ਨਵੀਂ ਦਿੱਲੀ, 8 ਅਗਸਤ, (ਪੋਸਟ ਬਿਊਰੋ)- ਭਾਰਤ ਦੇ 13ਵੇਂ ਰਾਸ਼ਟਰਪਤੀ ਪ੍ਰਣਬ ਮੁਖ਼ਰਜੀ ਨੂੰ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਨੇ ਅੱਜਵੀਰਵਾਰ ਨੂੰਭਾਰਤ ਦੇ ਸਰਬ ਉੱਚ ਨਾਗਰਿਕ ਸਨਮਾਨ‘ਭਾਰਤ ਰਤਨ’ ਦੇ ਨਾਲ ਸਨਮਾਨਤ ਕੀਤਾ ਹੈ। ਇਸ ਮੌਕੇ ਇਹੋ ਸਨਮਾਨਸੋਸ਼ਲ ਵਰਕਰ ਨਾਨਾਜੀ ਦੇਸ਼ਮੁਖ ਅਤੇ ਅਸਮ ਦੇ ਪ੍ਰਸਿੱਧ ਗਾਇਕ ਭੂਪੇਨ ਹਜਾਰਿਕਾ ਨੂੰ ਮਰਨ ਉਪਰੰਤ ਦਿੱਤਾ ਗਿਆ। ਤਿੰਨਾਂ ਨੂੰ ਜਨਵਰੀ 2019 ਵਿਚ ਇਹ ਵੱਡਾ ਸਨਮਾਨ ਦੇਣ ਦਾ ਐਲਾਨ ਹੋਇਆ ਸੀ।ਸਵਰਗੀ ਗਾਇਕ ਭੂਪੇਨ ਹਜਾਰਿਕਾ ਬਾਰੇ ਉਨ੍ਹਾਂ ਦੇ ਪੁੱਤਰ ਤੇਜ ਹਜਾਰਿਕਾ ਤੇ ਨਾਨਾਜੀ ਦੇਸ਼ਮੁਖ ਦੇ ਲਈ ਦੀਨ ਦਿਆਲ ਰਿਸਰਚ ਇੰਸਟੀਚਿਊਟ ਦੇ ਚੇਅਰਮੈਨ ਵੀਰੇਂਦਰਜੀਤ ਸਿੰਘ ਨੇ ਭਾਰਤ ਰਤਨ ਸਨਮਾਨ ਹਾਸਲ ਕੀਤਾ ਹੈ।
ਸਾਬਕਾ ਰਾਸ਼ਟਰਪਤੀ ਪ੍ਰਣਬ ਮੁਖ਼ਰਜੀ ਦਾ ਰਾਜਸੀ ਜੀਵਨ ਲਗਪਗ ਪੰਜ ਦਹਾਕੇ ਰਿਹਾ ਅਤੇ ਉਹ ਕਾਂਗਰਸ ਨਾਲ ਜੁੜੇ ਰਹੇ। ਇਸ ਦੌਰਾਨ ਉਹ ਕਾਂਗਰਸ ਅਗਵਾਈ ਵਾਲੀਆਂ ਕਈ ਸਰਕਾਰਾਂ ਵਿਚ ਵੱਖ-ਵੱਖ ਅਹੁਦਿਆਂ ਉੱਤੇ ਰਹੇ ਅਤੇ ਫਿਰ 2012-17 ਤਕ ਉਹ ਰਾਸ਼ਟਰਪਤੀ ਰਹੇ। ਇਸ ਤੋਂ ਪਹਿਲਾਂ 2009 ਤੋਂ 2012 ਤਕ ਕੇਂਦਰੀ ਵਿੱਤ ਮੰਤਰੀ ਦੇ ਰੂਪ ਵਿਚ ਵੀ ਉਨ੍ਹਾਂ ਜਿ਼ਮੇਵਾਰੀ ਨਿਭਾਈ ਸੀ।ਪ੍ਰਣਬ ਮੁਖ਼ਰਜੀ ਦਾ ਜਨਮ ਪੱਛਮੀ ਬੰਗਾਲ ਦੇ ਵੀਰਭੂਮ ਜ਼ਿਲ੍ਹੇ ਦੇ ਮਿਰਾਤੀ ਪਿੰਡ ਵਿਚ 11 ਦਸੰਬਰ 1935 ਨੂੰ ਇਕ ਬ੍ਰਾਹਮਣ ਪਰਿਵਾਰ ਵਿਚ ਹੋਇਆ। ਉਨ੍ਹਾਂ ਨੇ ਕਲਕੱਤਾ ਯੂਨੀਵਰਸਿਟੀ ਤੋਂ ਇਤਿਹਾਸ ਤੇ ਪੋਲੀਟੀਕਲ ਸਾਇੰਸ ਦੀ ਐੱਮ ਏ ਦੇ ਨਾਲ ਕਾਨੂੰਨ ਡਿਗਰੀ ਵੀ ਲਈ ਸੀ।
ਨਾਨਾਜੀ ਦੇਸ਼ਮੁਖ ਭਾਰਤੀ ਜਨਸੰਘ ਨਾਲ ਜੁੜੇ ਰਹੇ ਸਨ ਤੇ 1977 ਵਿਚ ਜਦੋਂ ਜਨਤਾ ਪਾਰਟੀ ਸਰਕਾਰ ਬਣੀ ਤਾਂ ਉਨ੍ਹਾਂ ਨੇ ਮੰਤਰੀ ਬਣਨ ਤੋਂ ਨਾਂਹ ਕਰ ਦਿੱਤੀ ਸੀ। ਉਹ ਜੀਵਨ ਭਰ ਦੀਨਦਿਆਲ ਖੋਜ ਸੰਸਥਾਨ ਲਈ ਕੰਮ ਕਰਦੇ ਰਹੇ ਸਨ। ਅਟਲ ਬਿਹਾਰੀ ਵਾਜਪਾਈ ਸਰਕਾਰ ਨੇ ਉਨ੍ਹਾਂ ਨੂੰ ਰਾਜ ਸਭਾ ਦਾ ਮੈਂਬਰ ਨਿਯੁਕਤ ਕੀਤਾ ਅਤੇ ਪਦਮ ਵਿਭੂਸ਼ਨ ਨਾਲ ਸਨਮਾਨਤ ਕੀਤਾ ਸੀ।ਭੂਪੇਨ ਹਜਾਰਿਕਾ ਨੂੰ ਉੱਤਰ ਪੂਰਬੀ ਇਲਾਕੇ ਤੇ ਖ਼ਾਸ ਕਰ ਕੇ ਆਸਾਮ ਵਿੱਚ ਕਾਫੀ ਮਾਣ ਮਿਲਦਾ ਹੈ। ਲੋਕਾਂ ਦੇ ਦਿਲਾਂ ਵਿਚ ਉਨ੍ਹਾਂ ਦੇ ਲਈ ਏਨੀਸ਼ਰਧਾ ਹੈ ਕਿ ਆਸਾਮ ਦੀ ਰਾਜਧਾਨੀ ਗੁਹਾਟੀ ਵਿਚ ਉਨ੍ਹਾਂ ਦੀ ਯਾਦ ਵਿਚ ਮੰਦਰ ਵੀ ਹੈ। ਹਜਾਰਿਕਾ ਨੇ ਅਸਾਮੀਆ ਦੇ ਨਾਲ ਹਿੰਦੀ, ਬਾਂਗਲਾ ਸਮੇਤ ਕਈ ਭਾਸ਼ਾਵਾਂ ਵਿਚ ਗਾਣੇ ਗਾਏ ਸਨ।