ਨਵੀਂ ਦਿੱਲੀ, 11 ਅਗਸਤ (ਪੋਸਟ ਬਿਊਰੋ)- ਭਾਰਤ ਦੇ ਮੁਸਲਿਮ ਸਮਾਜ ਵਿੱਚ ਤੀਹਰੇ ਤਲਾਕ ਦੀ ਬੁਰਾਈ ਨੂੁੰ ਕਾਨੂੰਨੀ ਆਧਾਰ ਉੱਤੇ ਨਾਜਾਇਜ਼ ਕਰਾਰ ਦੇਣ ਬਾਅਦ ਕੌਮੀ ਰਾਜਧਾਨੀ ਦਿੱਲੀ ਵਿੱਚ ਪਹਿਲਾ ਕੇਸ ਪਤਾ ਲੱਗਾ ਹੈ। ਪੁਲਸ ਨੇ ਇੱਕ ਅਜਿਹੇ ਪਤੀ ਨੂੰ ਗ੍ਰਿਫਤਾਰ ਕਰ ਲਿਆ ਹੈ ਜਿਸ ਨੇ ਆਪਣੀ ਪਤਨੀ ਨੂੰ ਤਿੰਨ ਵਾਰ ਤਲਾਕ ਤਲਾਕ ਤਲਾਕ ਬੋਲ ਕੇ ਖਹਿੜਾ ਛੁਡਾਉਣ ਦੀ ਕੋਸ਼ਿਸ਼ ਕੀਤੀ ਅਤੇ ਉਸ ਨੂੰ ਘਰੋਂ ਕੱਢ ਦਿੱਤਾ ਸੀ।
ਪੀੜਤ ਔਰਤ ਨੇ ਦਿੱਲੀ ਦੇ ਵਾੜਾ ਹਿੰਦੂ ਰਾਓ ਪੁਲਸ ਸਟੇਸ਼ਨ ਵਿੱਚ ਸਿ਼ਕਾਇਤ ਦਰਜ ਕਰਵਾਈ ਤਾਂ ਸ਼ੁੱਕਰਵਾਰ ਪਤੀ ਨੂੰ ਪੁਲਸ ਨੇ ਗ੍ਰਿਫਤਾਰ ਕਰ ਲਿਆ ਅਤੇ ਫਿਰ ਅਦਾਲਤ ਨੇ ਜ਼ਮਾਨਤ 'ਤੇ ਛੱਡ ਦਿੱਤਾ ਹੈ। ਪੁਲਸ ਨੇ ਪਤੀ ਅਤੀਕ ਸ਼ਮੀਮ ਦੇ ਵਿਰੁੱਧ ਮੁਸਲਿਮ ਔਰਤਾਂ (ਵਿਆਹ ਅਧਿਕਾਰਾਂ ਦੀ ਰੱਖਿਆ) ਕਾਨੂੰਨ 2019 ਦਾ ਕੇਸ ਦਰਜ ਕੀਤਾ ਹੈ। ਇਸ ਬਾਰੇ ਉਤਰੀ ਦਿੱਲੀ ਦੇ ਡੀ ਸੀ ਪੀ ਨੂਪੁਰ ਪ੍ਰਸਾਦ ਨੇ ਦੱਸਿਆ ਕਿ ਦੋਸ਼ੀ ਅਤੀਕ ਸ਼ਮੀਮ ਨੇ ਪੀੜਤ ਔਰਤ ਨਾਲ 2011 ਵਿੱਚ ਵਿਆਹ ਕਰਵਾਇਆ ਸੀ ਤੇ 30 ਜੂਨ 2019 ਨੂੰ ਉਸ ਨੂੰ ਤੀਹਰਾ ਤਲਾਕ ਦੇ ਦਿੱਤਾ। ਉਹ ਆਜ਼ਾਦ ਮਾਰਕੀਟ ਵਿਖੇ ਰਹਿੰਦਾ ਹੈ ਤੇ ਉਸ ਦਾ ਇੱਕ ਛੇ ਸਾਲਾ ਪੁੱਤਰ ਹੈ। ਔਰਤ ਦੇ ਅਨੁਸਾਰ ਸਹੁਰਾ ਪਰਵਾਰ ਉਸ ਨੂੰ ਦਾਜ ਲਈ ਤੰਗ ਕਰਦਾ ਸੀ ਤੇ ਤੀਹ ਜੂਨ 2019 ਨੂੰ ਘਰੋਂ ਕੱਢਣ ਵੇਲੇ ਉਸ ਦੀ ਮੇਹਰ ਵੀ ਨਹੀਂ ਦਿੱਤੀ ਗਈ। ਦੋ ਦਿਨ ਬਾਅਦ ਵਟਸਐਪ ਉਪਰ ਪਤੀ ਨੇ ਫਤਵਾ ਵੀ ਭੇਜ ਦਿੱਤਾ। ਦੋਸ਼ੀ ਨੇ ਪਤਨੀ ਨੂੰ ਘਰੋਂ ਸਾਮਾਨ ਤੱਕ ਨਹੀਂ ਚੁੱਕਣ ਦਿੱਤਾ ਤੇ ਕੱਢ ਦਿੱਤਾ।