ਪ੍ਰਿਅੰਕਾ ਚੋਪੜਾ ਜੋਨਸ ਨੇ ਆਪਣੇ ਕਰੀਅਰ 'ਚ ਜੋ ਮੁਕਾਮ ਹਾਸਲ ਕੀਤਾ ਹੈ, ਉਹ ਘੱਟ ਹੀ ਅਭਿਨੇਤਰੀਆਂ ਨੂੰ ਨਸੀਬ ਹੁੰਦਾ ਹੈ। ਆਪਣੇ ਅਮਰੀਕੀ ਟੀ ਵੀ ਸ਼ੋਅ ‘ਕਵਾਂਟਿਕੋ’ ਲਈ ਬੈਸਟ ਅਭਿਨੇਤਰੀ ਦਾ ‘ਪੀਪਲਸ ਚੁਆਇਸ’ ਵਾਲਾ ਐਵਾਰਡ ਜਿੱਤ ਕੇ ਪ੍ਰਿਅੰਕਾ ਨੇ ਇਤਿਹਾਸ ਰਚ ਦਿੱਤਾ। ਉਹ ਪਹਿਲੀ ਭਾਰਤੀ ਅਭਿਨੇਤਰੀ ਹੈ, ਜਿਸ ਨੇ ਇਸ ਕੌਮਾਂਤਰੀ ਖਿਤਾਬ ਨੂੰ ਆਪਣੇ ਨਾਂਅ ਕੀਤਾ ਹੈ। ਇਸ ਦੇ ਨਾਲ ਮਸ਼ਹੂਰ ਇੰਟਰਨੈਸ਼ਨਲ ਟੀ ਵੀ ਸ਼ੋਅ ‘ਬੇਵਾਚ’ ਵਿੱਚ ਵੀ ਉਸ ਨੇ ਖੂਬ ਆਪਣੇ ਜਲਵੇ ਦਿਖਾਏ ਹਨ। ਪ੍ਰਿਅੰਕਾ ਇੱਕ ਵਾਰ ਫਿਰ ਬਾਲੀਵੁੱਡ ਵਿੱਚ ਸਰਗਰਮ ਹੈ ਅਤੇ ਫਿਲਹਾਲ ਕਈ ਫਿਲਮਾਂ ਦਾ ਹਿੱਸਾ ਹੈ। ਪੇਸ਼ ਹਨ ਉਸ ਨਾਲ ਹੋਈ ਗੱਲਬਾਤ ਦੇ ਕੁਝ ਅੰਸ਼ :
* ਤੁਹਾਡੀ ਪਿਛਲੀ ਹਿੰਦੀ ਫਿਲਮ ‘ਜੈ ਗੰਗਾਜਲ’ ਸਾਲ 2016 'ਚ ਰਿਲੀਜ਼ ਹੋਈ ਸੀ ਤਾਂ ਕੀ ਅਮਰੀਕੀ ਪ੍ਰੋਜੈਕਟਾਂ 'ਚ ਇੰਨੇ ਬਿਜ਼ੀ ਹੋ ਕਿ ਬਾਲੀਵੁੱਡ ਲਈ ਸਮਾਂ ਨਹੀਂ ਨਿਕਲ ਰਿਹਾ?
- ਨਹੀਂ, ਅਜਿਹਾ ਕੁਝ ਨਹੀਂ ਹੈ। ਹਿੰਦੀ ਸਿਨੇਮਾ ਤਾਂ ਮੇਰੀ ਜਾਨ ਹੈ। ਮੈਂ ਇਥੋਂ ਦਾ ਸਾਰਾ ਡਾਂਸ ਅਤੇ ਡਰਾਮਾ ਮਿਸ ਕਰਦੀ ਹਾਂ। ਇਥੇ ਸਾਰੀ ਗੱਲ ਸੱਚ ਦੀ ਹੈ। ਜਦੋਂ ਕੋਈ ਮਰਦ ਕਲਾਕਾਰ ਤਿੰਨ-ਚਾਰ ਸਾਲ ਕੰਮ ਨਹੀਂ ਕਰਦਾ ਤਾਂ ਉਸ ਨੂੰ ਕੋਈ ਸਵਾਲ ਨਹੀਂ ਕਰਦਾ ਕਿ ਉਹ ਅਜਿਹਾ ਕਿਉਂ ਕਰ ਰਿਹਾ ਹੈ, ਪਰ ਜੇ ਮੈਂ ਅਜਿਹਾ ਕੀਤਾ ਤਾਂ ਸਾਰੇ ਸਵਾਲ ਪੁੱਛਣ ਲੱਗੇ। ਸੱਚ ਤਾਂ ਇਹ ਹੈ ਕਿ ਸਿਰਫ ਚੰਗੇ ਰੋਲ ਕਰਨਾ ਚਾਹੁੰਦੀ ਹਾਂ, ਜਿਨ੍ਹਾਂ ਨੂੰ ਮਿਲਣ ਵਿੱਚ ਸਮਾਂ ਲੱਗਦਾ ਹੈ।
* ਤਾਂ ਇਸ ਦਾ ਮਤਲਬ ਤੁਸੀਂ ਜਲਦੀ ਹੀ ਬਾਲੀਵੁੱਡ ਵਿੱਚ ਨਜ਼ਰ ਆਓਗੇ?
- ਬਿਲਕੁਲ, ਫਿਲਹਾਲ ਇੱਕ ਫਿਲਮ ‘ਦਿ ਸਕਾਈ ਇਜ਼ ਪਿੰਕ' ਦਾ ਪੋਸਟ ਪ੍ਰੋਡਕਸ਼ਨ ਦਾ ਕੰਮ ਚੱਲ ਰਿਹਾ ਹੈ ਜਦੋਂ ਕਿ ਦੂਜੀ ਫਿਲਮ ‘ਗੰਗੂਬਾਈ' ਦੀ ਸ਼ੂਟਿੰਗ ਸ਼ੁਰੂ ਹੋ ਚੁੱਕੀ ਹੈ। ਇਸ ਤੋਂ ਇਲਾਵਾ ਦੋ ਹੋਰ ਫਿਲਮਾਂ 'ਚੋਂ ਇੱਕ ‘ਗੁਸਤਾਖੀਆਂ’ ਦੀ ਸ਼ੂਟਿੰਗ ਵੀ ਜਲਦੀ ਸ਼ੁਰੂ ਹੋਣ ਵਾਲੀ ਹੈ ਜਦੋਂ ਕਿ ਦੂਜੀ ਅਮਰੀਕੀ ਫਿਲਮ ‘ਕਾਊਬੁਆਏ ਨਿੰਜਾ ਵਾਈਕਿੰਗ’ ਹੈ।
* ਸੁਣਿਆ ਹੈ ਕਿ ਤੁਸੀਂ ਕਲਪਨਾ ਚਾਵਲਾ ਦੀ ਬਾਇਓਪਿਕ ਕਰਨ ਵਾਲੇ ਹੋ?
- ਕਈ ਫਿਲਮਾਂ ਲਈ ਮੇਰਾ ਨਾਂਅ ਆ ਰਿਹਾ ਹੈ ਅਤੇ ਆਉਂਦਾ ਰਹਿੰਦਾ ਹੈ। ਸੰਜੇ ਲੀਲਾ ਭੰਸਾਲੀ ਸਰ ਨਾਲ ਦੂਜੀ ਫਿਲਮ ਲਈ ਗੱਲ੍ਹ ਜ਼ਰੂਰ ਹੋਈ ਹੈ, ਪਰ ਕਿਸ ਫਿਲਮ ਦੀ ਗੱਲ ਹੋਈ ਹੈ, ਅਜੇ ਦੱਸਣਾ ਠੀਕ ਨਹੀਂ ਹੋਵੇਗਾ। ਉਂਝ ਮੈਂ ਬਹੁਤ ਸਾਰੇ ਫਿਲਮ ਮੇਕਰਸ ਨੂੰ ਮਿਲ ਰਹੀ ਹਾਂ। ਕੁਝ ਫਿਲਮਾਂ ਲਾਕ ਕੀਤੀਆਂ ਹਨ, ਪਰ ਉਸ ਬਾਰੇ ਅਜੇ ਨਹੀਂ ਦੱਸ ਸਕਦੀ। ਉਹ ਕਦੋਂ ਬਣਨਗੀਆਂ, ਇਹ ਵੀ ਪਤਾ ਨਹੀਂ।
* ਪਹਿਲੇ ਗਲੋਬਲ ਇੰਡੀਅਨ ਸਟਾਰ ਹੋਣ ਬਾਰੇ ਕੀ ਕਹੋਗੇ?
-ਮੈਂ ਲੱਕੀ ਹਾਂ ਕਿ ਇਹ ਤਮਗਾ ਮੈਨੂੰ ਮਿਲਿਆ ਹੈ। ਅਜੇ ਬਹੁਤ ਕੁਝ ਕਰਨਾ ਬਾਕੀ ਹੈ। ਜੇ ਮੇਰੀ ਅਜਿਹੀ ਪਛਾਣ ਬਣੀ ਹੈ ਤਾਂ ਮੈਂ ਚਾਹਾਂਗੀ ਕਿ ਇਸ ਦਾ ਫਾਇਦਾ ਦੇਸ਼ ਦੇ ਦੂਜੇ ਕਲਾਕਾਰਾਂ ਨੂੰ ਵੀ ਹੋਵੇ। ਮੇਰੀ ਇੱਛਾ ਹੈ ਕਿ ਇੰਡੀਆ ਤੋਂ ਜ਼ਿਆਦਾ ਤੋਂ ਜ਼ਿਆਦਾ ਟੇਲੈਂਟ ਅਮਰੀਕੀ ਅਤੇ ਵਰਲਡ ਐਂਟਰਟੇਨਮੈਂਟ ਇੰਡਸਟਰੀ ਵਿੱਚ ਆਏ।
* ਕਾਮਯਾਬੀ ਦੇ ਇਸ ਮੋੜ 'ਤੇ ਆ ਕੇ ਪਿੱਛੇ ਮੁੜ ਕੇ ਦੇਖਦੇ ਹੋ ਤਾਂ ਕਿਹੋ ਜਿਹਾ ਲੱਗਦਾ ਹੈ?
- ਸੱਚ ਕਹਾਂ ਤਾਂ ਵਾਕਈ ਸਭ ਕੁਝ ਕਲਪਨਾ ਤੋਂ ਪਰ੍ਹੇ ਲੱਗਦਾ ਹੈ ਕਿਉਂਕਿ ਮੈਂ ਇੰਨੀ ਸੁੰਦਰ ਵੀ ਨਹੀਂ ਸਾਂ ਕਿ ‘ਮਿਸ ਇੰਡੀਆ’ ਵਰਗੀ ਪ੍ਰਤੀਯੋਗਤਾ ਜਿੱਤ ਸਕਦੀ, ਪਰ ਕਿਸਮਤ ਦੀ ਮਿਹਰਬਾਨੀ ਦੇਖੋ ਕਿ ਮੈਂ ‘ਮਿਸ ਵਰਲਡ’ ਬਣ ਗਈ। ਉਸ ਤੋਂ ਬਾਅਦ ਬਾਲੀਵੁੱਡ ਦਾ ਸਫਰ ਸ਼ੁਰੂ ਹੋਇਆ ਜੋ ਹਾਲੀਵੁੱਡ ਤੱਕ ਜਾ ਪਹੁੰਚਿਆ ਹੈ। ਸੁਭਾਵਿਕ ਤੌਰ 'ਤੇ ਇਨ੍ਹਾਂ ਕਾਮਯਾਬੀਆਂ ਦਾ ਮਜ਼ਾ ਲੈ ਰਹੀ ਹਾਂ।
* ਹਾਲੀਵੁੱਡ ਡੈਬਿਊ ਲਈ ‘ਬੇਵਾਚ’ ਵਰਗੀ ਕਮਰਸ਼ੀਅਲ ਫਿਲਮ ਚੁਣਨ ਦੀ ਵਜ੍ਹਾ?
- ਕਈ ਵਜ੍ਹਾ ਰਹੀਆਂ। ‘ਕਵਾਂਟਿਕੋ’ ਦੇ ਕਾਰਨ ਮੈਨੂੰ ਕਾਫੀ ਇੰਟ੍ਰਸਟਿੰਗ ਆਫਰ ਮਿਲੇ, ਪਰ ਮੈਨੂੰ ‘ਬੇਵਾਚ’ ਸਭ ਤੋਂ ਚੰਗਾ ਬਦਲ ਲੱਗਾ ਕਿਉਂਕਿ ਇੱਕ ਇਹ ਵੱਡੀ ਗਲੋਬਲ ਮੂਵੀ ਹੈ ਦੂਜੇ ਮੈਂ ‘ਬੇਵਾਚ’ ਦੀ ਫੈਨ ਹਾਂ। ਇਸ ਤੋਂ ਇਲਾਵਾ ਇਸ 'ਚ ਮੈਨੂੰ ਵਿਲੇਨ ਦਾ ਰੋਲ ਕਰਨ ਦਾ ਮੌਕਾ ਮਿਲ ਰਿਹਾ ਸੀ। ਮੈਂ ਚਾਹੁੰਦੀ ਸੀ ਕਿ ਪਹਿਲੀ ਫਿਲਮ 'ਚ ਕੁਝ ਵੱਖਰਾ ਕਰਾਂ।