ਕਾਬੁਲ, 8 ਅਗਸਤ (ਪੋਸਟ ਬਿਊਰੋ)- ਅਫਗਾਨਿਸਤਾਨ ਦੀ ਰਾਜਧਾਨੀ ਕਾਬੁਲ 'ਚ ਕੱਲ੍ਹ ਤਾਲਿਬਾਨ ਕੱਟੜਪੰਥੀਆਂ ਵੱਲੋਂ ਕੀਤੇ ਕਾਰ ਬੰਬ ਧਮਾਕੇ ਵਿੱਚ 20 ਲੋਕ ਮਾਰੇ ਗਏ ਤੇ 145 ਹੋਰ ਜ਼ਖਮੀ ਹੋ ਗਏ। ਸੁਰੱਖਿਆ ਸੂਤਰਾਂ ਵੱਲੋਂ 14 ਲੋਕਾਂ ਦੇ ਮਾਰੇ ਜਾਣ ਅਤੇ 100 ਤੋਂ ਵੱਧ ਹੋਰਾਂ ਦੇ ਜ਼ਖਮੀ ਹੋਣ ਦੀ ਪੁਸ਼ਟੀ ਕੀਤੀ ਗਈ ਹੈ।
ਗ੍ਰਹਿ ਮੰਤਰਾਲੇ ਦੇ ਬੁਲਾਰੇ ਨੇ ਦੱਸਿਆ ਕਿ ਸਵੇਰੇ 9 ਵਜੇ ਪੱਛਮੀ ਕਾਬੁਲ ਵਿੱਚ ਪੁਲਸ ਹੈਡਕੁਆਰਟਰ ਦੇ ਬਾਹਰ ਹੋਇਆ ਇਹ ਬੰਬ ਧਮਾਕਾ ਏਨਾ ਜ਼ਬਰਦਸਤ ਸੀ ਕਿ ਨੇੜਲੇ ਇਲਾਕੇ ਦੀ ਮਕਾਨਾਂ ਦੀਆਂ ਬਾਰੀਆਂ ਚੂਰ-ਚੂਰ ਹੋ ਗਈਆਂ ਤੇ ਚੁਫੇਰੇ ਕਾਲੇ ਧੂੰਏ ਦਾ ਬੱਦਲ ਛਾ ਗਿਆ। ਅਫਗਾਨ ਅਧਿਕਾਰੀਆਂ ਨੇ ਦੱਸਿਆ ਕਿ ਮਰਨ ਵਾਲਿਆਂ 'ਚ 10 ਨਾਗਰਿਕ ਤੇ ਚਾਰ ਪੁਲਸ ਅਧਿਕਾਰੀ ਸ਼ਾਮਲ ਹਨ, ਜਦ ਕਿ ਜ਼ਖਮੀ ਹੋਏ 145 ਲੋਕਾਂ 'ਚੋਂ 92 ਆਮ ਨਾਗਰਿਕ ਹਨ। ਇਸ ਹਮਲੇ ਦੀ ਤਾਲਿਬਾਨ ਨੇ ਜ਼ਿੰਮੇਵਾਰੀ ਲੈ ਲਈ ਹੈ। ਅਫਗਾਨਿਸਤਾਨ ਦੇ ਚੀਫ ਐਗਜਿਕਟਿਵ ਅਬਦੁੱਲਾ ਅਬਦੁੱਲਾ ਨੇ ਇਸ ਹਮਲੇ ਨੂੰ ਅਫਗਾਨਿਸਤਾਨ 'ਚ 28 ਸਤੰਬਰ ਨੂੰ ਹੋਣ ਵਾਲੀਆਂ ਰਾਸ਼ਟਰਪਤੀ ਚੋਣਾਂ 'ਚ ਅੜਿੱਕਾ ਪਾਉਣ ਦੀ ਕੋਸ਼ਿਸ਼ ਦੱਸਿਆ ਹੈ। ਇਹ ਧਮਾਕਾ ਓਦੋਂ ਹੋਇਆ ਹੈ ਜਦੋਂ ਤਾਲਿਬਾਨ ਤੇ ਅਮਰੀਕਾ ਵਿਚਾਲੇ ਅਫਗਾਨਿਸਤਾਨ ਸ਼ਾਂਤੀ ਬਹਾਲੀ ਲਈ ਗੱਲਬਾਤ ਜਾਰੀ ਹੈ। ਬੀਤੇ ਜੁਲਾਈ ਵਿੱਚ ਅਫਗਾਨਿਸਤਾਨ 'ਚ ਰਿਕਾਰਡ 1500 ਤੋਂ ਵੱਧ ਲੋਕ ਮਾਰੇ ਗਏ ਹਨ।