45 ਮਿਲੀਅਨ ਡਾਲਰ ਦੇ ਨਸ਼ੀਲੇ ਪਦਾਰਥ ਤੇ ਨਕਦੀ ਬਰਾਮਦ
ਟੋਰਾਂਟੋ, 9 ਅਗਸਤ (ਪੋਸਟ ਬਿਊਰੋ) : ਵੱਡੀ ਪੱਧਰ ਉੱਤੇ ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਕੀਤੀਆਂ ਗਈਆਂ ਦੋ ਜਾਂਚਾਂ ਤੋਂ ਬਾਅਦ ਪੁਲਿਸ ਨੂੰ ਗੈਰਕਾਨੂੰਨੀ ਨਸਿ਼ਆਂ, ਹਥਿਆਰਾਂ, ਗੱਡੀਆਂ ਤੇ ਨਕਦੀ ਦਾ ਜ਼ਖ਼ੀਰਾ ਪ੍ਰਾਪਤ ਹੋਇਆ ਹੈ। ਇਸ ਦੌਰਾਨ ਪੁਲਿਸ 60 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰਨ ਵਿੱਚ ਵੀ ਕਾਮਯਾਬ ਹੋਈ ਹੈ।
ਪ੍ਰੋਜੈਕਟ ਜ਼਼ੈੱਨ ਤੇ ਪ੍ਰੋਜੈਕਟ ਮੂਨ ਤਹਿਤ ਗੈਰਕਾਨੂੰਨੀ ਨਸਿ਼ਆਂ ਦੇ ਉਤਪਾਦਨ ਤੇ ਉਨ੍ਹਾਂ ਦੀ ਸਮਗਲਿੰਗ ਉੱਤੇ ਧਿਆਨ ਕੇਂਦਰਿਤ ਕਰਕੇ ਪੁਲਿਸ ਨੇ ਸੰਗਠਿਤ ਜੁਰਮ ਕਰਨ ਵਾਲੇ ਗਰੁੱਪਜ਼ ਨੂੰ ਯੌਰਕ ਰੀਜਨ ਤੇ ਜੀਟੀਏ ਦੇ ਹੋਰਨਾਂ ਹਿੱਸਿਆਂ ਤੋਂ ਗ੍ਰਿਫਤਾਰ ਕੀਤਾ। ਇੱਕ ਨਿਊਜ਼ ਕਾਨਫਰੰਸ ਵਿੱਚ ਗੱਲ ਕਰਦਿਆਂ ਅਰੋਰਾ ਵਿੱਚ ਯੌਰਕ ਰੀਜਨਲ ਪੁਲਿਸ ਦੇ ਹੈੱਡਕੁਆਰਟਰ ਵਿੱਚ ਸੁਪਰਡੈਂਟ ਮਾਈਕ ਸਲੈਕ ਨੇ ਆਖਿਆ ਕਿ ਸਥਾਨਕ ਅਧਿਕਾਰੀਆਂ ਨੇ ਟੋਰਾਂਟੋ ਪੁਲਿਸ ਸਰਵਿਸ, ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਤੇ ਕੈਨੇਡਾ ਬਾਰਡਰ ਸਰਵਿਸਿਜ਼ ਨਾਲ ਤਾਲਮੇਲ ਕਰਕੇ ਇਨ੍ਹਾਂ ਜਾਂਚਾਂ ਨੂੰ ਸਿਰੇ ਚੜ੍ਹਾਇਆ।
ਉਨ੍ਹਾਂ ਆਖਿਆ ਕਿ ਅਸੀਂ ਨੋਟ ਕੀਤਾ ਕਿ ਕ੍ਰਿਮੀਨਲ ਗਰੁੱਪ ਆਪਣੇ ਹੋਰਨਾਂ ਭਾਈਵਾਲਾਂ ਨਾਲ ਰਲ ਕੇ ਇਸ ਤਰ੍ਹਾਂ ਦੇ ਕਾਰੋਬਾਰਾਂ ਨੂੰ ਚਲਾ ਰਹੇ ਹਨ। ਅਸੀਂ ਵੀ ਉਨ੍ਹਾਂ ਦੀ ਤਰਜ਼ ਉੱਤੇ ਕਾਨੂੰਨ ਲਾਗੂ ਕਰਵਾਉਣ ਵਾਲੇ ਆਪਣੇ ਭਾਈਵਾਲਾਂ ਨਾਲ ਰਲ ਕੇ ਇਨ੍ਹਾਂ ਗਿਰੋਹਾਂ ਨੂੰ ਨਕਾਰਾ ਕਰਨ ਲਈ ਇਹ ਜਾਂਚ ਸ਼ੁਰੂ ਕੀਤੀਆਂ। ਦੋਵਾਂ ਜਾਂਚਾਂ ਤਹਿਤ ਗੈਰਕਾਨੂੰਨੀ ਹਥਿਆਰ ਤੇ ਨਸਿ਼ਆਂ ਦਾ ਉਤਪਾਦਨ ਕਰਨ ਵਾਲੀਆਂ ਮੁਜਰਮਾਨਾਂ ਸੰਸਥਾਵਾਂ ਉੱਤੇ ਇੱਕਠਿਆਂ ਕਾਰਵਾਈ ਕਰਦਿਆਂ ਹੋਇਆਂ ਇਨ੍ਹਾਂ ਸੰਸਥਾਵਾਂ ਨੂੰ ਨਕਾਰਾ ਕੀਤਾ ਗਿਆ।