ਕਰਾਚੀ, 8 ਅਗਸਤ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਨਵਾਜ਼ ਸ਼ਰੀਫ ਦੀ ਧੀ ਮਰੀਅਮ ਨਵਾਜ਼ ਨੂੰ ਭ੍ਰਿਸ਼ਟਾਚਾਰ ਵਿਰੋਧੀ ਬਿਊਰੋ (ਐੱਨ ਏ ਬੀ) ਨੇ ਗ੍ਰਿਫਤਾਰ ਕਰ ਲਿਆ ਹੈ। ਉਨ੍ਹਾਂ ਦੀ ਗ੍ਰਿਫਤਾਰੀ ਉਦੋਂ ਹੋਈ, ਜਦੋਂ ਉਹ ਆਪਣੇ ਪਿਤਾ ਨੂੰ ਮਿਲਣ ਲਈ ਅੱਜ ਜੇਲ੍ਹ ਵਿੱਚ ਪਹੁੰਚੀ ਸੀ।
ਵਰਨਣ ਯੋਗ ਹੈ ਕਿ ਤਿੰਨ ਵਾਰੀ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਰਹਿ ਚੁੱਕੇ ਨਵਾਜ਼ ਸ਼ਰੀਫ ਭ੍ਰਿਸ਼ਟਾਚਾਰ ਦੇ ਕੇਸ ਵਿੱਚ ਪਿਛਲੇ ਸਾਲ 24 ਦਸੰਬਰ ਤੋਂ ਲਾਹੌਰ ਦੀ ਕੋਟ ਲਖਪਤ ਜੇਲ੍ਹ ਵਿੱਚ ਸਜ਼ਾ ਕੱਟ ਰਹੇ ਹਨ। ਪਾਕਿਸਤਾਨੀ ਮੀਡੀਆ ਨੇ ਅੱਜ ਮਰੀਅਮ ਨਵਾਜ਼ ਦੀ ਗ੍ਰਿਫਤਾਰੀ ਹੋਣ ਬਾਰੇ ਜਾਣਕਾਰੀ ਦਿੱਤੀ ਹੈ। ਪਿਛਲੇ ਦਿਨੀਂ ਐੱਨ ਏ ਬੀ ਨੇ ਮਨੀ ਲਾਂਡਰਿੰਗ ਤੇ ਆਮਦਨ ਤੋਂ ਵੱਧ ਸੰਪਤੀ ਨਾਲ ਜੁੜੇ ਕੇਸ ਵਿੱਚ ਵਿਰੋਧੀ ਪਾਰਟੀ ਪਾਕਿਸਤਾਨ ਮੁਸਲਿਮ ਲੀਗ-ਨਵਾਜ਼ (ਪੀ ਐੱਮ ਐੱਲ-ਐੱਨ) ਦੀ ਉਪ ਪ੍ਰਧਾਨ ਮਰੀਅਮ ਨਵਾਜ਼ ਤੋਂ ਪੁੱਛਗਿੱਛ ਕੀਤੀ ਸੀ। 45 ਸਾਲਾ ਮਰੀਅਮ ਤੋਂ ਇਹ ਪੁੱਛਗਿੱਛ ਬੁੱਧਵਾਰ ਨੂੰ ਠੋਕਰ ਨਿਆਜ਼ ਬੇਗ ਵਾਲੇ ਐੱਨ ਏ ਬੀ ਦੇ ਦਫਤਰ ਵਿੱਚ ਹੋਈ ਸੀ। ਓਸੇ ਕੇਸ ਵਿੱਚ ਉਨ੍ਹਾਂ ਦੀ ਗ੍ਰਿਫਤਾਰੀ ਹੋਈ ਹੈ।
ਪੁੱਛਗਿੱਛ ਵੇਲੇ ਐੱਨ ਏ ਬੀ ਨੇ ਮਰੀਅਮ ਨੂੰ ਚੌਧਰੀ ਖੰਡ ਮਿੱਲ ਨਾਲ ਅਰਬਾਂ ਰੁਪਏ ਦੇ ਲੈਣ-ਦੇਣ ਦੀ ਜਾਣਕਾਰੀ ਮੰਗੀ ਸੀ। ਇਸ ਖੰਡ ਮਿੱਲ ਵਿੱਚ ਨਵਾਜ਼ ਸ਼ਰੀਫ ਪਰਵਾਰ ਦੇ ਹੋਰ ਮੈਂਬਰਾਂ ਨਾਲ ਮਰੀਅਮ ਦਾ ਵੀ ਹਿੱਸਾ ਹੈ। ਮਰੀਅਮ ਨੇ ਆਪਣੇ ਜਵਾਬ ਵਿੱਚ ਦੱਸਿਆ ਕਿ ਇਸ ਦੀ ਸਾਰੀ ਜਾਣਕਾਰੀ ਪਨਾਮਾ ਪੇਪਰ ਲੀਕ ਕੇਸ ਦੀ ਜਾਂਚ ਕਰ ਰਹੀ ਸਾਂਝੀ ਜਾਂਚ ਕਮੇਟੀ ਨੂੰ ਦੇ ਦਿੱਤੀ ਗਈ ਸੀ। ਮਰੀਅਮ ਤੋਂ ਇਸ ਕੰਪਨੀ ਦੇ ਵਿਦੇਸ਼ੀ ਹਿੱਸੇਦਾਰਾਂ ਬਾਰੇ ਵੀ ਪੁੱਛਿਆ ਗਿਆ ਹੈ। ਐੱਨ ਏ ਬੀ ਨੇ ਮਰੀਅਮ ਨੂੰ ਕੇਸ ਦੀ ਪੂਰੀ ਜਾਣਕਾਰੀ ਨਾਲ 8 ਅਗਸਤ ਨੂੰ ਫਿਰ ਹਾਜ਼ਰ ਨੂੰ ਕਿਹਾ ਸੀ। ਉਸ ਦਿਨ ਐੱਨ ਏ ਬੀ ਦੇ ਦਫਤਰ ਤੋਂ ਪਰਤਣ ਪਿੱਛੋਂ ਮਰੀਅਮ ਨੇ ਇਕ ਟਵੀਟ ਵਿੱਚ ਇਹ ਕਿਹਾ ਸੀ ਕਿ ਯੋਜਨਾਬੱਧ ਤਰੀਕੇ ਨਾਲ ਉਨ੍ਹਾਂ ਤੇ ਉਨ੍ਹਾਂ ਦੇ ਪਰਵਾਰ ਨਾਲ ਸਖਤੀ ਵਰਤਣ ਦੀ ਕੋਸ਼ਿਸ਼ ਕੀਤੀ ਜਾਵੇਗੀ।