ਓਨਟਾਰੀਓ, 31 ਜੁਲਾਈ (ਪੋਸਟ ਬਿਊਰੋ) : ਬੁੱਧਵਾਰ ਨੂੰ ਲਿਬਰਲ ਐਮਪੀਪੀ ਨਥਾਲੀ ਡੈਸ ਰੋਜ਼ੀਅਰ ਨੇ ਓਨਟਾਰੀਓ ਵਿਧਾਨਸਭਾ ਤੋਂ ਅਸਤੀਫਾ ਦੇ ਦਿੱਤਾ। ਐਮਪੀਪੀ ਬਣਨ ਤੋਂ ਤਿੰਨ ਸਾਲ ਤੋਂ ਵੀ ਘੱਟ ਸਮੇਂ ਵਿੱਚ ਰੋਜ਼ੀਅਰ ਵੱਲੋਂ ਇਹ ਅਸਤੀਫਾ ਦਿੱਤਾ ਗਿਆ ਹੈ। ਹੁਣ ਉਹ ਟੋਰਾਂਟੋ ਦੇ ਮੈਸੀ ਕਾਲਜ ਦੀ ਪ੍ਰੈਜ਼ੀਡੈਂਟ ਬਣਨ ਦੀ ਤਿਆਰੀ ਕਰ ਰਹੀ ਹੈ।
ਰੋਜ਼ੀਅਰ ਨੇ ਆਖਿਆ ਕਿ ਓਟਵਾ-ਵੇਨੀਅਰ ਦੇ ਐਮਪੀਪੀ ਵਜੋਂ ਦਿੱਤਾ ਗਿਆ ਉਨ੍ਹਾਂ ਦਾ ਇਹ ਅਸਤੀਫਾ ਫੌਰੀ ਪ੍ਰਭਾਵ ਤੋਂ ਲਾਗੂ ਹੋਵੇਗਾ। ਇਸ ਤੋਂ ਬਾਅਦ ਹੁਣ ਲਿਬਰਲਾਂ ਕੋਲ ਵਿਧਾਨਸਭਾ ਵਿੱਚ ਸਿਰਫ ਛੇ ਸੀਟਾਂ ਹੀ ਬਚੀਆਂ ਹਨ। ਹਾਰਵਰਡ ਲਾਅ ਗ੍ਰੈਜੂਏਟ ਨੇ ਇੱਕ ਬਿਆਨ ਵਿੱਚ ਆਖਿਆ ਕਿ ਉਹ ਆਪਣੀ ਸੀਟ ਤੋਂ ਭਾਰੀ ਮਨ ਨਾਲ ਅਸਤੀਫਾ ਦੇ ਰਹੀ ਹੈ। ਉਨ੍ਹਾਂ ਇਹ ਵੀ ਆਖਿਆ ਕਿ ਇਹ ਫੈਸਲਾ ਲੈਣਾ ਉਨ੍ਹਾਂ ਲਈ ਕੋਈ ਸੁਖਾਲਾ ਕੰਮ ਨਹੀਂ ਸੀ।
ਅੰਤਰਿਮ ਲਿਬਰਲ ਆਗੂ ਜੌਹਨ ਫਰੇਜ਼ਰ ਨੇ ਆਖਿਆ ਕਿ ਡੈਸ ਰੋਜ਼ੀਅਰ ਲਿਬਰਲ ਕਾਕਸ ਦੀ ਬਹੁਤ ਹੀ ਅਹਿਮ ਮੈਂਬਰ ਰਹੀ। ਉਨ੍ਹਾਂ ਆਖਿਆ ਕਿ ਕੈਥਲੀਨ ਵਿੰਨ ਸਰਕਾਰ ਸਮੇਂ ਉਨ੍ਹਾਂ ਨੈਚੂਰਲ ਰਿਸੋਰਸਿਜ਼ ਐਂਡ ਫੌਰੈਸਟਰੀ ਮੰਤਰਾਲਾ ਬਾਖੂਬੀ ਸਾਂਭਿਆ। ਇਸ ਤੋਂ ਇਲਾਵਾ ਸਿਵਲ ਲਿਬਰਟੀਜ਼ ਤੇ ਹਿਊਮਨ ਰਾਈਟਜ਼ ਦੀ ਹਿਫਾਜ਼ਤ ਲਈ ਵੀ ਰੋਜ਼ੀਅਰ ਵੱਲੋਂ ਅਹਿਮ ਭੂਮਿਕਾ ਨਿਭਾਈ ਗਈ। ਉਨ੍ਹਾਂ ਵਾਤਾਵਰਣ ਵਿੱਚ ਸਥਿਰਤਾ ਲਿਆਉਣ ਤੇ ਬਰਾਬਰ ਤਨਖਾਹ ਦੀ ਲੜਾਈ ਵੀ ਲੜੀ।
2018 ਦੀਆਂ ਚੋਣਾਂ ਵਿੱਚ ਸੁੰਗੜ ਕੇ ਸੱਤ ਸੀਟਾਂ ਤੱਕ ਸੀਮਤ ਹੋਈ ਲਿਬਰਲ ਪਾਰਟੀ ਰੋਜ਼ੀਅਰ ਦੇ ਜਾਣ ਨਾਲ ਹੋਰ ਸੁੰਗੜ ਗਈ ਹੈ। ਲਿਬਰਲ ਕਾਕਸ ਐਨਾ ਨਿੱਕਾ ਰਹਿ ਗਿਆ ਹੈ ਕਿ ਪ੍ਰੀਮੀਅਰ ਡੱਗ ਫੋਰਡ ਅਕਸਰ ਇਸ ਨੂੰ ਮਿਨੀਵੈਨ ਪਾਰਟੀ ਦੇ ਨਾਂ ਨਾਲ ਸੱਦਦੇ ਹਨ। ਫੋਰਡ ਕੋਲ ਇਸ ਹਲਕੇ ਤੋਂ ਜਿ਼ਮਨੀ ਚੋਣ ਦੇ ਐਲਾਨ ਲਈ 31 ਜਨਵਰੀ, 2020 ਤੱਕ ਦਾ ਸਮਾਂ ਹੈ। ਪਰ ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਲਿਬਰਲ ਇਸ ਸੀਟ ਉੱਤੇ ਮੁੜ ਜਿੱਤ ਹਾਸਲ ਕਰ ਸਕਦੇ ਹਨ ਕਿਉਂਕਿ 1971 ਤੋਂ ਹੀ ਇਹ ਸੀਟ ਲਿਬਰਲਾਂ ਦੇ ਕੋਲ ਹੈ। ਓਨਟਾਰੀਓ ਦੀ ਵਿਧਾਨਸਭਾ ਦੀ ਕਾਰਵਾਈ 28 ਅਕਤੂਬਰ ਤੋਂ ਸ਼ੁਰੂ ਹੋਵੇਗੀ।