ਫਿਲਮ ‘ਦਬੰਗ’ ਤੋਂ ਫਿਲਮੀ ਕਰੀਅਰ ਸ਼ੁਰੂ ਕਰਨ ਵਾਲੀ ਸੋਨਾਕਸ਼ੀ ਸਿਨਹਾ ਅੱਜਕੱਲ੍ਹ ‘ਖਾਨਦਾਨੀ ਸ਼ਫਾਖਾਨਾ’ ਦੇ ਪ੍ਰਮੋਸ਼ਨ ਦੇ ਨਾਲ ‘ਦਬੰਗ 3’ ਦੀ ਸ਼ੂਟਿੰਗ ਕਰ ਰਹੀ ਹੈ। ‘ਦਬੰਗ' ਦਾ ਆਫਰ ਮਿਲਣ ਦੀਆਂ ਯਾਦਾਂ ਅੱਜ ਵੀ ਉਸ ਦੇ ਮਨ ਵਿੱਚ ਤਾਜ਼ਾ ਹਨ। ਸੋਨਾਕਸ਼ੀ ਦੇ ਮੁਤਾਬਕ ਸ਼ੁਰੂ ਵਿੱਚ ਉਸ ਦਾ ਵਜ਼ਨ ਕਾਫੀ ਜ਼ਿਆਦਾ ਸੀ। ਉਸ ਨੇ ਅਭਿਨੈ ਵਿੱਚ ਆਉਣ ਦੀ ਕਲਪਨਾ ਤੱਕ ਨਹੀਂ ਕੀਤੀ ਸੀ। ਉਹ ਇੱਕ ਫੈਸ਼ਨ ਸ਼ੋਅ ਵਿੱਚ ਆਡੀਐਂਸ ਮੈਨੇਜਰ ਦਾ ਕੰਮ ਕਰ ਰਹੀ ਸੀ। ਉਸ ਵਿੱਚ ਸਲਮਾਨ ਦਰਸ਼ਕਾਂ ਦੀ ਲਾਈਨ ਵਿੱਚ ਬੈਠੇ ਸਨ। ਉਹ ਜਾਣਦੇ ਸਨ ਕਿ ਇਹ ਸ਼ਤਰੂਘਨ ਸਿਨਹਾ ਦੀ ਬੇਟੀ ਹੈ। ਅਰਾਮ ਨਾਲ ਸਲਮਾਨ ਉਸ ਦੇ ਕੋਲ ਗਏ ਅਤੇ ਉਸ ਨੂੰ ਵਜ਼ਨ ਘੱਟ ਕਰਨ ਦਾ ਸੁਝਾਅ ਦਿੱਤਾ, ਕਿਉਂਕਿ ਉਹ ਉਸ ਨੂੰ ਆਪਣੀ ਫਿਲਮ ਵਿੱਚ ਲੈਣਾ ਚਾਹੁੰਦੇ ਸਨ। ਇਸ ਦਾ ਖੁਲਾਸਾ ਸੋਨਾਕਸ਼ੀ ਨੇ ਕਪਿਲ ਸ਼ਰਮਾ ਦੇ ਸ਼ੋਅ ਵਿੱਚ ਕੀਤਾ ਸੀ।
ਸੋਨਾਕਸ਼ੀ ਦੇ ਮੁਤਾਬਕ ਸਲਮਾਨ ਦੀ ਗੱਲ ਸੁਣ ਕੇ ਉਹ ਖੁਸ਼ ਸੀ। ਉਸ ਨੇ ਵਜ਼ਨ ਘੱਟ ਕਰਨ ਦੀ ਠਾਣ ਲਈ। ਉਸ ਨੂੰ ਖੁਸ਼ ਦੇਖ ਕੇ ਸਲਮਾਨ ਨੇ ਇਸ ਖੁਸ਼ੀ ਦੇ ਲਈ ਟ੍ਰੀਟ ਦੇਣ ਲਈ ਕਿਹਾ ਸੀ। ਉਸ ਸਮੇਂ ਉਸ ਦੇ ਪਰਸ ਵਿੱਚ ਤਿੰਨ ਹਜ਼ਾਰ ਰੁਪਏ ਸਨ, ਜੋ ਉਸ ਨੇ ਫੈਸ਼ਨ ਸ਼ੋਅ ਤੋਂ ਕਮਾਏ ਸਨ। ਸਲਮਾਨ ਵਰਗੇ ਸੁਪਰ ਸਟਾਰ ਨੂੰ ਉਹ ਤਿੰਨ ਹਜ਼ਾਰ ਰੁਪਏ ਵਿੱਚ ਟ੍ਰੀਟ ਦੇਣ ਦੀ ਸੋਚ ਵੀ ਨਹੀਂ ਸਕਦੀ ਸੀ। ਅੱਜ ਸੋਨਾਕਸ਼ੀ ਆਪਣਾ ਮੁਕਾਮ ਬਣਾ ਚੁੱਕੀ ਹੈ, ਪਰ ਸਲਮਾਨ ਨੂੰ ਟ੍ਰੀਟ ਦੇਣਾ ਅਜੇ ਬਾਕੀ ਹੈ। ਸੋਨਾਕਸ਼ੀ ਦੇ ਮੁਤਾਬਕ ਸਲਮਾਨ ਉਸ ਨੂੰ ਟ੍ਰੀਟ ਦੇਣ ਦੀ ਯਾਦ ਦਿਵਾਉਣਾ ਭੁੱਲਦੇ ਨਹੀਂ।