ਨਵੀਂ ਦਿੱਲੀ, 12 ਅਗਸਤ (ਪੋਸਟ ਬਿਊਰੋ)- ਕੈਸ਼-ਫਲੋਅ ਦੀ ਸਮੱਸਿਆ ਨਾਲ ਜੂਝ ਰਹੀ ਜਨਤਕ ਖੇਤਰ ਦੀ ਬੀ ਐੱਸ ਐੱਨ ਐੱਲ (ਭਾਰਤ ਦੀ ਸਰਕਾਰੀ ਟੈਲੀਫੋਨ ਕੰਪਨੀ) ਨੇ ਆਪਣੇ ਕੰਪਨੀ ਗ੍ਰਾਹਕਾਂ ਤੋਂ ਬਕਾਏ ਦੀ ਵਸੂਲੀ ਲਈ ਹਮਲਾਵਰ ਕਦਮ ਚੁੱਕਣ ਦੀ ਯੋਜਨਾ ਬਣਾਈ ਹੈ। ਟੈਲੀਕਾਮ ਕੰਪਨੀ ਅਗਲੇ ਦੋ-ਤਿੰਨ ਮਹੀਨਿਆਂ ਵਿੱਚ 3000 ਕਰੋੜ ਤੋਂ ਵੱਧ ਦੇ ਬਕਾਏ ਵਿੱਚੋਂ ਵੱਡੀ ਰਾਸ਼ੀ ਦੀ ਵਸੂਲੀ ਦੀ ਆਸ ਕਰਦੀ ਹੈ।
ਭਾਰਤ ਸੰਚਾਰ ਨਿਗਮ ਲਿਮਟਿਡ (ਬੀ ਐੱਸ ਐੱਨ ਐੱਲ) ਇਹ ਕਦਮ ਓਦੋਂ ਚੁੱਕ ਰਹੀ ਹੈ, ਜਦ ਕੰਪਨੀ ਵਿੱਤੀ ਸਥਿਤੀ ਬਾਰੇ ਕਾਫੀ ਦਬਾਅ ਵਿੱਚ ਹੈ ਅਤੇ ਇਸ ਕਾਰਨ ਉਸ ਨੇ ਇਸ ਸਾਲ ਦੂਸਰੀ ਵਾਰ ਕਰਮਚਾਰੀਆਂ ਦੀ ਤਨਖਾਹ ਦੇ ਭੁਗਤਾਨ ਵਿੱਚ ਦੇਰੀ ਕੀਤੀ ਹੈ। ਬੀ ਐੱਸ ਐੱਨ ਐੱਲ ਨੇ ਕਰਮਚਾਰੀਆਂ ਦੀ ਜੁਲਾਈ ਮਹੀਨੇ ਦੀ ਤਨਖਾਹ ਪੰਜ ਅਗਸਤ ਨੂੰ ਜਾਰੀ ਕੀਤੀ ਸੀ। ਇਸ ਕਾਰਪੋਰੇਸ਼ਨ ਦੇ ਚੇਅਰਮੈਨ ਅਤੇ ਮੈਨੇਜਿੰਗ ਡਾਇਰੈਕਟਰ ਪੀ ਕੇ ਪੁਰਵਾਰ ਨੇ ਕਿਹਾ, ਸਾਡਾ ਕੰਪਨੀ ਗ੍ਰਾਹਕਾਂ ਵੱਲ ਬਕਾਇਆ 3000 ਕਰੋੜ ਰੁਪਏ ਤੋਂ ਵੱਧ ਹੈ। ਅਸੀਂ ਇਸ ਦੀ ਵਸੂਲੀ ਦੇ ਹਮਲਾਵਰ ਕਦਮ ਉਠਾ ਰਹੇ ਹਾਂ, ਇਸ ਵਿੱਚ ਸਾਨੂੰ ਸਫਲਤਾ ਵੀ ਮਿਲ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਪੂਰੀ ਬਕਾਇਆ ਰਾਸ਼ੀ ਵਸੂਲੀ ਦੀ ਸਮਾਂ ਹੱਦ ਦੱਸਣਾ ਮੁਸ਼ਕਲ ਹੈ, ਪਰ ਬੀ ਐੱਸ ਐੱਨ ਐੱਲ ਨੂੰ ਅਗਲੇ ਦੋ-ਤਿੰਨ ਮਹੀਨਿਆਂ ਵਿੱਚ ਉਸ ਵਿੱਚੋਂ ਵੱਡੀ ਰਾਸ਼ੀ ਦੀ ਵਸੂਲੀ ਦੀ ਉਮੀਦ ਹੈ। ਕੰਪਨੀ ਦਾ ਸਾਲਾਨਾ ਆਮਦਨ ਅਤੇ ਖਰਚ (ਸੰਚਾਲਨ ਖਰਚ ਅਤੇ ਤਨਖਾਹ) ਵਿੱਚ 800 ਕਰੋੜ ਰੁਪਏ ਦਾ ਫਰਕ ਹੈ। ਬੀ ਐੱਸ ਐੱਨ ਐੱਲ ਨੂੰ 2018-19 'ਚ ਲਗਭਗ 14000 ਕਰੋੜ ਰੁਪਏ ਘਾਟੇ ਦਾ ਅੰਦਾਜ਼ਾ ਹੈ। ਕੰਪਨੀ ਨੂੰ 2017-18 ਵਿੱਚ 7993 ਕਰੋੜ ਰੁਪਏ ਦਾ ਘਾਟਾ ਹੋਇਆ ਸੀ। ਕੰਪਨੀ ਕਿਰਾਏ ਤੋਂ ਵਧਦੀ ਕਮਾਈ ਦੀ ਉਮੀਦ ਕਰ ਰਹੀ ਹੈ। ਇਸ ਸਾਲ ਬੀ ਐੱਸ ਐੱਨ ਐੱਲ ਦੀ ਕਿਰਾਏ ਤੋਂ ਲਗਭਗ 1000 ਕਰੋੜ ਰੁਪਏ ਦੀ ਕਮਾਈ 'ਤੇ ਨਜ਼ਰ ਹੈ। ਪਿਛਲੇ ਵਾਰ ਇਹ 200 ਕਰੋੜ ਰੁਪਏ ਸੀ। ਇਸ ਯੋਜਨਾ ਤਹਿਤ ਮੌਜੂਦਾ ਇਮਾਰਤਾਂ ਦੀ ਜ਼ਿਆਦਾ ਤੋਂ ਜ਼ਿਆਦਾ ਵਰਤੋਂ ਅਤੇ ਜ਼ਿਆਦਾ ਜਗ੍ਹਾ ਨੂੰ ਪਟੇ 'ਤੇ ਦੇਣ ਦੀ ਯੋਜਨਾ ਹੈ। ਇਸ ਤੋਂ ਇਲਾਵਾ ਬੀ ਐੱਸ ਐੱਨ ਐੱਲ ਸਾਲਾਨਾ ਲਗਭਗ 200 ਕਰੋੜ ਰੁਪਏ ਤੱਕ ਬਚਾਉਣ ਨੂੰ ਲੈ ਕੇ ਆਊਟਸੋਰਸ ਕੀਤੇ ਗਏ ਕੰਮਾਂ ਨੂੰ ਦਰੁਸਤ ਕਰਨ 'ਤੇ ਵੀ ਕੰਮ ਕਰ ਰਹੀ ਹੈ।