ਜਲੰਧਰ, 13 ਅਗਸਤ (ਪੋਸਟ ਬਿਊਰੋ)- ਜ਼ਿਲ੍ਹਾ ਕੰਜਿਊਮਰ ਫੋਰਮ ਨੇ ਗਲਤ ਢੰਗ ਨਾਲ ਇੰਸ਼ੋਰੈਂਸ ਕਲੇਮ ਰੱਦ ਕਰਨ ਦੇ ਕੇਸ ਵਿੱਚ ਬੀਮਾ ਕੰਪਨੀ ਨੂੰ ਇਲਾਜ ਦੇ ਖਰਚੇ ਦੇ ਨਾਲ 22 ਹਜ਼ਾਰ ਹਰਜਾਨਾ ਤੇ ਕੇਸ ਦਾ ਖਰਚਾ ਦੇਣ ਲਈ ਹੁਕਮ ਦਿੱਤੇ ਹਨ। ਇਹ ਮਾਮਲਾ ਰੇਲਿਗੇਅਰ ਹੈਲਥ ਇੰਸ਼ੋਰੈਂਸ ਕੰਪਨੀ ਦੇ ਖਿਲਾਫ ਸੀ। ਉਨ੍ਹਾਂ ਨੇ ਜਿਸ ਪੁਰਾਣੀ ਬਿਮਾਰੀ ਦੀ ਗੱਲ ਕਹਿ ਕੇ ਕਲੇਮ ਰੱਦ ਕੀਤਾ ਕਿ ਸ਼ਿਕਾਇਤ ਕਰਤਾ ਨੇ ਉਸ ਦਾ ਇਲਾਜ ਹੀ ਨਹੀਂ ਕਰਾਇਆ ਸੀ।
ਚੰਦਰਭੂਸ਼ਣ ਅਗਰਵਾਲ ਵਾਸੀ ਚਰਨਜੀਤਪੁਰਾ ਨੇ ਫੋਰਮ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਉਨ੍ਹਾਂ ਨੂੰ ਪੂਨਮ ਕੋਚਰ ਦਾ ਫੋਨ ਆਇਆ ਕਿ ਉਹ ਰੇਲਿਗੇਅਰ ਹੈਲਥ ਇੰਸ਼ੋਰੈਂਸ ਕੰਪਨੀ ਦੇ ਜਲੰਧਰ ਦਫਤਰ ਤੋਂ ਬੋਲ ਰਹੀ ਹੈ ਅਤੇ ਕੰਪਨੀ ਨੇ ਪੂਰੇ ਪਰਵਾਰ ਲਈ ਸਿਹਤ ਬੀਮਾ ਯੋਜਨਾ ਲਾਂਚ ਕੀਤੀ ਹੈ। ਜੇ ਕਿਸੇ ਮੈਂਬਰ ਨੂੰ ਕੋਈ ਬਿਮਾਰੀ ਹੋ ਜਾਵੇ ਤਾਂ ਇਹ ਯੋਜਨਾ ਉਨ੍ਹਾਂ ਦੇ ਇਲਾਜ ਤੇ ਦਵਾਈਆਂ ਦਾ ਪੂਰਾ ਖਰਚਾ ਉਠਾਏਗੀ। ਇਸ ਦੇ ਲਈ ਬਹੁਤ ਘੱਟ ਪ੍ਰੀਮੀਅਮ ਦੇਣਾ ਹੋਵੇਗਾ। ਉਸ ਵਕਤ ਸ਼ਿਕਾਇਤ ਕਰਤਾ ਨੇ ਕਿਹਾ ਕਿ ਉਨ੍ਹਾਂ ਦਾ ਪਰਵਾਰ ਪਹਿਲਾਂ ਨੈਸ਼ਨਲ ਇੰਸ਼ੋਰੈਂਸ ਕੰਪਨੀ ਦੀ ਸਕੀਮ ਦਾ ਬੀਮਾ ਕਰਾ ਚੁੱਕਾ ਹੈ। ਪੂਨਮ ਕੋਚਰ ਨੇ ਉਨ੍ਹਾਂ 'ਤੇ ਦਾਬਅ ਪਾਉਣਾ ਸ਼ੁਰੂ ਕੀਤਾ ਕਿ ਉਹ ਉਸ ਪਾਲਿਸੀ ਨੂੰ ਉਨ੍ਹਾਂ ਦੀ ਕੰਪਨੀ ਵਿੱਚ ਬਦਲਵਾ ਲੈਣ। ਉਨ੍ਹਾਂ ਦਾ 28,467 ਦੇ ਪ੍ਰੀਮੀਅਮ ਉੱਤੇ 15 ਲੱਖ ਦਾ ਬੀਮਾ ਕੀਤਾ ਗਿਆ ਅਤੇ ਕਿਹਾ ਗਿਆ ਕਿ ਇਸ ਵਿੱਚ ਉਨ੍ਹਾਂ ਦੀ ਕੰਪਨੀ ਪਹਿਲਾਂ ਤੋਂ ਚਲੀ ਆ ਰਹੀ ਬਿਮਾਰੀ ਨੂੰ ਕਵਰ ਕਰੇਗੀ। ਇਸ ਦੇ ਬਾਅਦ ਉਨ੍ਹਾਂ ਨੇ ਪਾਲਿਸੀ ਲੈ ਲਈ। ਅਗਸਤ 2017 ਵਿੱਚ ਉਨ੍ਹਾਂ ਦੀ ਸਰਜਰੀ ਹੋਈ ਤੇ ਬੱਤਰਾ ਹਸਪਤਾਲ ਤੋਂ ਡਿਸਚਾਰਜ ਹੋਣ ਪਿੱਛੋਂ ਉਨ੍ਹਾਂ ਨੇ ਇਸ ਦਾ 62,058 ਰੁਪਏ ਦਾ ਇਲਾਜ ਖਰਚਾ ਕਲੇਮ ਕੀਤਾ। ਪਹਿਲਾਂ ਇਸ ਨੂੰ ਲਟਕਾਇਆ ਜਾਂਦਾ ਰਿਹਾ ਤੇ ਫਿਰ ਮਾਰਚ 2018 ਵਿੱਚ ਉਨ੍ਹਾਂ ਨੇ ਕਲੇਮ ਰੱਦ ਕਰ ਕੇ ਕਾਰਨ ਦੱਸਿਆ ਕਿ ਸ਼ਿਕਾਇਤ ਕਰਤਾ ਨੇ ਆਪਣੀ ਤਿੰਨ ਸਾਲ ਪੁਰਾਣੀ ਬਿਮਾਰੀ ਦੇ ਬਾਰੇ ਪਹਿਲਾਂ ਨਹੀਂ ਦੱਸਿਆ। ਕੰਪਨੀ ਨੇ ਨੋਟਿਸ ਉੱਤੇ ਆਪਣੇ ਵੱਲੋਂ ਇਹੀ ਜਵਾਬ ਦਿੱਤਾ ਕਿ ਪੁਰਾਣੀ ਬਿਮਾਰੀ ਦੇ ਬਾਰੇ ਪਾਲਿਸੀ ਲੈਂਦੇ ਵਕਤ ਜਾਣਕਾਰੀ ਨਹੀਂ ਦਿੱਤੀ ਗਈ। ਫੋਰਮ ਨੇ ਸੁਣਵਾਈ ਦੇ ਬਾਅਦ ਕਿਹਾ ਕਿ ਜਿਸ ਬਿਮਾਰੀ ਦੇ ਪੁਰਾਣੀ ਹੋਣ ਦੀ ਗੱਲ ਕਹਿ ਕੇ ਕੰਪਨੀ ਨੇ ਕਲੇਮ ਰੱਦ ਕੀਤਾ, ਸ਼ਿਕਾਇਤ ਕਰਤਾ ਨੇ ਉਸ ਦਾ ਇਲਾਜ ਹੀ ਨਹੀਂ ਕਰਾਇਆ, ਜਿਸ ਦੀ ਪੁਸ਼ਟੀ ਡਿਸਚਾਰਜ ਸਲਿੱਪ ਤੋਂ ਹੁੰਦੀ ਹੈ। ਇਸ ਦੇ ਨਾਲ ਸ਼ਿਕਾਇਤ ਅਤੇ ਕੰਪਨੀ ਵੱਲੋਂ ਪੇਸ਼ ਕੀਤੇ ਪ੍ਰਪੋਜਲ ਵਿੱਚ ਵੀ ਸ਼ਿਕਾਇਤ ਕਰਤਾ ਦੇ ਦਸਖਤ ਵਿੱਚ ਫਰਕ ਹੈ। ਇਸ ਪਿੱਛੋਂ ਫੋਰਮ ਨੇ ਕੰਪਨੀ ਅਤੇ ਉਸ ਦੇ ਪ੍ਰਤੀਨਿਧੀ ਨੂੰ 12 ਫੀਸਦੀ ਵਿਆਜ ਦੇ ਨਾਲ ਇਲਾਜ ਖਰਚਾ ਮੋੜਨ ਅਤੇ ਕੇਸ ਖਰਚ ਤੇ ਪ੍ਰੇਸ਼ਾਨੀ ਦੇ ਬਦਲੇ ਵਿੱਚ 22 ਹਜ਼ਾਰ ਰੁਪਏ ਦੇਣ ਦੇ ਹੁਕਮ ਦਿੱਤੇ।