ਗ੍ਰੀਨ ਪਾਰਟੀ ਐਨਡੀਪੀ ਤੋਂ ਅੱਗੇ ਨਿਕਲੀ
ਓਟਵਾ, 31 ਜੁਲਾਈ (ਪੋਸਟ ਬਿਊਰੋ) : ਲਿਬਰਲ ਤੇ ਕੰਜ਼ਰਵੇਟਿਵ ਪਾਰਟੀਆਂ ਵੱਲੋਂ ਇਸ ਸਾਲ ਰਿਕਾਰਡ ਤੋੜ ਫੰਡਰੇਜਿ਼ੰਗ ਦੇ ਦਾਅਵੇ ਕੀਤੇ ਜਾ ਰਹੇ ਹਨ। ਦੋਵੇਂ ਧਿਰਾਂ ਇੱਕ ਦੂਜੀ ਤੋਂ ਵੱਧ ਚੜ੍ਹ ਕੇ ਫੜ੍ਹਾਂ ਮਾਰ ਰਹੀਆਂ ਹਨ।
ਇਲੈਕਸ਼ਨ ਕੈਨੇਡਾ ਵੱਲੋਂ ਜਾਰੀ ਕੀਤੇ ਗਏ ਨਵੇਂ ਅੰਕੜਿਆਂ ਤੋਂ ਸਾਹਮਣੇ ਆਇਆ ਹੈ ਕਿ ਕੰਜ਼ਰਵੇਟਿਵਾਂ ਨੇ ਇਸ ਸਾਲ ਦੀ ਦੂਜੀ ਤਿਮਾਹੀ ਵਿੱਚ 8.5 ਮਿਲੀਅਨ ਡਾਲਰ ਇੱਕਠੇ ਕੀਤੇ। ਇਹ ਰਕਮ ਕੰਜ਼ਰਵੇਟਿਵਾਂ ਨੂੰ 53,000 ਡੋਨਰਜ਼ ਵੱਲੋਂ ਡੋਨੇਟ ਕੀਤੀ ਗਈ। ਪਾਰਟੀ ਦਾ ਕਹਿਣਾ ਹੈ ਕਿ 2011 ਵਿੱਚ ਉਨ੍ਹਾਂ ਵੱਲੋਂ ਦੂਜੀ ਤਿਮਾਹੀ ਵਿੱਚ ਕਾਇਮ ਕੀਤੇ ਗਏ ਰਿਕਾਰਡ ਨੂੰ ਵੀ ਉਨ੍ਹਾਂ ਇਸ ਵਾਰੀ ਤੋੜ ਦਿੱਤਾ ਹੈ।
ਦੂਜੇ ਪਾਸੇ ਲਿਬਰਲਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਵੱਲੋਂ ਇੱਕਠੇ ਕੀਤੇ ਗਏ 5 ਮਿਲੀਅਨ ਡਾਲਰ ਪਹਿਲੀ ਅਪਰੈਲ ਤੋਂ 30 ਜੂਨ ਤੱਕ 41,500 ਡੋਨਰਜ਼ ਵੱਲੋਂ ਡੋਨੇਟ ਕੀਤੇ ਗਏ ਹਨ। ਜਿੱਥੋਂ ਤੱਕ ਇਸ ਰਕਮ ਦਾ ਸਵਾਲ ਹੈ ਤਾਂ ਲਿਬਰਲਾਂ ਦਾ ਦਾਅਵਾ ਹੈ ਕਿ ਇਹ ਪਾਰਟੀ ਵੱਲੋਂ ਦੂਜੀ ਤਿਮਾਹੀ ਵਿੱਚ ਇੱਕਠੀ ਕੀਤੀ ਗਈ ਰਕਮ ਹੈ।
ਇਸ ਦੌਰਾਨ ਜਿਹੜਾ ਇੱਕ ਹੋਰ ਖੁਲਾਸਾ ਹੋਇਆ ਹੈ ਉਹ ਇਹ ਹੈ ਕਿ ਐਨਡੀਪੀ ਨਾਲੋਂ ਗ੍ਰੀਨ ਪਾਰਟੀ ਬਾਜ਼ੀ ਮਾਰ ਗਈ ਹੈ। ਗ੍ਰੀਨ ਪਾਰਟੀ ਵੱਲੋਂ 14,600 ਡੋਨਰਜ਼ ਕੋਲੋਂ 1.44 ਮਿਲੀਅਨ ਡਾਲਰ ਇੱਕਠੇ ਕੀਤੇ ਗਏ ਹਨ ਜਦਕਿ ਐਨਡੀਪੀ 14,900 ਡੋਨਰਜ਼ ਕੋਲੋਂ 1.43 ਮਿਲੀਅਨ ਡਾਲਰ ਹੀ ਜੁਟਾ ਸਕੀ ਹੈ।