ਬੀਜਿੰਗ, 11 ਅਗਸਤ (ਪੋਸਟ ਬਿਊਰੋ)- ਪੂਰਬੀ ਚੀਨ ਵਿੱਚ ਤੂਫਾਨ ਲੇਕਿਮਾ ਨੇ ਭਾਰੀ ਤਬਾਹੀ ਮਚਾਈ ਹੈ। ਇਸ ਨਾਲ ਕਈ ਥਾਈਂ ਹੋਏ ਜ਼ਮੀਨੀ ਖਿਸਕਾਅ ਨਾਲ 18 ਲੋਕਾਂ ਦੀ ਮੌਤ ਹੋ ਗਈ ਤੇ 14 ਲਾਪਤਾ ਹਨ।
ਪਤਾ ਲੱਗਾ ਹੈ ਕਿ ਲੇਕਿਮਾ ਕੱਲ੍ਹ ਸਵੇਰੇ ਝੇਜਿਆਂਗ ਸੂਬੇ ਦੇ ਤੱਟ ਨਾਲ ਟਕਰਾਇਆ ਸੀ। ਉਸ ਸਮੇਂ ਹਵਾਵਾਂ 187 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਚੱਲ ਰਹੀਆਂ ਸਨ। ਤੂਫਾਨ ਦੀ ਸ਼ੰਕਾ ਕਾਰਨ ਚੀਨ ਵਿੱਚ ਸ਼ੁੱਕਰਵਾਰ ਹੀ ਰੈੱਡ ਅਲਰਟ ਜਾਰੀ ਕਰ ਦਿੱਤਾ ਗਿਆ ਸੀ। ਫਿਰ ਵੀ ਤੂਫਾਨ ਤੇ ਭਾਰੀ ਬਾਰਿਸ਼ ਕਾਰਨ ਪੂਰਬੀ ਚੀਨ 'ਚ ਆਵਾਜਾਈ ਠੱਪ ਹੋ ਗਈ। ਸ਼ਾਨਦੋਂਗ ਸੂਬੇ ਦੇ ਜਿਨਾਨ ਸ਼ਹਿਰ ਵਿੱਚ ਸੋਮਵਾਰ ਤੱਕ 200 ਟਰੇਨਾਂ ਰੱਦ ਰਹਿਣਗੀਆਂ। ਸ਼ੰਘਾਈ ਦਾ ਡਿਜ਼ਨੀਲੈਂਡ ਵੀ ਬੰਦ ਕਰ ਦਿੱਤਾ ਗਿਆ ਹੈ। ਇਸ ਸ਼ਹਿਰ ਦੇ ਢਾਈ ਲੱਖ ਅਤੇ ਝੇਜਿਆਂਗ ਸੂਬੇ ਵਿੱਚੋਂ ਅੱਠ ਲੱਖ ਲੋਕਾਂ ਨੂੰ ਸੁਰੱਖਿਅਤ ਸਥਾਨ ਉੱਤੇ ਪਹੰਚਾਇਆ ਗਿਆ ਹੈ। ਤੱਟੀ ਸ਼ਹਿਰ ਵੇਂਝੂ ਵਿੱਚ ਲਗਾਤਾਰ ਤਿੰਨ ਘੰਟਿਆਂ ਤੱਕ ਹੋਈ ਭਾਰੀ ਬਾਰਿਸ਼ ਕਾਰਨ ਇੱਕ ਡੈਮ ਦੇ ਢਹਿਣ ਦੀ ਖਬਰ ਹੈ। ਝੇਜਿਆਂਗ 'ਚ ਦੋ ਲੱਖ ਤੋਂ ਜ਼ਿਆਦਾ ਘਰਾਂ ਵਿੱਚ ਬਿਜਲੀ ਨਹੀਂ ਹੈ।