ਅਹਿਮਦਾਬਾਦ, 13 ਅਗਸਤ (ਪੋਸਟ ਬਿਊਰੋ)- ਭਾਰਤ ਦਾ ਮੂਨ ਮਿਸ਼ਨ ਚੰਦਰਯਾਨ-2 ਇਸ ਮਹੀਨੇ ਦੀ 20 ਤਰੀਕ ਨੂੰ ਚੰਦਰਮਾ ਦੇ ਪੰਧ ਵਿੱਚ ਦਾਖਲ ਹੋ ਜਾਵੇਗਾ। ਉਸ ਤੋਂ ਬਾਅਦ 31 ਅਗਸਤ ਤੱਕ ਚੰਦਰਮਾ ਦੇ ਪੰਧ 'ਚ ਪਰਿਕਰਮਾ ਕਰਦਾ ਰਹੇਗਾ। ਫਿਰ ਚੰਦਰਮਾ ਦੇ ਦੱਖਣੀ ਧਰੁਵ ਵੱਲ ਵਧੇਗਾ ਅਤੇ ਸੱਤ ਸਤੰਬਰ ਨੂੰ ਚੰਦਰਯਾਨ-2 ਚੰਦਰਮਾ ਦੇ ਦੱਖਣੀ ਧਰੁਵ 'ਤੇ ਉਤਰੇਗਾ। ਹਾਲੇ ਤੱਕ ਚੰਦਰਮਾ ਦੇ ਇਸ ਹਿੱਸੇ 'ਚ ਕੋਈ ਉਪਗ੍ਰਹਿ ਨਹੀਂ ਉਤਰਿਆ।
ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਦੇ ਚੇਅਰਮੈਨ ਕੇ ਸਿਵਾਨ ਨੇ ਕੱਲ੍ਹ ਇਸ ਬਾਰੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਚੰਦਰਯਾਨ-2 ਉਪਗ੍ਰਹਿ ਦੋ ਦਿਨ ਬਾਅਦ ਧਰਤੀ ਦੇ ਪੰਧ ਤੋਂ ਨਿਕਲ ਕੇ ਚੰਦਰਮਾ ਦੇ ਪੰਧ ਵੱਲ ਵਧੇਗਾ। ਧਰਤੀ ਦੇ ਪੰਧ ਤੋਂ ਚੰਦਰਮਾ ਦੇ ਪੰਧ ਵਿਚਕਾਰ ਦੇ ਗਲਿਆਰੇ ਦੀ ਯਾਤਰਾ ਲਗਭਗ ਸੱਤ ਦਿਨਾਂ ਦੀ ਹੋਵੇਗੀ। ਡਾ.ਸਿਵਾਨ ਭਾਰਤੀ ਪੁਲਾੜ ਪ੍ਰੋਗਰਾਮ ਦੇ ਮੋਢੀ ਮੰਨੇ ਜਾਂਦੇ ਡਾ. ਵਿਕਰਮ ਸਾਰਾਭਾਈ ਦੇ ਜਨਮ ਸ਼ਤਾਬਦੀ ਸਮਾਰੋਹ 'ਚ ਹਿੱਸਾ ਲੈਣ ਆਏ ਸਨ। ਡਾ. ਵਿਕਰਮ ਸਾਰਾਭਾਈ ਦੇ ਨਾਂ 'ਤੇ ਹੀ ਚੰਦਰਯਾਨ-2 ਦੇ ਲੈਂਡਰ ਏਅਰਕ੍ਰਾਫਟ ਦਾ ਨਾਂ ਵਿਕਰਮ ਰੱਖਿਆ ਗਿਆ ਹੈ।
ਚੰਦਰਯਾਨ-2 ਦਾ ਵਜ਼ਨ ਲਗਭਗ 3.8 ਟਨ ਹੈ। ਇਸ ਦੇ ਤਿੰਨ ਹਿੱਸੇ ਆਰਬਿਟਰ, ਲੈਂਡਰ ਤੇ ਰੋਵਰ ਹਨ। ਇਸ ਦੀ ਲਾਂਚਿੰਗ 22 ਜੁਲਾਈ ਨੂੰ ਆਂਧਰਾ ਪ੍ਰਦੇਸ਼ ਦੇ ਸ੍ਰੀਹਰੀਕੋਟਾ 'ਚ ਡਾ. ਸਤੀਸ਼ ਧਵਨ ਪੁਲਾੜ ਪਲੇਟਫਾਰਮ 'ਚ ਹੋਈ ਸੀ। ਸਿਵਾਨ ਨੇ ਦੱਸਿਆ ਕਿ ਲਾਂਚ ਤੋਂ ਬਾਅਦ ਚੰਦਰਯਾਨ-2 ਦਾ ਧਰਤੀ ਦਾ ਪੰਧ ਪੰਜ ਵਾਰ ਬਦਲਿਆ ਹੈ। ਉਪਗ੍ਰਹਿ ਇਸ ਸਮੇਂ ਧਰਤੀ ਦੀ ਪਰਿਕਰਮਾ ਕਰ ਰਿਹਾ ਹੈ ਅਤੇ 20 ਅਗਸਤ ਨੂੰ ਚੰਦਰਮਾ ਦੇ ਪੰਧ 'ਚ ਪ੍ਰਵੇਸ਼ ਕਰੇਗਾ।' ਉਨ੍ਹਾਂ ਦੱਸਿਆ ਕਿ ਧਰਤੀ ਦੇ ਪੰਧ 'ਚੋਂ ਨਿਕਲਣ ਪਿੱਛੋਂ ਚੰਦਰਮਾ ਦੇ ਪੰਧ 'ਚ ਦਾਖਲ ਹੋਵੇਗਾ। ਇਸ ਨਾਲ 20 ਅਗਸਤ ਤੱਕ ਉਪਗ੍ਰਹਿ ਨੂੰ ਚੰਦਰਮਾ ਦੇ ਪੰਧ ਤੱਕ ਪਹੁੰਚਾਇਆ ਜਾਵੇਗਾ। ਚੰਦਰਮਾ ਦੇ ਪੰਧ 'ਚ ਪਹੁੰਚਣ ਤੋਂ ਬਾਅਦ ਇਕ ਵਾਰ ਫਿਰ ਚੰਦਰਯਾਨ ਦੇ ਪੰਧ 'ਚ ਬਦਲਾਅ ਦੀ ਪ੍ਰਕਿਰਿਆ ਸ਼ੁਰੂ ਹੋਵੇਗੀ, ਜਿਸ ਤੋਂ ਬਾਅਦ ਉਹ ਸੱਤ ਸਤੰਬਰ ਨੂੰ ਆਪਣੀ ਮੰਜ਼ਿਲ ਤੱਕ ਪਹੁੰਚੇਗਾ।