ਬ੍ਰਿਸਬੇਨ, 7 ਅਗਸਤ (ਪੋਸਟ ਬਿਊਰੋ)- ਆਸਟਰੇਲੀਆ ਦੇ ਪ੍ਰਾਂਤ ਕੁਈਨਜ਼ਲੈਂਡ ਵਿੱਚ ਕਈ ਸਾਲ ਪਹਿਲਾਂ ਭਾਰਤੀ ਵਪਾਰੀ ਅਡਾਨੀ ਵੱਲੋਂ ਕੋਇਲੇ ਦੀ ਖਾਣ ਸ਼ੁਰੂ ਕਰਨ ਦੀ ਮਨਜ਼ੂਰੀ ਲੈਣ ਦਾ ਕੰਮ ਸ਼ੁਰੂ ਹੋਇਆ ਸੀ। ਕਈ ਸਾਲਾਂ ਦੀ ਜੱਦੋ ਜਹਿਦ ਅਤੇ ਲੇਬਰ ਪਾਰਟੀ ਨੂੰ ਚੋਣ 'ਚ ਉਤਰੀ ਕੁਈਨਜ਼ਲੈਂਜ ਸਮੇਤ ਖਾਣਾਂ ਵਾਲੇ ਖੇਤਰਾਂ 'ਚ ਹਾਰ ਪਿੱਛੋਂ ਪ੍ਰਾਂਤ ਸਰਕਾਰ ਨੇ ਮਨਜ਼ੂਰੀ ਦਿੱਤੀ, ਪਰ ਮਨਜ਼ੂਰੀ ਤੋਂ ਬਾਅਦ ਵਾਤਾਵਰਨ ਸਮਰਥਕਾਂ ਅਤੇ ਗ੍ਰੀਨ ਪਾਰਟੀ ਸਮਰਥਕਾਂ ਵੱਲੋਂ ਇਸ ਖਾਣ ਨੂੰ ਰੋਕਣ ਲਈ ਹਰ ਹੀਲਾ ਵਰਤਣਾ ਸ਼ੁਰੂ ਕਰ ਦਿੱਤਾ।
ਪਿਛਲੇ ਲੰਮੇ ਸਮੇਂ ਤੋਂ ਇਸ ਖਾਣ ਦੇ ਸ਼ੁਰੂ ਹੋਣ ਨੂੰ ਰੋਕਣ ਲਈ ਪ੍ਰਦਰਸ਼ਨ ਅਤੇ ਰਸਤੇ ਰੋਕਣ ਦੀਆਂ ਕਾਰਵਾਈਆਂ ਜਾਰੀ ਹਨ। ਇਸੇ ਕੜੀ ਹੇਠ ਸਵੇਰੇ ਸੱਤ ਵਜੇ ਤੋਂ ਪ੍ਰਦਰਸ਼ਨਕਾਰੀਆਂ ਨੇ ਬ੍ਰਿਸਬੇਨ ਸ਼ਹਿਰ 'ਚ ਪ੍ਰਦਰਸ਼ਨ ਸ਼ੁਰੂ ਕਰ ਦਿੱਤਾ। ਪ੍ਰਦਰਸ਼ਨਕਾਰੀਆਂ ਵੱਲੋਂ ਰਸਤੇ ਰੋਕਣ ਕਾਰਨ ਸਾਰਾ ਦਿਨ ਸ਼ਹਿਰ ਦੀ ਆਵਾਜਾਈ ਪ੍ਰਭਾਵਿਤ ਹੋਈ, ਜਿਸ ਕਰਕੇ ਕਈ ਵਿਅਕਤੀਆਂ ਦੇ ਹਸਪਤਾਲ ਸਮੇਂ ਸਿਰ ਨਾ ਪੁੱਜਣ ਕਾਰਨ ਆਪਣੇ ਇਲਾਜ ਵਿੱਚ ਪ੍ਰੇਸ਼ਾਨੀ ਝੱਲਣ ਪਈ। ਉਨ੍ਹਾਂ ਲੋਕਾਂ ਨੂੰ ਕਿਹਾ ਕਿ ਉਹ ਵਾਤਾਵਰਨ 'ਚ ਸੁਧਾਰ ਚਾਹੁੰਦੇ ਹਨ, ਪਰ ਇਸ ਪ੍ਰਕਾਰ ਦੇ ਆਵਾਜਾਈ ਵਿਘਨ ਤੋਂ ਨਿਰਾਸ਼ ਹਨ। ਪੁਲਸ ਨੇ 72 ਦੇ ਕਰੀਬ ਪ੍ਰਦਰਸ਼ਨਕਾਰੀ ਗ੍ਰਿਫਤਾਰ ਕੀਤੇ ਹਨ।