ਮਾਸਕੋ, 11 ਅਗਸਤ (ਪੋਸਟ ਬਿਊਰੋ)- ਰੂਸ ਦੇ ਨਿਊਨੋਸਕਾ ਵਿੱਚ ਇੱਕ ਰਾਕੇਟ ਦੀ ਪਰਖ ਦੌਰਾਨ ਹੋਏ ਧਮਾਕੇ ਵਿੱਚ ਪੰਜ ਐਟਮੀ ਵਿਗਿਆਨਕਾਂ ਦੀ ਮੌਤ ਹੋ ਗਈ। ਇਸ ਧਮਾਕੇ ਨਾਲ ਘੱਟ ਤੋਂ ਘੱਟ ਨੌਂ ਲੋਕ ਜ਼ਖਮੀ ਹੋਏ ਦੱਸੇ ਜਾ ਰਹੇ ਹਨ। ਮੀਡੀਆ ਵਿੱਚ ਆਈਆਂ ਖਬਰਾਂ ਮੁਤਾਬਕ ਇਹ ਹਾਦਸਾ ਪਰਸੋਂ ਹੋਇਆ ਹੈ।
ਰੱਖਿਆ ਮੰਤਰਾਲੇ ਨੇ ਬਿਆਨ ਜਾਰੀ ਕਰ ਕੇ ਦੱਸਿਆ ਕਿ ਧਮਾਕੇ ਪਿੱਛੋਂ ਘਟਨਾ ਸਥਾਨ 'ਤੇ ਰੇਡੀਏਸ਼ਨ ਫੈਲਣ ਦੀ ਖਬਰ ਹੈ। ਇੱਕ ਰਿਪੋਰਟ ਮੁਤਾਬਕ ਮੈਡੀਕਲ ਟੀਮ ਨੇ ਕੈਮੀਕਲ ਅਤੇ ਨਿਊਕਲੀਅਰ ਵਿਰੋਧੀ ਸੂਟ ਪਹਿਨ ਕੇ ਜ਼ਖਮੀਆਂ ਨੂੰ ਪ੍ਰੀਖਣ ਸਥਾਨ ਤੋਂ ਬਾਹਰ ਕੱਢ ਲਿਆ ਹੈ। ਰੂਸ ਦੀ ਐਟਮੀ ਨਿਊਕਲੀਅਰ ਏਜੰਸੀ ਰੋਸਾਟਾਮ ਅਨੁਸਾਰ ਇਹ ਹਾਦਸਾ ਰਾਕੇਟ ਦੇ ਤਰਲ ਪ੍ਰੋਂਪਲੈਂਟ ਇੰਜਣ ਦੀ ਪਰਖ ਦੌਰਾਨ ਹੋਇਆ। ਵਿਗਿਆਨਕ ਆਈਸੋਟੋਪ ਨਾਲ ਸਿਸਟਮ ਨੂੰ ਚਲਾਉਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਦੱਸਿਆ ਗਿਆ ਹੈ ਕਿ ਹਾਦਸੇ ਨੂੰ ਵਾਪਰੇ ਦੋ ਦਿਨ ਹੋ ਚੁੱਕੇ ਹਨ, ਪਰ ਸਥਿਤੀ ਹਾਲੇ ਵੀ ਆਮ ਨਹੀਂ ਹੋਈ ਹੈ। ਪ੍ਰੀਖਣ ਸਥਾਨ ਦੇ ਕੋਲ ਵੱਸੇ ਹੋਏ ਆਰਖਨਗੇਲਸਕ ਤੇ ਸੇਵੇਰੋਦਵਿੰਸਕ ਸ਼ਹਿਰ ਦੇ ਲੋਕਾਂ ਵਿੱਚ ਰੇਡੀਏਸ਼ਨ ਦੇ ਕਾਰਨ ਡਰ ਦਾ ਮਾਹੌਲ ਹੈ। ਉਹ ਆਪਣੀ ਸੁਰੱਖਿਆ ਅਤੇ ਸਿਹਤ ਲਈ ਚਿੰਤਤ ਦੱਸੇ ਜਾ ਰਹੇ ਹਨ। ਵਰਨਣ ਯੋਗ ਹੈ ਕਿ ਇੱਕ ਹਫਤੇ ਵਿੱਚ ਇਹ ਦੂਸਰਾ ਹਾਦਸਾ ਹੈ। ਇਸ ਤੋਂ ਪਹਿਲਾਂ ਸਾਇਬੇਰੀਆ ਵਿੱਚ ਹਥਿਆਰਾਂ ਦੇ ਗੋਦਾਮ ਨੂੰ ਸੋਮਵਾਰ ਨੂੰ ਅੱਗ ਲੱਗ ਗਈ ਸੀ, ਜਿਸ ਦੇ ਬਾਅਦ ਹੋਏ ਧਮਾਕੇ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਸੀ।