ਪਟਨਾ, 11 ਅਕਤੂਬਰ (ਪੋਸਟ ਬਿਊਰੋ)- ਜਨਤਾ ਦਲ ਯੂ ਦੇ ਵਿਦਿਆਰਥੀ ਸਮਾਗਮ ਵਿੱਚ ਹਿੱਸਾ ਲੈਣ ਬਾਪੂ ਸੈਮੀਨਾਰ ਹਾਲ ਵਿੱਚ ਪੁੱਜੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ `ਤੇ ਅੱਜ ਇਕ ਵਿਅਕਤੀ ਨੇ ਚੱਪਲ ਸੁੱਟ ਦਿੱਤੀ। ਇਸ ਘਟਨਾ ਨਾਲ ਮੁੱਖ ਮੰਤਰੀ ਦੀ ਸੁਰੱਖਿਆ ਵਿੱਚ ਲਾਪਰਵਾਹੀ ਦੇਖਣ ਨੂੰ ਮਿਲੀ ਹੈ।
ਚੰਦਨ ਤਿਵਾਰੀ ਨਾਂ ਦੇ ਲੜਕੇ ਨੇ ਪ੍ਰੋਗਰਾਮ ਦਾ ਉਦਘਾਟਨ ਹੋਣ ਪਿੱਛੋਂ ਮੰਚ `ਤੇ ਬੈਠੇ ਮੁੱਖ ਮੰਤਰੀ ਵੱਲ ਚੱਪਲ ਸੁੱਟੀ। ਇਸ ਦੇ ਨਾਲ ਉਸ ਨੇ ਰਿਜ਼ਰਵੇਸ਼ਨ ਦਾ ਵਿਰੋਧ ਕਰਦੇ ਹੋਏ ਮੁੱਖ ਮੰਤਰੀ ਦੇ ਖਿਲਾਫ ਨਾਅਰੇਬਾਜ਼ੀ ਕੀਤੀ। ਇਸ ਉਤੇ ਜਨਤਾ ਦਲ ਯੂ ਦੇ ਨੇਤਾਵਾਂ ਨੇ ਉਸ ਦੀ ਕੁੱਟਮਾਰ ਕੀਤੀ, ਜਿਸ ਦੇ ਬਾਅਦ ਪੁਲਸ ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ। ਪੁਲਸ ਉਸ ਨੂੰ ਗਾਂਧੀ ਮੈਦਾਨ ਥਾਣੇ `ਚ ਲੈ ਗਈ ਹੈ।
ਇਸ ਘਟਨਾ ਦੇ ਬਾਅਦ ਮੁੱਖ ਮੰਤਰੀ ਦੀ ਸੁਰੱਖਿਆ ਵਿੱਚ ਲੱਗੇ ਕਰਮੀਆਂ `ਚ ਹੱਲਚੱਲ ਮਚ ਗਈ ਅਤੇ ਉਨ੍ਹਾਂ ਨੇ ਤੁਰੰਤ ਮੁੱਖ ਮੰਤਰੀ ਨੂੰ ਸੁਰੱਖਿਆ ਘੇਰੇ `ਚ ਲੈ ਲਿਆ। ਮੁੱਖ ਮੰਤਰੀ ਉੱਤੇ ਚੱਪਲ ਸੁੱਟਣ ਵਾਲਾ ਚੰਦਨ ਔਰੰਗਾਬਾਦ ਦਾ ਵਾਸੀ ਹੈ ਅਤੇ ਖੁਦ ਨੂੰ ਸਵਰਨ ਸੈਨਾ ਦਾ ਮੈਂਬਰ ਦੱਸਦਾ ਹੈ। ਜਨਤਾ ਦਲ ਯੂ ਵਿਦਿਆਰਥੀ ਸਮਾਗਮ `ਚ ਹਿੱਸਾ ਲੈਣ ਲਈ ਵੱਡੀ ਗਿਣਤੀ `ਚ ਵਿਦਿਆਰਥੀ ਆਏ ਸਨ। ਇਸ ਵਿੱਚ ਨਿਤੀਸ਼ ਕੁਮਾਰ ਦੇ ਇਲਾਵਾ ਪਾਰਟੀ ਦੇ ਚੋਣ ਰਣਨੀਤੀਕਾਰ ਪ੍ਰਸ਼ਾਂਤ ਕਿਸ਼ੋਰ, ਪਾਰਟੀ ਦੇ ਪ੍ਰਦੇਸ਼ ਪ੍ਰਧਾਨ ਨਾਰਾਇਣ ਸਿੰਘ ਦੇ ਨਾਲ ਕਈ ਹੋਰ ਸੀਨੀਅਰ ਨੇਤਾ ਵੀ ਮੌਜੂਦ ਸਨ।
ਪੁਲਸ ਅਧਿਕਾਰੀ ਸੁਰੇਸ਼ ਕੁਮਾਰ ਨੇ ਦੱਸਿਆ ਕਿ ਚੰਦਨ ਮਾਨਸਿਕ ਰੂਪ ਤੋਂ ਪਰੇਸ਼ਾਨ ਦਿੱਸ ਰਿਹਾ ਹੈ। ਸੀਨੀਅਰ ਪੁਲਸ ਸੁਪਰਡੈਂਟ ਮਨੁ ਮਹਾਰਾਜ ਖੁਦ ਉਸ ਤੋਂ ਪੁੱਛਗਿਛ ਕਰ ਰਹੇ ਹਨ। ਸੁਰੇਸ਼ ਨੇ ਦੱਸਿਆ ਕਿ ਚੰਦਨ ਅਤੇ ਉਸ ਦੇ ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਉਸ ਦੇ ਪਿਤਾ ਵਿਮਲੇਸ਼ ਸਿੰਘ ਦਾ ਇਲਾਜ ਝਾਰਖੰਡ ਦੇ ਕਾਂਕੇ ਵਿੱਚ ਮਾਨਸਿਕ ਹਸਪਤਾਲ `ਚ ਚੱਲ ਰਿਹਾ ਹੈ। ਜਨਤਾ ਦਲ ਯੂ ਨੇ ਲੋਕਨਾਇਕ ਜੈ ਪ੍ਰਕਾਸ਼ ਨਾਰਾਇਣ ਦੀ ਜਯੰਤੀ ਦੇ ਮੌਕੇ `ਤੇ ਬਾਪੂ ਸਭਾਗਾਰ `ਚ ਵਿਦਿਆਰਥੀ ਸਮਾਗਮ ਦਾ ਆਯੋਜਨ ਕੀਤਾ ਸੀ। ਇਸ ਆਯੋਜਨ `ਚ ਚੰਦਨ ਨੇ ਮਚ ਵੱਲ ਚੱਪਲ ਸੁੱਟੀ। ਇਸ ਤੋਂ ਪਹਿਲਾਂ ਪੁਲਸ ਚੰਦਨ ਨੂੰ ਹਿਰਾਸਤ `ਚ ਲੈਂਦੀ ਜਦਯੂ ਵਰਕਰਾਂ ਨੇ ਉਸ ਦੀ ਕੁੱਟਮਾਰ ਕਰ ਦਿੱਤੀ ਸੀ।