ਅੰਮ੍ਰਿਤਸਰ, 13 ਅਗਸਤ (ਪੋਸਟ ਬਿਊਰੋ)- ਗੁਰੂ ਕੀ ਨਗਰੀ ਵਿੱਚ ਪਹਿਲੀ ਵਾਰ ਹਾਈਟੈਕ ਲੁੱਟ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਚੀਫ ਖਾਲਸਾ ਦੀਵਾਨ ਦੇ ਹੈੱਡ ਆਫਿਸ ਅਤੇ ਸ੍ਰੀ ਗੁਰੂ ਹਰਕਿਸ਼ਨ ਪਬਲਿਕ ਸਕੂਲ ਮੇਨ ਬ੍ਰਾਂਚ ਦੇ ਬਾਹਰ ਵਾਲੇ ਪੰਜਾਬ ਐਂਡ ਸਿੰਧ ਬੈਂਕ ਦੇ ਏ ਟੀ ਐੱਮ ਵਿੱਚੋਂ ਲੱਖਾਂ ਰੁਪਏ ਦੀ ਰਕਮ ਕੱਢੀ ਗਈ ਹੈ। ਇਹ ਰਕਮ ਏ ਟੀ ਐੱਮ ਮਸ਼ੀਨ ਨੂੰ ਖੋਲ੍ਹ ਕੇ ਕੱਢੀ ਗਈ ਹੈ। ਵਾਰਦਾਤ ਕਰਨ ਵਾਲਾ ਲੁਟੇਰਾ ਕਾਫੀ ਚਲਾਕ ਸੀ। ਉਸ ਨੇ ਦੋ ਕੋਡ ਲਾਉਣ ਦੇ ਬਾਅਦ ਏ ਟੀ ਐੱਮ ਮਸ਼ੀਨ ਨੂੰ ਖੋਲ੍ਹਿਆ। ਅੰਦਰ ਰੱਖੇ ਨੌਂ ਲੱਖ 42 ਹਜ਼ਾਰ ਰੁਪਏ ਦੀ ਰਕਮ ਕੱਢੀ ਅਤੇ ਲੈ ਗਿਆ। ਇਸ ਦੌਰਾਨ ਉਸ ਨੇ ਸੀ ਸੀ ਟੀ ਵੀ ਕੈਮਰਿਆਂ ਉੱਤੇ ਕਾਲੇ ਰੰਗ ਦਾ ਪੇਂਟ ਵੀ ਲਾ ਦਿੱਤਾ, ਪਰ ਏ ਟੀ ਐੱਮ ਦੇ ਹਿਡਨ ਕੈਮਰੇ 'ਚੋਂ ਉਹ ਬਚ ਨਹੀਂ ਸਕਿਆ। ਇਸ ਲੁੱਟ ਨੂੰ ਪੁਲਸ ਨੇ ਹਾਈਟੈੱਕ ਲੁਟ ਮੰਨ ਕੇ ਕੇਸ ਦਰਜ ਕਰ ਲਿਆ।
ਚੀਫ ਖਾਲਸਾ ਦੀਵਾਨ ਦੇ ਬਾਹਰ ਵਾਲੀ ਪੰਜਾਬ ਐਂਡ ਸਿੰਧ ਬੈਂਕ ਦੇ ਮੈਨੇਜਰ ਪਵਨ ਕੁਮਾਰ ਨੇ ਦੱਸਿਆ ਕਿ ਕੱਲ੍ਹ ਸਵੇਰੇ ਉਨ੍ਹਾਂ ਨੂੰ ਸੂਚਨਾ ਮਿਲੀ ਕਿ ਏ ਟੀ ਐੱਮ ਦੀ ਮਸ਼ੀਨ ਕੰਮ ਨਹੀਂ ਕਰ ਰਹੀ। ਜਦ ਉਹ ਮੌਕੇ 'ਤੇ ਪਹੁੰਚੇ ਤਾਂ ਦੇਖਿਆ ਕਿ ਏ ਟੀ ਐੱਮ ਮਸ਼ੀਨ ਦਾ ਕੈਸ਼ ਵਾਲਾ ਹਿੱਸਾ ਖੁੱਲ੍ਹਾ ਸੀ। ਉਸ ਨੂੰ ਖੋਲ੍ਹਣ ਅਤੇ ਰੁਪਏ ਕੱਢਣ ਪਿੱਛੋਂ ਰੱਸੀ ਨਾਲ ਬੰਨ੍ਹਿਆ ਹੋਇਆ ਸੀ। ਉਸ ਦੇ ਬਾਅਦ ਦੇਖਿਆ ਤਾਂ ਏ ਟੀ ਐੱਮ ਵਿੱਚ ਲੱਗੇ ਸੀ ਸੀ ਟੀ ਵੀ ਕੈਮਰੇ ਉਤੇ ਕਾਲੇ ਰੰਗ ਦਾ ਸਪਰੇਅ ਕੀਤਾ ਗਿਆ ਸੀ। ਉਨ੍ਹਾਂ ਨੇ ਪੁਲਸ ਨੂੰ ਸੂਚਨਾ ਦਿੱਤੀ ਤਾਂ ਏ ਡੀ ਸੀ ਪੀ ਸਿਟੀ-1 ਜਗਜੀਤ ਸਿੰਘ ਵਾਲੀਆ, ਏ ਸੀ ਪੀ ਸੈਂਟਰਲ ਸੁਖਪਾਲ ਸਿੰਘ, ਏ ਡੀ ਸੀ ਪੀ ਕਰਾਈਮ ਗੁਰਨਾਮ ਸਿੰਘ ਅਤੇ ਪੁਲਸ ਟੀਮਾਂ ਮੌਕੇ 'ਤੇ ਪਹੁੰਚੀਆਂ। ਪੁਲਸ ਵੱਲੋਂ ਕੀਤੀ ਜਾਂਚ ਵਿੱਚ ਪਤਾ ਲੱਗਾ ਕਿ ਏ ਟੀ ਐੱਮ ਵਿੱਚੋਂ ਨੌਂ ਲੱਖ 39 ਹਜ਼ਾਰ 200 ਰੁਪਏ ਲੁੱਟੇ ਗਏ ਹਨ। ਲੁਟੇਰੇ ਇੰਨੇ ਤੇਜ਼ ਸਨ ਕਿ ਉਨ੍ਹਾਂ ਨੇ ਸੀ ਸੀ ਟੀ ਵੀ ਕੈਮਰੇ ਉੱਤੇ ਸਪਰੇਅ ਕੀਤਾ ਤੇ ਫਿਰ ਕੁਨੈਕਸ਼ਨ ਕੱਟ ਦਿੱਤੇ। ਏ ਟੀ ਐੱਮ ਮਸ਼ੀਨ ਨੂੰ ਕਿਸੇ ਵੀ ਹਥਿਆਰ ਜਾਂ ਵੈਲਡਿੰਗ ਮਸ਼ੀਨ ਨਾਲ ਕੱਟਿਆ ਨਹੀਂ, ਸਗੋਂ ਕੋਡ ਨਾਲ ਖੋਲ੍ਹਿਆ ਸੀ। ਕੋਡ ਕੇਵਲ ਬੈਂਕ ਅਤੇ ਏ ਟੀ ਐੱਮ ਵਿੱਚ ਕੈਸ਼ ਪਾਉਣ ਵਾਲੀ ਏਜੰਸੀ ਕੋਲ ਹੁੰਦਾ ਹੈ, ਇਸ ਲਈ ਪੁਲਸ ਜਾਂਚ ਸਭ ਤੋਂ ਪਹਿਲਾਂ ਬੈਂਕ ਅਤੇ ਕੈਸ਼ ਪਾਉਣ ਵਾਲੀ ਏਜੰਸੀ 'ਤੇ ਫੋਕਸ ਹੋਈ ਹੈ। ਏ ਟੀ ਐੱਮ ਵਿੱਚ ਕੈਸ਼ ਮਸ਼ੀਨ ਨੂੰ ਖੋਲ੍ਹਣ ਲਈ ਤਿੰਨ ਕੋਡ ਹੁੰਦੇ ਹਨ। ਇੱਕ ਕੋਡ ਬੈਂਕ ਅਧਿਕਾਰੀਆਂ ਤੇ ਦੂਸਰਾ ਕੈਸ਼ ਪਾਉਣ ਵਾਲੀ ਕੰਪਨੀ ਕੋਲ ਹੁੰਦਾ ਹੈ। ਦੋਵੇਂ ਆਪੋ ਆਪਣੇ ਕੋਡ ਕਿਸੇ ਨੂੰ ਨਹੀਂ ਦੱਸਦੇ। ਇਸ ਦੇ ਇਲਾਵਾ ਇੱਕ ਕੋਡ ਸਰਵਰ ਦਾ ਹੁੰਦਾ ਹੈ। ਪੁਲਸ ਨੇ ਸਾਈਬਰ ਕਰਾਈਮ ਸੈਲ ਨੂੰ ਜਾਂਚ ਵਿੱਚ ਸ਼ਾਮਲ ਕੀਤਾ ਹੈ। ਬੈਂਕ ਮੈਨੇਜਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਸ਼ੱਕ ਹੈ ਕਿ ਕਿਸੇ ਨੇ ਕੋਡ ਹੈਂਗ ਕਰ ਕੇ ਵਾਰਦਾਤ ਕੀਤੀ ਹੈ।