ਅਬੋਹਰ, 11 ਅਗਸਤ (ਪੋਸਟ ਬਿਊਰੋ)- ਦਲਿਤ ਨੌਜਵਾਨ ਭੀਮ ਟਾਂਕ ਦੀ ਕਤਲ ਕੇਸ 'ਚ ਉਮਰ ਕੈਦ ਕੱਟ ਰਹੇ ਸ਼ਰਾਬ ਵਪਾਰੀ ਅਤੇ ਅਕਾਲੀ ਦਲ ਦੇ ਸਾਬਕਾ ਹਲਕਾ ਇੰਚਾਰਜ ਸ਼ਿਵ ਲਾਲ ਡੋਡਾ ਤੇ ਉਸ ਦੇ ਪਰਵਾਰਕ ਜੀਆਂ ਦੇ ਵਿਦੇਸ਼ ਜਾਣ ਉਤੇ ਰੋਕ ਲਾਉਣ ਲਈ ਡੈਬਟਸ ਰਿਕਵਰੀ ਟਿ੍ਰਬਿਊਨਲ ਚੰਡੀਗੜ੍ਹ ਨੇ ਚੰਡੀਗੜ੍ਹ, ਦਿੱਲੀ ਅਤੇ ਜਲੰਧਰ ਵਿਚਲੇ ਪਾਸਪੋਰਟ ਅਧਿਕਾਰੀਆਂ ਨੂੰ ਇਨ੍ਹਾਂ ਦੇ ਪਾਸਪੋਰਟ ਜ਼ਬਤ ਕਰਨ ਦੇ ਹੁਕਮ ਜਾਰੀ ਕੀਤੇ ਹਨ।
ਵਰਨਣ ਯੋਗ ਹੈ ਕਿ ਪੰਜਾਬ ਨੈਸ਼ਨਲ ਬੈਂਕ ਨੇ ਟਿ੍ਰਬਿਊਨਲ ਕੋਲ ਦਾਇਰ ਕੀਤੀ ਗਈ ਅਪੀਲ 'ਚ ਕਿਹਾ ਸੀ ਕਿ ਇਨ੍ਹਾਂ ਲੋਕਾਂ ਵਿਰੁੱਧ 17 ਕਰੋੜ 58 ਲੱਖ ਰੁਪਏ ਦਾ ਕਰਜ਼ਾ ਵਸੂਲੀ ਬਕਾਇਆ ਹੈ ਤੇ ਇਨ੍ਹਾਂ ਦੀ ਜਾਇਦਾਦ ਇੰਨੀ ਰਾਸ਼ੀ ਵਸੂਲ ਕਰਨ ਲਈ ਕਾਫੀ ਨਹੀਂ। ਸ਼ੱਕ ਹੈ ਕਿ ਵਸੂਲੀ ਨੂੰ ਪ੍ਰਭਾਵਤ ਕਰਨ ਲਈ ਸਾਰੇ ਵਿਦੇਸ਼ ਨਾ ਚਲੇ ਜਾਣ। ਅਪੀਲ 'ਚ ਜਿਨ੍ਹਾਂ ਲੋਕਾਂ ਨੂੰ ਵਸੂਲੀ ਲਈ ਕਿਹਾ ਗਿਆ, ਉਨ੍ਹਾਂ 'ਚ ਗਗਨ ਵਾਈਨ ਟਰੇਡਰਜ਼ ਨਵੀਂ ਦਿੱਲੀ, ਸ਼ਿਵ ਲਾਲ ਡੋਡਾ, ਉਸ ਦੇ ਭਰਾ ਜੋਗਿੰਦਰ ਪਾਲ ਡੋਡਾ ਅਤੇ ਅਵਿਨਾਸ਼ ਡੋਡਾ, ਜੋਗਿੰਦਰ ਦਾ ਬੇਟਾ ਸਨਲ ਡੋਡਾ, ਸ਼ਿਵ ਲਾਲ ਡੋਡਾ ਦੀ ਪਤਨੀ ਸੁਨੀਤਾ ਡੋਡਾ, ਪੁੱਤਰ ਗਗਨ ਡੋਡਾ, ਨੂੰਹ ਸੁਹਾਨੀ ਡੋਡਾ, ਗਾਰੰਟਰ ਰਾਜਿੰਦਰ ਅਰੋੜਾ ਵਾਸੀ ਨਿਊ ਸੂਰਜ ਨਗਰੀ, ਉਸ ਦੀ ਪਤਨੀ ਵੀਨਾ ਤੇ ਡੋਡਾ ਪਰਵਾਰ ਦੀ ਫਾਜ਼ਿਲਕਾ ਰੋਡ ਦੀ ਫਰਮ ਗਗਨ ਵਾਸੂ ਸਿਨੇ ਲਿੰਕਸ ਪ੍ਰਾਈਵੇਟ ਲਿਮਟਿਡ ਸ਼ਾਮਲ ਹਨ।
ਮਿਲੀ ਜਾਣਕਾਰੀ ਅਨੁਸਾਰ ਪੰਜਾਬ ਨੈਸ਼ਨਲ ਬੈਂਕ ਦੀ ਗਊਸ਼ਾਲਾ ਰੋਡ ਅਬੋਹਰ ਬ੍ਰਾਂਚ ਦੀ ਅਪੀਲ ਉਤੇ ਕੁੱਲ 55 ਕਰੋੜ ਰੁਪਏ ਵਸੂਲੀ 'ਚ ਡੋਡਾ ਪਰਵਾਰ ਅਤੇ ਉਸ ਦੀ ਗਾਰੰਟੀ ਦੇਣ ਲਈ ਕੁਝ ਅਬੋਹਰ ਵਾਸੀਆਂ ਦੀਆਂ ਜਾਇਦਾਦਾਂ ਵੀ ਜ਼ਬਤ ਕੀਤੀਆਂ ਗਈਆਂ ਸਨ। ਟਿ੍ਰਬਿਊਨਲ ਨੇ ਬੈਂਕ ਅਧਿਕਾਰੀਆਂ ਨੂੰ ਕਿਹਾ ਹੈ ਕਿ ਤੀਹ ਦਿਨਾਂ ਦੇ ਅੰਦਰ ਸਾਰੇ ਨਾਮਜ਼ਦ ਵਿਅਕਤੀਆਂ ਨੂੰ ਸੰਮਨ ਭੇਜਣ ਅਤੇ ਲੋਕਲ ਕਮਿਸ਼ਨਰ ਵਜੋਂ ਰੋਹਿਤ ਕੌਸ਼ਿਕ ਐਡਵੋਕੇਟ ਦੀ ਨਿਯੁਕਤੀ ਕਰ ਕੇ ਸਾਰੀਆਂ ਜਾਇਦਾਦਾਂ ਦਾ ਮੌਕੇ 'ਤੇ ਨਿਰੀਖਣ ਕੀਤਾ ਜਾਵੇ।