ਨਵੀਂ ਦਿੱਲੀ, 11 ਅਗਸਤ, (ਪੋਸਟ ਬਿਊਰੋ)- ਇਸ ਵਕਤ ਭਾਰਤ ਦੇ ਕਈ ਰਾਜਾਂ ਵਿੱਚ ਮੀਂਹ ਅਤੇ ਹੜ੍ਹ ਆਉਣ ਨਾਲ ਤਰਥੱਲੀ ਮੱਚੀ ਪਈ ਹੈ। ਕਰਨਾਟਕ ਵਿਚ ਮੀਂਹ ਨਾਲ ਸਬੰਧਤ ਘਟਨਾਵਾਂ ਵਿਚ ਚਾਰ ਹੋਰ ਲੋਕਾਂ ਦੀ ਮੌਤ ਨਾਲ ਮ੍ਰਿਤਕਾਂ ਦੀ ਗਿਣਤੀ 31 ਹੋ ਗਈ ਹੈ ਤੇ ਰਾਜ ਵਿਚ ਹੜ੍ਹਾਂ ਦੇ ਕਾਰਨ ਹਾਲਤ ਗੰਭੀਰ ਬਣੀ ਹੋਈ ਹੈ। ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਹਾਲੇ ਓਥੇ ਹੀ ਹਨ ਤੇ ਉਹ ਮੁੱਖ ਮੰਤਰੀ ਬੀ ਐਸ ਯੇਦੀਯੁਰੱਪਾ ਦੇ ਨਾਲ ਰਹਿਣਗੇ।
ਇਸ ਸੰਬੰਧ ਵਿੱਚਦੱਸਿਆ ਗਿਆ ਹੈ ਕਿ 3.14 ਲੱਖ ਹੜ੍ਹ ਪ੍ਰਭਾਵਤ ਲੋਕਾਂ ਨੂੰ ਦੂਜੀਆਂ ਥਾਵਾਂ ਉੱਤੇ ਲਿਜਾਇਆ ਗਿਆ ਹੈ ਅਤੇ ਉਨ੍ਹਾਂ ਵਿਚੋਂ 2.18 ਲੋੱਖ ਲੋਕ 924 ਰਾਹਤ ਕੈਂਪਾਂ ਵਿਚ ਰੱਖੇ ਗਏ ਹਨ। ਇਸ ਰਾਜ ਦੀ ਸਰਕਾਰ ਨੇ ਬੀਤੇ ਸਨਿਚਰਵਾਰ ਨੂੰ 17 ਜ਼ਿਲ੍ਹਿਆਂ ਦੀਆਂ 80 ਤਹਿਸੀਲਾਂ ਨੂੰ ਹੜ੍ਹ ਪ੍ਰਭਾਵਤ ਐਲਾਨਿਆ ਤੇ ਕਿਹਾ ਸੀ ਕਿ ਇਨ੍ਹਾਂ ਥਾਵਾਂ ਉੱਤੇ ਰਾਹਤ ਅਤੇ ਬਚਾਅ ਮੁਹਿੰਮ ਵਲ ਵੱਧ ਧਿਆਨ ਦਿਤਾ ਜਾਵੇਗਾ।
ਕੇਰਲਾ ਵਿਚ ਵੀ ਮੀਂਹ ਦਾ ਕਹਿਰ ਜਾਰੀ ਹੈ ਤੇ ਮ੍ਰਿਤਕਾਂ ਦੀ ਗਿਣਤੀ 60 ਹੋ ਗਈ ਹੈ। ਅੱਜ ਐਤਵਾਰ ਕੋਝੀਕੋਡ ਅਤੇ ਅਲਪੁਝਾ ਜ਼ਿਲ੍ਹੇ ਤੋਂ ਇਕ ਇਕ ਲਾਸ਼ ਹੋਰ ਮਿਲੀ ਹੈ, ਜਿਥੇ ਪਿਛਲੇ ਹਫ਼ਤੇ ਤੋਂਜ਼ੋਰਦਾਰ ਮੀਂਹ ਪੈ ਰਿਹਾ ਹੈ। ਮੁੱਖ ਮੰਤਰੀ ਪਿਨਰਾਈ ਵਿਜਯਨ ਨੇ ਐਤਵਾਰ ਸਵੇਰੇ ਸੀਨੀਅਰ ਅਫਸਰਾਂ ਨਾਲ ਬੈਠਕ ਕੀਤੀ ਅਤੇ ਹੜ੍ਹਾਂ ਵਾਲੇ ਹਾਲਾਤ ਦਾ ਜਾਇਜ਼ਾ ਲਿਆ ਹੈ।ਦਖਣੀ ਰਾਜ ਕੇਰਲਾ ਦੇ14 ਜ਼ਿਲ੍ਹਿਆਂ ਵਿਚ ਕਈ ਥਾਈਂ ਹੜ੍ਹ ਆ ਜਾਣ ਕਾਰਨ 1318 ਰਾਹਤ ਕੈਂਪਾਂ ਵਿਚ 1.65 ਤੋਂ ਵੱਧ ਲੋਕਾਂ ਨੇ ਦੂਸਰੇ ਥਾਂਈਂ ਪਨਾਹ ਲਈ ਹੈ।
ਭਾਰਤ ਦੇ ਕਈ ਹੋਰ ਰਾਜਾਂ ਵਿੱਚ ਵੀ ਹੜ੍ਹਾਂ ਦੇ ਕਾਰਨ ਸਥਿਤੀ ਗੰਭੀਰ ਹੋਈ ਪਈ ਹੈ ਤੇ ਰਾਜ ਅਤੇ ਕੇਂਦਰ ਦੀਆਂ ਸਰਕਾਰਾਂ ਆਮ ਲੋਕਾਂ ਦੀਆਂ ਮੁਸ਼ਕਲਾਂ ਘੱਟ ਕਰਨ ਦੇ ਯਤਨ ਕਰ ਰਹੀਆਂ ਹਨ।