ਮੁੰਬਈ, 11 ਅਕਤੂਬਰ (ਪੋਸਟ ਬਿਊਰੋ)- ਰੇਮੰਡ ਗਰੁੱਪ ਦੇ ਚੇਅਰਮੈਨ ਗੌਤਮ ਸਿੰਘਾਨੀਆ ਨੇ ਇੱਕ ਸਿਵਲ ਕੋਰਟ ਵਿੱਚ ਅਰਜ਼ੀ ਦਾਇਰ ਕੀਤੀ ਸੀ ਕਿ ਉਸ ਤੋਂ ਵੱਖ ਰਹਿੰਦੇ ਉਸ ਦੇ ਪਿਤਾ ਡਾਕਟਰ ਵਿਜੇਪਤ ਸਿੰਘਾਨੀਆ (80) ਵੱਲੋਂ ਲਿਖੀ ਜਾ ਰਹੀ ਪੁਸਤਕ ਨੂੰ ਛਪਵਾਉਣ ਤੋਂ ਰੋਕਿਆ ਜਾਵੇ।
ਆਪਣੇ ਪਿਓ ਦੀ ਪੁਸਤਕ 'ਤੇ ਇਤਰਾਜ਼ ਕਰਦਿਆਂ ਗੌਤਮ ਸਿੰਘਾਨੀਆ ਨੇ ਦੋਸ਼ ਲਾਇਆ ਕਿ ਇਸ ਪੁਸਤਕ ਨਾਲ ਉਸ (ਗੌਤਮ) ਅਤੇ ਉਸ ਦੇ ਪਰਵਾਰ ਦੀ ਮਾਣਹਾਨੀ ਹੋਵੇਗੀ। ਵਰਨਣ ਯੋਗ ਹੈ ਕਿ ਪਿਓ-ਪੁੱਤਰ ਦੋਵੇਂ ਹੀ ਬੰਬੇ ਹਾਈ ਕੋਰਟ ਵਿੱਚ ਕੁੜੱਤਣ ਭਰੀ ਕਾਨੂੰਨੀ ਲੜਾਈ ਵਿੱਚ ਰੁੱਝੇ ਹੋਏ ਹਨ, ਜਿਸ 'ਤੇ ਡਾਕਟਰ ਵਿਜੇਪਤ ਸਿੰਘਾਨੀਆ ਨੇ ਆਪਣੀ ਪਟੀਸ਼ਨ ਵਿੱਚ ਦੋਸ਼ ਲਾਇਆ ਸੀ ਕਿ ਜੋ ਪੁੱਤਰ ਨੇ ਵਾਅਦਾ ਕੀਤਾ ਸੀ, ਉਹ ਪੂਰਾ ਨਹੀਂ ਕਰ ਰਿਹਾ। ਪਿਓ ਨੂੰ ਇਨੇ ਵੱਡੇ ਸਾਮਰਾਜ ਦਾ ਹਿੱਸਾ ਨਾ ਮੰਨਦੇ ਹੋਏ ਪੁੱਤਰ ਨੇ ਲੰਮੀ-ਚੌੜੀ ਇਮਾਰਤ ਵਿੱਚ ਪਿਓ ਨੂੰ ਕਿਰਾਏ ਦੇ ਕਮਰੇ ਵਿੱਚ ਰਹਿਣ ਨੂੰ ਮਜਬੂਰ ਕਰ ਦਿੱਤਾ ਸੀ। ਮੀਡੀਆ ਨੂੰ ਇੰਟਰਵਿਊ ਵਿੱਚ ਵਿਜੇਪਤ ਸਿੰਘਾਨੀਆ ਨੇ ਦੱਸਿਆ ਕਿ ਉਨ੍ਹਾਂ ਪੁੱਤਰ ਮੋਹ ਵਿੱਚ ਅੰਨ੍ਹੇ ਹੋ ਕੇ ਉਸ (ਗੌਤਮ) ਨੂੰ ਸਭ ਕੁਝ ਦੇ ਦਿੱਤਾ ਸੀ, ਜੋ ਤਕਰੀਬਨ 1000 ਕਰੋੜ ਰੁਪਏ ਦਾ ਸਰਮਾਇਆ ਬਣਦਾ ਹੈ। ਇਸ ਦੇ ਜਵਾਬ ਵਿੱਚ ਗੌਤਮ ਨੇ ਆਪਣੇ ਪਿਓ ਵਿਰੁੱਧ ਕੌੜ ਕੱਢਦੇ ਹੋਏ ਕਿਹਾ ਕਿ ਜੇ ਕੇ ਹਾਊਸ ਅਪਾਰਟਮੈਂਟ ਵਿਜੇਪਤ ਸਿੰਘਾਨੀਆ ਨੂੰ ਸ਼ੇਅਰ ਹੋਲਡਰਾਂ ਦੀ ਪ੍ਰਵਾਨਗੀ ਤੋਂ ਬਿਨਾਂ ਨਹੀਂ ਸੌਂਪ ਸਕਦਾ। ਗੌਤਮ ਸਿੰਘਾਨੀਆ ਨੇ ਪਿਛਲੇ ਸਾਲ ਕਿਹਾ ਸੀ ਕਿ ਕੁਝ ਸੁਆਰਥੀ ਲੋਕ ਮੇਰੇ ਪਿਓ ਨੂੰ ਚੁੱਕ ਰਹੇ ਹਨ ਤਾਂ ਕਿ ਉਸ ਤੋਂ ਵੱਡਾ ਮਾਲੀ ਲਾਭ ਲਿਆ ਜਾ ਸਕੇ।
ਗੌਤਮ ਸਿੰਘਾਨੀਆ ਨੇ ਆਪਣੀ ਪਟੀਸ਼ਨ ਵਿੱਚ ਦੋਸ਼ ਲਾਇਆ ਕਿ ਵਿਜੇਪਤ ਨੇ ਆਪਣੀ ਪੁਸਤਕ ਦੇ ਜਿਹੜੇ ਅੰਸ਼ ਦਿੱਤੇ ਹਨ, ਉਹ ਕੁਝ ਮੁਲਾਜ਼ਮਾਂ, ਸਾਬਕਾ ਮੁਲਾਜ਼ਮਾਂ ਦੇ ਨਾਲ ਕੁਝ ਸਾਥੀਆਂ ਨਾਲ ਸਾਂਝੇ ਕੀਤੇ ਹਨ ਤੇ ਇਨ੍ਹਾਂ ਵਿੱਚ ਬਹੁਤ ਕੁਝ ਪਰਵਾਰ ਲਈ ਮਾਣਹਾਨੀ ਦਾ ਕਾਰਨ ਹਨ। ਗੌਤਮ ਦੀ ਇਹ ਦਰਖਾਸਤ ਕੋਰਟ ਨੇ ਰੱਦ ਕਰ ਦਿੱਤੀ ਹੈ। ਇਹ ਮਾਮਲਾ ਸਾਲਸਾਂ ਦੇ ਇੱਕ ਪੈਨਲ ਵੱਲੋਂ ਵਿਚਾਰਿਆ ਜਾ ਰਿਹਾ ਹੈ। ਡਾਕਟਰ ਵਿਜੇਪਤ ਸਿੰਘਾਨੀਆ ਦੇ ਵਕੀਲਾਂ ਨੇ ਦਲੀਲ ਦਿੱਤੀ ਹੈ ਕਿ ਗੌਤਮ ਸਿੰਘਾਨੀਆ ਨੇ ਪੁਸਤਕ ਵਿਚਲੇ ਮਾਣਹਾਨੀ ਦੇ ਸ਼ਬਦਾਂ ਦਾ ਕੋਈ ਜ਼ਿਕਰ ਨਹੀਂ ਕੀਤਾ, ਜਦ ਕਿ ਪ੍ਰਕਾਸ਼ਕਾਂ ਨੇ ਦੱਸਿਆ ਹੈ ਕਿ ਇਹ ਪੁਸਤਕ ਕੋਈ ਜੀਵਨੀ ਨਹੀਂ ਹੈ, ਇਹ ਇੱਕ ਸਵੈ-ਜੀਵਨੀ ਹੈ, ਜਿਸ ਨੂੰ ਕੋਈ ਹੋਰ ਨਹੀਂ ਬਲਕਿ ਅੱਸੀ ਸਾਲ ਦਾ ਪਿਤਾ ਖੁਦ ਲਿਖ ਰਿਹਾ ਹੈ।