ਮੁੰਬਈ, 8 ਅਗਸਤ (ਪੋਸਟ ਬਿਊਰੋ)- ਬਕਰੀਦ ਦੇ ਮੌਕੇ ਇਸ ਵਾਰੀ ਮੁੰਬਈ ਦੇ ਘਰਾਂ ਅਤੇ ਸੁਸਾਈਟੀ ਵਿੱਚ ਕੁਰਬਾਨੀ ਕਰਨ ਉੱਤੇ ਰੋਕ ਲਾ ਦਿੱਤੀ ਗਈ ਹੈ। ਬੰਬੇ ਹਾਈ ਕੋਰਟ ਨੇ ਬਕਰੀਦ ਮੌਕੇ ਗੈਰ ਕਾਨੂੰਨੀ ਤਰੀਕੇ ਨਾਲ ਹੋ ਰਹੀ ਕੁਰਬਾਨੀ ਬਾਰੇ ਇੱਕ ਪਟੀਸ਼ਨ ਦੀ ਸੁਣਵਾਈ ਤੋਂ ਬਾਅਦ ਇਹ ਹੁਕਮ ਜਾਰੀ ਕੀਤਾ ਅਤੇ ਕਿਹਾ ਕਿ ਕੇਵਲ ਸਰਕਾਰ ਵੱਲੋਂ ਮਨਜ਼ੂਰ ਕੀਤੇ ਗਏ ਕਤਲਖਾਨਿਆਂ ਵਿੱਚ ਹੀ ਕਿਸੇ ਪਸ਼ੂ ਦੀ ਕੁਰਬਾਨੀ ਕੀਤੀ ਜਾ ਸਕਦੀ ਹੈ।
ਵਰਨਣ ਯੋਗ ਹੈ ਕਿ ਇਸ ਵਾਰ 12 ਅਗਸਤ ਨੂੰ ਬਕਰੀਦ ਮਨਾਈ ਜਾਵੇਗੀ। ਹਾਈ ਕੋਰਟ ਦੇ ਹੁਕਮ ਮੁਤਾਬਕ ਬਕਰੀਦ ਮੌਕੇ ਕੇਵਲ ਸਰਕਾਰ ਦੇ ਮਨਜ਼ੂਰ ਕਤਲਖਾਨਿਆਂ ਵਿੱਚ ਹੀ ਕੁਰਬਾਨੀ ਹੋ ਸਕੇਗੀ। ਮੁੰਬਈ ਸ਼ਹਿਰ ਵਿੱਚ ਮਨਜ਼ੂਰ 58 ਕਤਲਖਾਨੇ ਹਨ, ਜਿੱਥੇ ਕੁਰਬਾਨੀ ਹੋ ਸਕੇਗੀ। ਇਸ ਦੇ ਨਾਲ ਰੇਲਵੇ ਸਟੇਸ਼ਨ, ਬੱਸ ਸਟਾਪ ਜਾਂ ਆਟੋ ਰਿਕਸ਼ਾ ਸਟੈਂਡ ਸਮੇਤ ਸਭ ਜਨਤਕ ਥਾਵਾਂ ਉੱਤੇ ਕੁਰਬਾਨੀ ਉੱਤੇ ਰੋਕ ਲਾਈ ਗਈ ਹੈ। ਧਾਰਮਿਕ ਥਾਵਾਂ ਉੱਤੇ ਕੁਰਬਾਨੀ ਦੇਣ ਵਾਸਤੇ ਵੀ ਹੈਡ ਇੰਸਪੈਕਟਰ ਮਾਰਕੀਟ ਤੋਂ ਆਗਿਆ ਲੈਣੀ ਹੋਵੇਗੀ। ਅਦਾਲਤ ਦੇ ਇਸ ਫ਼ੈਸਲੇ ਨਾਲ ਕਰੀਬ 8 ਹਜਾਰ ਲੋਕਾਂ ਉੱਤੇ ਅਸਰ ਪਵੇਗਾ, ਜਿਨ੍ਹਾਂ ਨੂੰ ਮੁੰਬਈ ਨਗਰ ਪਾਲਿਕਾ (ਬੀ ਐੱਮ ਸੀ) ਨੇ ਕੁਰਬਾਨੀ ਦੀ ਆਗਿਆ ਦਿੱਤੀ ਹੋਈ ਹੈ। ਇਸ ਤੋਂ ਇਲਾਵਾ ਇਸ ਨਾਲ ਜੁੜੇ ਇੱਕ ਹੁਕਮ ਵਿੱਚ ਅਦਾਲਤ ਨੇ ਜਾਨਵਰਾਂ ਨੂੰ ਲਿਆਉਣ, ਲੈ ਜਾਣ ਲਈ ਬਣੇ ਨਿਯਮਾਂ ਦਾ ਠੀਕ ਤਰ੍ਹਾਂ ਪਾਲਣ ਕਰਨ ਲਈ ਬੀ ਐਮ ਸੀ ਅਤੇ ਸਰਕਾਰ ਨੂੰ ਦਿਸ਼ਾ ਨਿਰਦੇਸ਼ ਜਾਰੀ ਕੀਤੇ ਹਨ।
ਇਸ ਦੌਰਾਨ ਦਿੱਲੀ ਵਿੱਚ ਵੀ ਉੱਤਰੀ ਦਿੱਲੀ ਨਗਰ ਨਿਗਮ (ਐਨ ਡੀ ਐਮ ਸੀ) ਨੇ ਹੁਕਮ ਜਾਰੀ ਕਰ ਦਿੱਤਾ ਹੈ ਕਿ ਬਕਰੀਦ ਮੌਕੇ ਕੁਰਬਾਨੀ ਵੇਲੇ ਜਾਨਵਰਾਂ ਦਾ ਖੂਨ ਸਿੱਧੇ ਰੁੜ੍ਹ ਕੇ ਜਮੁਨਾ ਵਿੱਚ ਨਹੀਂ ਪੈਣਾ ਚਾਹੀਦਾ। ਨਗਰ ਨਿਗਮ ਨੇ ਪੰਜ ਅਗਸਤ ਦੇ ਹੁਕਮ ਵਿੱਚ ਕਿਹਾ ਹੈ ਕਿ ਈਦ ਦੇ ਦਿਨ ਪੂਰਬੀ ਦਿੱਲੀ ਨਗਰ ਨਿਗਮ ਹੇਠ ਆਉਂਦਾ ਗਾਜ਼ੀਪੁਰ ਕਮੇਲਾ ਖੁੱਲ੍ਹਾ ਰਹਿੰਦਾ ਹੈ, ਉਸ ਦਿਨ ਬੱਕਰੇ ਅਤੇ ਮੱਝਾਂ ਦੀ ਕੁਰਬਾਨੀ ਦੇਣ ਦੀ ਇੱਛਾ ਰੱਖਣ ਵਾਲੇ ਲੋਕਾਂ ਨੂੰ ਓਥੋਂ ਦੀਆਂ ਸਹੂਲਤਾਂ ਨੂੰ ਵਰਤਣਾ ਚਾਹੀਦਾ ਹੈ। ਇਸ ਹੁਕਮ ਮੁਤਾਬਕ ਬੱਕਰਿਆਂ ਅਤੇ ਮੱਝਾਂ ਦੀ ਆਪਣੇ ਪਰਵਾਰਾਂ ਵਿੱਚ ਕੁਰਬਾਨੀ ਦੇਣ ਦੀ ਇੱਛਾ ਰੱਖਣ ਵਾਲਿਆਂ ਲਈ ਜਰੂਰੀ ਹੈ ਕਿ ਕੁਰਬਾਨ ਕੀਤੇ ਜਾਨਵਰਾਂ ਦੇ ਜੈਵਿਕ ਕੂੜੇ ਨੂੰ ਠੀਕ ਢੰਗ ਨਾਲ ਸੁੱਟਣ। ਐਨ ਡੀ ਐਮ ਸੀ ਦੀ ਪਸ਼ੂ ਹਸਪਤਾਲ ਸੇਵਾ ਦੇ ਡਿਪਟੀ ਡਾਇਰੈਕਟਰ ਵਾਈ ਕੁਮਾਰ ਨੇ ਕਿਹਾ ਕਿ ਹੁਕਮ ਦੀ ਉਲੰਘਣਾ ਕਰਨ ਉੱਤੇ ਪ੍ਰਦੂਸ਼ਣ ਫੈਲਾਉਣ ਦੇ ਕੇਸ ਵਿੱਚ ਨੈਸ਼ਨਲ ਗਰੀਨ ਟ੍ਰਿਬਿਊਨਲ (ਐਨ ਜੀ ਟੀ) ਵੱਲੋਂ ਰੱਖਿਆ ਜੁਰਮਾਨਾ ਲੱਗੇਗਾ। ਉਨ੍ਹਾਂ ਕਿਹਾ ਕਿ ਈਦ ਦਾ ਮੌਕਾ ਛੱਡ ਕੇ ਨਿਜੀ ਸਥਾਨਾਂ ਉੱਤੇ ਜਾਨਵਰਾਂ ਮਾਰਨ ਦੀ ਆਗਿਆ ਨਹੀਂ ਹੋਵੇਗੀ। ਰਾਜਧਾਨੀ ਦੇ ਮੀਟ ਵਿਕਰੇਤਾ ਕੇਵਲ ਪੂਰਬੀ ਦਿੱਲੀ ਨਗਰ ਨਿਗਮ ਦੇ ਬੂਚੜਖਾਨੇ ਵਿੱਚ ਜਾਨਵਰਾਂ ਦੀ ਕੁਰਬਾਨੀ ਦੇ ਸਕਦੇ ਹੈ।