ਅਭਿਨੇਤਾ ਅਕਸ਼ੈ ਕੁਮਾਰ ਦੀਆਂ ਕਈ ਫਿਲਮਾਂ ਰਿਲੀਜ਼ ਹੋਣ ਵਾਲੀਆਂ ਹਨ। ਇਸ ਸਮੇਂ ਉਹ ਫਿਲਮ ‘ਮਿਸ਼ਨ ਮੰਗਲ’ ਬਾਰੇ ਚਰਚਾ ਵਿੱਚ ਹਨ, ਜੋ ਪੰਦਰਾਂ ਅਗਸਤ ਨੂੰ ਰਿਲੀਜ਼ ਹੋਣੀ ਹੈ। ਇਸ ਦਾ ਟਰੇਲਰ ਆਉਣ ਦੇ ਕੁਝ ਹੀ ਦਿਨ ਬਾਅਦ ਉਨ੍ਹਾਂ ਦੀ ਅਗਲੀ ਫਿਲਮ ‘ਬੱਚਨ ਪਾਂਡੇ’ ਦਾ ਪੋਸਟਰ ਜਾਰੀ ਕਰ ਦਿੱਤਾ ਗਿਆ ਹੈ। ਤਾਜ਼ਾ ਖਬਰ ਹੈ ਕਿ ਅਕਸ਼ੈ ਕੁਮਾਰ ਤਮਿਲ ਫਿਲਮ ‘ਕੱਥੀ’ ਦੇ ਹਿੰਦੀ ਰੀਮੇਕ ਵਿੱਚ ਵੀ ਮੁੱਖ ਭੂਮਿਕਾ ਕਰਨਗੇ। ਸਾਲ 2014 ਵਿੱਚ ਰਿਲੀਜ਼ ਫਿਲਮ ‘ਕੱਥੀ’ ਵਿੱਚ ਦੱਖਣ ਦੇ ਸੁਪਰ ਸਟਾਰ ਵਿਜੈ ਹੀਰੋ ਅਤੇ ਏ ਆਰ ਮੁਰਗਦਾਸ ਡਾਇਰੈਕਟਰ ਸਨ। ਹਿੰਦੀ ਵਿੱਚ ਇਸ ਦਾ ਨਾਂਅ ‘ਇੱਕਾ’ ਹੋਵੇਗਾ ਅਤੇ ‘ਮਿਸ਼ਨ ਮੰਗਲ’ ਦੇ ਡਾਇਰੈਕਟਰ ਜਗਨ ਸ਼ਕਤੀ ਇਸ ਦਾ ਨਿਰਦੇਸ਼ਨ ਕਰਨਗੇ। ‘ਇੱਕਾ’ ਵਿੱਚ ਅਕਸ਼ੈ ਕੁਮਾਰ ਅਜਿਹੇ ਵਿਅਕਤੀ ਦਾ ਕਿਰਦਾਰ ਨਿਭਾਉਣਗੇ, ਜੋ ਕਿਸਾਨਾਂ ਦੇ ਅਧਿਕਾਰਾਂ ਲਈ ਲੜਦਾ ਹੈ। ਕਿਹਾ ਜਾ ਰਿਹਾ ਹੈ ਕਿ ਇਸ ਫਿਲਮ ਵਿੱਚ ਅਕਸ਼ੈ ਕੁਮਾਰ ਆਪਣੇ ਪੁਰਾਣੇ ਐਕਸ਼ਨ ਅਵਤਾਰ ਵਿੱਚ ਹੋਣਗੇ। ਉਹ ਡਬਲ ਰੋਲ ਵਿੱਚ ਨਜ਼ਰ ਆਉਣਗੇ। ਗੌਰਤਲਬ ਹੈ ਕਿ ਫਿਲਮ ‘ਕੱਥੀ’ ਦੇ ਹਿੰਦੀ ਰੀਮੇਕ ਦੀ ਯੋਜਨਾ ਤਿੰਨ-ਚਾਰ ਸਾਲ ਪਹਿਲਾਂ ਬਣੀ ਸੀ, ਪਰ ਬਾਅਦ ਵਿੱਚ ਮਾਮਲਾ ਠੰਢੇ ਬਸਤੇ ਵਿੱਚ ਚਲਾ ਗਿਆ। ਜਗਨ ਸ਼ਕਤੀ ਨੇ ਕਿਹਾ ਕਿ ‘ਮਿਸ਼ਨ ਮੰਗਲ' ਦੇ ਲਈ ਮੈਂ ‘ਇੱਕਾ’ ਹੋਲਡ 'ਤੇ ਰੱਖ ਦਿੱਤਾ ਸੀ। ਇਸ ਵਾਰ ਫਿਰ ਇਸ ਨੂੰ ਸ਼ੁਰੂ ਕੀਤਾ ਜਾ ਸਕਦਾ ਹੈ।