ਬ੍ਰਿਟਿਸ਼ ਕੋਲੰਬੀਆ, 12 ਅਗਸਤ (ਪੋਸਟ ਬਿਊਰੋ) : ਬ੍ਰਿਟਿਸ਼ ਕੋਲੰਬੀਆ ਦੀ ਆਰਸੀਐਮਪੀ ਵੱਲੋਂ ਐਤਵਾਰ ਨੂੰ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਗਈ ਕਿ ਪ੍ਰੋਵਿੰਸ ਦੇ ਉੱਤਰ ਵੱਲ ਵਾਪਰੇ ਤੀਹਰੇ ਕਤਲ ਕਾਂਡ ਲਈ ਲੋੜੀਂਦੇ ਦੋ ਮਸ਼ਕੂਕਾਂ ਦੀਆਂ ਕਥਿਤ ਤੌਰ ਉੱਤੇ ਮਿਲੀਆਂ ਲਾਸ਼ਾਂ ਅਸਲ ਵਿੱਚ ਵੀ ਉਨ੍ਹਾਂ ਦੀਆਂ ਹੀ ਹਨ। ਇਨ੍ਹਾਂ ਲਾਸ਼ਾਂ ਦਾ ਪੋਸਟਮਾਰਟਮ ਭਾਵੇਂ ਕਰ ਲਿਆ ਗਿਆ ਹੈ ਪਰ ਇਸ ਬਾਰੇ ਰਿਪੋਰਟ ਦਾ ਖੁਲਾਸਾ ਸੋਮਵਾਰ ਨੂੰ ਹੀ ਹੋਵੇਗਾ।
ਇਹ ਮੰਨਿਆ ਜਾ ਰਿਹਾ ਹੈ ਕਿ ਇਹ ਲਾਸ਼ਾਂ 19 ਸਾਲਾ ਕੈਮ ਮੈਕਲਿਓਡ ਤੇ 18 ਸਾਲਾ ਬ੍ਰਾਇਰ ਸ਼ਮੈਗੈਲਸਕੀ ਦੀਆਂ ਹਨ। ਇਹ ਲਾਸ਼ਾਂ ਬੁੱਧਵਾਰ ਨੂੰ ਉੱਤਰੀ ਮੈਨੀਟੋਬਾ ਦੀ ਨੈਲਸਨ ਰਿਵਰ ਨੇੜਿਓਂ ਮਿਲੀਆਂ ਸਨ। ਸ਼ਨਿੱਚਰਵਾਰ ਨੂੰ ਮੈਨੀਟੋਬਾ ਆਰਸੀਐਮਪੀ ਨੇ ਆਖਿਆ ਕਿ ਉਨ੍ਹਾਂ ਨੂੰ ਅਜਿਹੀ ਚੀਜ਼ ਮਿਲੀ ਹੈ ਜਿਹੜੀ ਉਨ੍ਹਾਂ ਦੀ ਜਾਂਚ ਲਈ ਬੜੇ ਕੰਮ ਦੀ ਹੋ ਸਕਦੀ ਹੈ। ਸਾਰਜੈਂਟ ਪਾਲ ਮੈਨੈਗਰੇ ਨੇ ਇੱਕ ਈਮੇਲ ਵਿੱਚ ਆਖਿਆ ਕਿ ਸ਼ੁੱਕਰਵਾਰ ਨੂੰ ਗਿਲਾਮ, ਮੈਨੀਟੋਬਾ ਦੇ ਨੇੜੇ ਛੇ ਪੁਲਿਸ ਅਧਿਕਾਰੀਆਂ ਨੇ ਜਾਂਚ ਦਾ ਕੰਮ ਮੁਕੰਮਲ ਕਰ ਲਿਆ ਸੀ। ਇੱਥੇ ਹੀ ਮੈਕਲਿਓਡ ਤੇ ਸ਼ਮੈਗੈਲਸਕੀ ਦੀ ਮ੍ਰਿਤਕ ਦੇਹ ਪਾਏ ਜਾਣ ਦਾ ਪਤਾ ਲੱਗਿਆ ਸੀ।
ਲਾਸ਼ਾਂ ਦੀ ਸ਼ਨਾਖਤ ਤੇ ਮੌਤ ਦੇ ਕਾਰਨਾਂ ਦਾ ਪਤਾ ਲਾਉਣ ਦਾ ਕੰਮ ਵਿਨੀਪੈਗ ਵਿੱਚ ਕੀਤਾ ਜਾ ਰਿਹਾ ਹੈ। ਮੈਨੇਗਰੇ ਨੇ ਆਖਿਆ ਕਿ ਦੋਵਾਂ ਮਸ਼ਕੂਕਾਂ ਦੀ ਭਾਲ ਦਾ ਕੰਮ ਵਧਾ ਦਿੱਤਾ ਗਿਆ ਸੀ। ਜਿੱਥੇ ਸੜੀ ਹੋਈ ਗੱਡੀ ਮਿਲੀ ਸੀ ਉੱਥੋਂ ਤੋਂ ਲੈ ਕੇ ਜਿੱਥੇ ਲਾਸ਼ਾਂ ਮਿਲੀਆਂ ਉੱਥੋਂ ਤੱਕ ਅੱਠ ਕਿਲੋਮੀਟਰ ਦੇ ਦਾਇਰੇ ਵਿੱਚ ਜਾਂਚ ਕੀਤੀ ਗਈ।