ਲਾਵਾਲ, 5 ਅਗਸਤ (ਪੋਸਟ ਬਿਊਰੋ) : ਸੋਮਵਾਰ ਦੁਪਹਿਰ ਨੂੰ ਲਾਵਾਲ ਵਿੱਚ ਦੋ ਟਰੈਕਟਰ ਟਰੇਲਰਜ਼ ਤੇ ਛੇ ਹੋਰਨਾਂ ਗੱਡੀਆਂ ਦੇ ਆਪਸ ਵਿੱਚ ਟਕਰਾਉਣ ਕਾਰਨ ਤਿੰਨ ਵਿਅਕਤੀ ਮਾਰੇ ਗਏ। ਇਸ ਹਾਦਸੇ ਕਾਰਨ ਲੱਗੀ ਅੱਗ ਤੇ ਧੂੰਆਂ ਦੂਰੋਂ ਹੀ ਨਜ਼ਰ ਆ ਰਿਹਾ ਸੀ।
ਦ ਸੁਰੇਤੇ ਡੂ ਕਿਊਬਿਕ ਨੇ ਆਖਿਆ ਕਿ ਭਾਰੀ ਟਰੱਕ ਹਾਈਵੇਅ 15 ਨੇੜੇ ਹਾਈਵੇਅ 440 ਉੱਤੇ ਪੱਛਮ ਵੱਲ ਜਾ ਰਹੇ ਸਨ ਜਦੋਂ ਦੁਪਹਿਰੇ 3:35 ਉੱਤੇ ਇਹ ਹਾਦਸਾ ਵਾਪਰਿਆ। ਪੁਲਿਸ ਅਜੇ ਵੀ ਹਾਦਸੇ ਦੇ ਕਾਰਨਾਂ ਦਾ ਪਤਾ ਲਾਉਣ ਦੀ ਕੋਸਿ਼ਸ਼ ਕਰ ਰਹੀ ਹੈ। ਲਾਵਾਲ ਦੇ ਫਾਇਰਫਾਈਟਰਜ਼ ਵਿੱਚੋਂ ਇੱਕ ਨੇ ਦੱਸਿਆ ਕਿ ਇੱਕ ਟਰੱਕ ਡਰਾਈਵਰ ਸਮੇਂ ਉੱਤੇ ਬ੍ਰੇਕਾਂ ਨਹੀਂ ਮਾਰ ਸਕਿਆ ਇਸ ਲਈ ਉਹ ਦੂਜੇ ਟਰੱਕ ਵਿੱਚ ਜਾ ਵੱਜਿਆ।
ਇਸ ਹਾਦਸੇ ਵਿੱਚ ਦੋ ਗੱਡੀਆਂ ਵਿੱਚ ਯਾਤਰੀ ਸਵਾਰ ਸਨ, ਇੱਕ ਗੱਡੀ ਐਸਯੂਵੀ ਜਾਂ ਮਿਨੀਵੈਨ ਲੱਗ ਰਹੀ ਸੀ ਤੇ ਇਹ ਗੱਡੀਆਂ ਹਾਦਸੇ ਦੌਰਾਨ 18 ਵ੍ਹੀਲਰਜ਼ ਦੇ ਹੇਠਾਂ ਆ ਗਈਆਂ। ਇੱਕ ਹੋਰ ਐਸਯੂਵੀ ਇੱਕ ਪਾਸੇ ਪਲਟ ਗਈ ਤੇ ਹਾਈਵੇਅ ਅਤੇ ਸਰਵਿਸ ਰੋਡ ਦੇ ਨਾਲ ਲੱਗੀ ਵਾੜ ਨਾਲ ਜਾ ਟਕਰਾਈ। ਇੱਕ ਹੋਰ ਕਾਲੇ ਰੰਗ ਦੀ ਕਾਰ ਵੀ ਘੁੰਮ ਕੇ ਵਾੜ ਨਾਲ ਜਾ ਟਕਰਾਈ ਪਰ ਉਹ ਪਲਟੀ ਨਹੀਂ।
ਫਿਰ ਇੱਕ ਟਰੱਕ ਵਿੱਚ ਅੱਗ ਲੱਗ ਗਈ ਤੇ ਉਸ ਦੀਆਂ ਲਪਟਾਂ ਦੂਜੇ ਟਰੱਕ ਤੇ ਹੋਰਨਾਂ ਗੱਡੀਆਂ ਤੱਕ ਪਹੁੰਚ ਗਈਆਂ। ਇਨ੍ਹਾਂ ਟਰੱਕਾਂ ਵਿੱਚ ਖਾਣਾ ਲਿਜਾਇਆ ਜਾ ਰਿਹਾ ਸੀ ਪਰ ਘੱਟੋ ਘੱਟ ਇੱਕ ਗੱਡੀ ਵਿੱਚ ਪ੍ਰੋਪੇਨ ਟੈਂਕ ਸੀ। ਐਮਰਜੰਸੀ ਅਮਲੇ ਨੇ ਮੌਕੇ ਉੱਤੇ ਪਹੁੰਚ ਕੇ ਹਾਈਵੇਅ 440 ਦੀਆਂ ਸਾਰੀਆਂ ਪੱਛਮ ਵੱਲ ਜਾਂਦੀਆਂ ਲੇਨਜ਼ ਬੰਦ ਕਰਵਾਈਆਂ ਤੇ ਇਹ ਅਗਲੇ ਕਈ ਘੰਟਿਆ ਤੱਕ ਬੰਦ ਰਹਿਣ ਦੀ ਸੰਭਾਵਨਾ ਹੈ।