,47,81,311 ਰੁਪਏ ਮਿਥੀ ਅਤੇ ਰਿਕਵਰੀ ਅੱਠ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਤੋਂ ਕਰਨ ਦੀ ਸਿਫਾਰਸ਼ ਕੀਤੀ ਹੈ। ਸ਼ਿਕਾਇਤ ਦੇ ਮੁਤਾਬਕ ਇਸ ਰਿਪੋਰਟ ਮਗਰੋਂ ਰਜਿਸਟਰਾਰ ਕੋਆਪ੍ਰੇਟਿਵ ਸੁਸਾਇਟੀਜ਼ ਨੇ ਮਾਰਚ 2019 ਵਿੱਚ ਨਵੀਂ ਜਾਂਚ ਰਿਪੋਰਟ ਜਾਰੀ ਕੀਤੀ, ਜੋ ਅਸਲ ਵਿੱਚ ਉਸ ਸਾਂਝੀ ਜਾਂਚ ਰਿਪੋਰਟ ਦੇ ਆਧਾਰ 'ਤੇ ਬਣਾਈ ਗਈ ਸੀ ਅਤੇ ਤਿੰਨ ਮੈਂਬਰੀ ਪਹਿਲੀ ਜਾਂਚ ਕਮੇਟੀ ਦੀ ਨਵੰਬਰ 2016 ਦੀ ਰਿਪੋਰਟ ਨੂੰ ਨਜ਼ਰ ਅੰਦਾਜ਼ ਕੀਤਾ ਗਿਆ ਸੀ। ਇਸ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ ਉਕਤ ਘਪਲੇਬਾਜ਼ੀ ਵਿੱਚ ਜਾਂਚ ਰਿਪੋਰਟਾਂ ਦੇ ਦੋਸ਼ੀ ਨਿਕਲੇ ਡਾਇਰੈਕਟਰ ਕੰਵਲਜੀਤ ਸਿੰਘ, ਜਿਨ੍ਹਾਂ ਨੂੰ ਪਹਿਲਾਂ ਨਵਾਂ ਸ਼ਹਿਰ ਸ਼ੂਗਰ ਮਿੱਲ ਵਿੱਚ ਬਦਲਿਆ ਗਿਆ ਸੀ, ਨੂੰ ਵਾਪਸ ਮੋਰਿੰਡ ਸ਼ੂਗਰ ਮਿੱਲ ਵਿੱਚ ਟਰਾਂਸਫਰ ਕਰ ਦਿੱਤਾ ਗਿਆ ਹੈ, ਜਿਥੇ ਇਸ ਨੇ ਘਪਲਾ ਕੀਤਾ ਸੀ ਅਤੇ ਰਿਪੋਰਟਾਂ ਵਿੱਚ ਦੋਸ਼ੀ ਪਾਏ ਗਏ ਏ ਏ ਓ ਹਰਭਜਨ ਸਿੰਘ ਨੂੰ ਉਨ੍ਹਾਂ ਦੀ ਸੇਵਾ ਮੁਕਤੀ ਦੇ ਬਾਅਦ ਫਿਰ ਤੋਂ ਨੌਕਰੀ ਉੱਤੇ ਰੱਖ ਲਿਆ ਹੈ।