ਨਿਊਯਾਰਕ, 11 ਅਕਤੂਬਰ (ਪੋਸਟ ਬਿਊਰੋ)- ਪੈਪਸੀਕੋ ਦੀ ਭਾਰਤੀ ਮੂਲ ਦੀ ਸਾਬਕਾ ਸੀ ਈ ਓ ਇੰਦਰਾ ਨੂਈ ਦਾ ਕਹਿਣਾ ਹੈ ਕਿ ਜੇ ਉਹ ਰਾਜਨੀਤੀ ਵਿੱਚ ਆਈ ਤਾਂ ਤੀਜਾ ਵਿਸ਼ਵ ਯੁੱਧ ਹੋ ਜਾਵੇਗਾ। ਨੂਈ ਨੂੰ ਕੱਲ੍ਹ ਏਸ਼ੀਅਨ ਸੁਸਾਇਟੀ ਦੇ ਗੇਮ ਚੇਂਜਰ ਆਫ ਦਾ ਯੀਅਰ ਐਵਾਰਡ ਨਾਲ ਨਿਵਾਜਿਆ ਗਿਆ ਸੀ।
12 ਸਾਲ ਦੁਨੀਆ ਦੀ ਸਭ ਤੋਂ ਵੱਡੀ ਕੋਲਡ ਡਰਿੰਕ ਕੰਪਨੀ ਦੀ ਸੀ ਈ ਓ ਰਹਿਣ ਪਿੱਛੋਂ ਨੂਈ ਨੇ ਦੋ ਅਕਤੂਬਰ ਨੂੰ ਇਹ ਅਹੁਦਾ ਛੱਡ ਦਿੱਤਾ ਸੀ। ਉਹ ਫਿਰ ਵੀ 2019 ਤੱਕ ਕੰਪਨੀ ਦੀ ਪ੍ਰਧਾਨ ਬਣੀ ਰਹੇਗੀ। ਕਾਰੋਬਾਰੀ ਪ੍ਰਾਪਤੀਆਂ ਤੇ ਔਰਤਾਂ ਨੂੰ ਅੱਗੇ ਵਧਣ ਵਿੱਚ ਉਨ੍ਹਾਂ ਦੇ ਯਤਨਾਂ ਲਈ ਏਸ਼ੀਅਨ ਸੁਸਾਇਟੀ ਨੇ ਉਨ੍ਹਾਂ ਨੂੰ ਇਸ ਐਵਾਰਡ ਨਾਲ ਨਿਵਾਜਿਆ। ਥਾਈਲੈਂਡ ਦੀ ਗੁਫਾ 'ਚ ਫਸੇ ਬੱਚਿਆਂ ਨੂੰ ਕੱਢਣ ਵਾਲੀ ਟੀਮ ਨੂੰ ਵੀ ਐਵਾਰਡ ਦਿੱਤਾ ਗਿਆ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਕੈਬਨਿਟ ਵਿੱਚ ਸ਼ਾਮਲ ਹੋਣ ਦੀ ਯੋਜਨਾ ਨਾਲ ਜੁੜੇ ਸਵਾਲ 'ਤੇ ਨੂਈ ਨੇ ਕਿਹਾ ਕਿ ਮੇਰਾ ਰਾਜਨੀਤੀ ਦਾ ਕੋਈ ਵਾਸਤਾ ਨਹੀਂ ਹੈ। ਮੈਂ ਬਹੁਤ ਬੋਲਣ ਵਾਲੀ ਹਾਂ ਇਸ ਲਈ ਮੇਰੇ ਰਾਜਨੀਤੀ 'ਚ ਆਉਣ ਨਾਲ ਤੀਜਾ ਵਿਸ਼ਵ ਯੁੱਧ ਹੋ ਜਾਵੇਗਾ। ਨੂਈ ਨੇ ਕਿਹਾ ਕਿ ਮੈਂ ਏਸ਼ਿਆਈ ਮਾਡਲ ਅਪਣਾ ਕੇ ਕੰਮ ਦੇ ਨਾਲ ਆਪਣੀਆਂ ਬੱਚੀਆਂ ਨੂੰ ਵੱਡਾ ਕਰ ਸਕੀ। ਔਰਤਾਂ ਨੂੰ ਕੰਮ ਤੇ ਪਰਵਾਰ ਵਿਚਕਾਰ ਤਾਲਮੇਲ ਬਿਠਾਉਣ ਲਈ ਪਰਵਾਰ ਦੇ ਵੱਡੇ ਮੈਂਬਰਾਂ ਦੀ ਮਦਦ ਚਾਹੀਦੀ ਹੈ।