ਜਲੰਧਰ, 12 ਅਗਸਤ (ਪੋਸਟ ਬਿਊਰੋ)- ਈਸਾਈ ਮਿਸ਼ਨ ਦੇ ਫਾਦਰ ਐਂਥਨੀ ਦੇ ਪ੍ਰਤਾਪੁਰਾ ਵਾਲੇ ਐਫ ਐਮ ਜੇ ਹਾਊਸ ਤੋਂ 5.78 ਕਰੋੜ ਦੀ ਲੁੱਟ ਦੇ ਦੋਸ਼ੀ ਚਾਰ ਪੁਲਸ ਕਰਮੀਆਂ ਏ ਐਸ ਆਈ ਜੋਗਿੰਦਰ ਸਿੰਘ, ਰਾਜਪ੍ਰੀਤ ਸਿੰਘ, ਦਿਲਬਾਗ ਸਿੰਘ ਅਤੇ ਹੈਡ ਕਾਂਸਟੇਬਲ ਅਮਰੀਕ ਸਿੰਘ ਨੂੰ ਨੌਕਰੀ ਤੋਂ ਕੱਢਣ ਦੇ ਬਾਅਦ ਇਸ ਵਾਰਦਾਤ ਦਾ ਮੁੰਬਈ ਕੁਨੈਕਸ਼ਨ ਵੀ ਪਤਾ ਲੱਗ ਗਿਆ ਹੈ। ਦੱਸਿਆ ਜਾਂਦਾ ਹੈ ਕਿ ਇਸ ਲੁੱਟ ਦੀ ਸਾਜ਼ਿਸ਼ ਜਲੰਧਰ ਦੇ ਬੀ ਐਸ ਐਫ ਚੌਕ ਨੇੜੇ ਇਕ ਹੋਟਲ 'ਚ ਰਚੀ ਗਈ ਸੀ। ਲੁੱਟੀ ਰਕਮ ਦਾ ਬਾਕੀ ਸਵਾ ਕਰੋੜ ਲੱਭ ਰਹੀ ਏ ਐਸ ਆਈ ਟੀ (ਵਿਸ਼ੇਸਲ ਜਾਂਚ ਟੀਮ) ਨੂੰ ਇਸ ਦੇ ਸੰਬੰਧ ਵਿੱਚ ਬਹੁਤ ਸਾਰੀ ਅਹਿਮ ਜਾਣਕਾਰੀ ਮਿਲੀ ਹੈ।
ਪਤਾ ਲੱਗਾ ਹੈ ਕਿ ਲੁੱਟ ਕਾਂਡ ਦਾ ਮੁੰਬਈ ਕੁਨੈਕਸ਼ਨ ਮਿਲਣ ਪਿੱਛੋਂ ਐਸ ਆਈ ਟੀ ਨੇ ਹੋਟਲ ਤੋਂ ਰੇਡ ਦੇ ਦਿਨ ਤੋਂ ਪਹਿਲੇ ਕੁਝ ਦਿਨਾਂ ਦੀ ਸੀ ਸੀ ਟੀ ਵੀ ਫੁਟੇਜ ਵੇਖੀ ਹੈ ਤੇ ਉਨ੍ਹਾਂ ਲੋਕਾਂ ਦੀ ਜਾਂਚ ਕੀਤੀ ਹੈ, ਜੋ ਇਸ ਹੋਟਲ ਵਿੱਚ ਠਹਿਰੇ ਸਨ। ਐਸ ਆਈ ਇਸ ਮਾਮਲੇ 'ਚ ਦੋ ਪੱਖਾਂ ਤੋਂ ਜਾਂਚ ਕਰ ਰਹੀ ਹੈ। ਪਹਿਲਾ ਇਹ ਸ਼ੱਕ ਹੈ ਕਿ ਮੁੰਬਈ ਤੋਂ ਇਨ੍ਹਾਂ ਲੋਕਾਂ ਨੂੰ ਫਾਦਰ ਐਂਥਨੀ ਕੋਲ ਕਰੋੜਾਂ ਰੁਪਏ ਹੋਣ ਦੀ ਜਾਣਕਾਰੀ ਸੀ, ਜੋ ਉਨ੍ਹਾਂ ਨੇ ਏ ਐਸ ਆਈ ਜੋਗਿੰਦਰ ਸਿੰਘ, ਏ ਐਸ ਆਈ ਰਾਜਪ੍ਰੀਤ ਸਿੰਘ ਅਤੇ ਮੁਖਬਰ ਸੁਰਿੰਦਰ ਸਿੰਘ ਦੇ ਨਾਲ ਸਾਂਝੀ ਕੀਤੀ ਸੀ। ਇਸ ਜਿਸ ਦੇ ਬਾਅਦ ਇਸੇ ਹੋਟਲ 'ਚ ਲੁੱਟ ਕਾਂਡ ਦਾ ਪੂਰਾ ਖਾਕਾ ਤਿਆਰ ਕੀਤਾ ਗਿਆ ਤੇ ਫਿਰ ਪੈਸਾ ਲੁੱਟਿਆ ਗਿਆ। ਅਜੇ ਤੱਕ ਫੜੇ ਮੁਲਜ਼ਮਾਂ ਤੋਂ ਐਸ ਆਈ ਟੀ 4.57 ਕਰੋੜ ਰੁਪਏ ਜ਼ਬਤ ਕਰ ਚੁੱਕੀ ਹੈ। ਬਾਕੀ ਬਚਿਆ ਪੈਸਾ ਲੁੱਟ ਦੇ ਬਾਅਦ ਹਿੱਸੇ ਵਜੋਂ ਮੁੰਬਈ 'ਚ ਇਨ੍ਹਾਂ ਲੋਕਾਂ ਨੂੰ ਦਿੱਤਾ ਹੋਣ ਦੀ ਸੰਭਾਵਨਾ ਹੈ। ਐਸ ਆਈ ਟੀ ਨੇ ਫਾਦਰ ਐਂਥਨੀ ਦੇ ਖਿਲਾਫ ਸੀ ਐਸ ਆਰ ਫੰਡ ਦੇ ਗਲਤ ਵਰਤੋਂ ਦੀ ਵੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਇਸ ਨਾਲ ਜੁੜੇ ਕਈ ਲੋਕਾਂ ਦੀ ਜਾਂਚ ਕੀਤੀ ਜਾ ਚੁੱਕੀ ਹੈ। ਇਸ ਕੇਸ ਵਿੱਚ ਅਹਿਮ ਕੜੀ ਉਹ ਦਲਾਲ ਹੈ, ਜੋ ਛਾਪੇਮਾਰੀ ਦੇ ਮੌਕੇ ਵੀ ਫਾਦਰ ਐਂਥਨੀ ਦੇ ਘਰ ਸੀ। ਐਸ ਆਈ ਟੀ ਨੇ ਉਸ ਨੂੰ ਸੰਮਨ ਦਿੱਤਾ ਸੀ, ਪਰ ਉਹ ਜਾਂਚ ਵਾਸਤੇ ਨਹੀਂ ਆਇਆ। ਇਸ ਲਈ ਐਸ ਆਈ ਟੀ ਜਾਂਚ 'ਚ ਇਨਕਮ ਟੈਕਸ ਤੋਂ ਜੁਟਾਏ ਸਬੂਤਾਂ ਦਾ ਵੀ ਸਹਾਰਾ ਲਵੇਗੀ। ਜਾਂਚ 'ਚ ਇਹ ਪਤਾ ਲੱਗਾ ਹੈ ਕਿ ਫਾਦਰ ਐਂਥਨੀ ਤੇ ਉਨ੍ਹਾਂ ਨਾਲ ਜੁੜੇ ਚਰਚੇ ਜ਼ਰੀਏ ਚੈਰਿਟੀ ਤੋਂ ਸੀ ਐਸ ਆਰ ਫੰਡ ਨੂੰ ਰਿਸਾਈਕਲ ਕੀਤਾ ਜਾ ਰਿਹਾ ਸੀ, ਜਿਸ ਲਈ ਦਲਾਲ ਦਾ ਸਹਾਰਾ ਲਿਆ ਜਾ ਰਿਹਾ ਹੈ।