ਓਟਵਾ, 29 ਜੁਲਾਈ (ਪੋਸਟ ਬਿਊਰੋ) : ਕੈਨੇਡਾ ਦੇ ਚੀਫ ਇਲੈਕਟੋਰਲ ਅਧਿਕਾਰੀ ਦਾ ਕਹਿਣਾ ਹੈ ਕਿ ਵੋਟਰਜ਼ ਪਹਿਲਾਂ ਤੋਂ ਹੀ ਉਲੀਕੀ ਗਈ ਯੋਜਨਾ ਮੁਤਾਬਕ 21 ਅਕਤੂਬਰ ਨੂੰ ਵੋਟਾਂ ਪਾਉਣਗੇ। ਉਨ੍ਹਾਂ ਆਖਿਆ ਕਿ ਯਹੂਦੀਆਂ ਦੀ ਛੁੱਟੀ ਦੇ ਚੱਲਦਿਆਂ ਵੋਟਿੰਗ ਡੇਅ ਵਿੱਚ ਕੋਈ ਤਬਦੀਲੀ ਨਹੀਂ ਕੀਤੀ ਜਾ ਰਹੀ। 
ਫੈਡਰਲ ਨਿਯਮ ਤਹਿਤ ਚੋਣਾਂ ਵਾਲਾ ਦਿਨ 21 ਅਕਤੂਬਰ ਤੋਂ ਲੇਟ ਨਹੀਂ ਹੋ ਸਕਦਾ। ਜ਼ਿਕਰਯੋਗ ਹੈ ਕਿ ਇਸ ਸਾਲ 21 ਅਕਤੂਬਰ ਨੂੰ ਯਹੂਦੀਆਂ ਦੀ ਛੁੱਟੀ ਸੈæਮਿਨੀ ਐਤਜ਼ਰਤ ਵੀ ਆ ਰਹੀ ਹੈ, ਜਿਸ ਦਿਨ ਕੱਟੜਪੰਥੀ ਯਹੂਦੀਆਂ ਨੂੰ ਕੰਮ ਕਰਨ, ਵੋਟ ਜਾਂ ਕੈਂਪੇਨ ਵਿੱਚ ਹਿੱਸਾ ਲੈਣ ਦੀ ਮਨਾਹੀ ਹੈ। ਇਲੈਕਸ਼ਨ ਕੈਨੇਡਾ ਉੱਤੇ ਵੋਟਾਂ ਵਾਲੀ ਤਾਰੀਕ ਬਦਲਣ ਲਈ ਲਾਬੀਕਾਰਾਂ ਰਾਹੀਂ ਦਬਾਅ ਵੀ ਪਾਇਆ ਗਿਆ ਸੀ। ਪਰ ਚੋਣਾਂ ਦੇ ਐਨੀ ਨੇੜੇ ਆ ਕੇ ਤਰੀਕ ਵਿੱਚ ਤਬਦੀਲੀ ਕਰਨ ਤੋਂ ਇਲੈਕਸ਼ਨ ਕੈਨੇਡਾ ਨੇ ਇਨਕਾਰ ਕਰ ਦਿੱਤਾ। 
ਪਿਛਲੇ ਹਫਤੇ ਅਦਾਲਤ ਨੇ ਚੀਫ ਇਲੈਕਟੋਰਲ ਅਧਿਕਾਰੀ ਸਟੀਫਨ ਪੇਰਾਲਟ ਨੂੰ ਇਸ ਫੈਸਲੇ ਦੇ ਸਬੰਧ ਵਿੱਚ ਇੱਕ ਵਾਰੀ ਮੁੜ ਵਿਚਾਰ ਕਰਨ ਦਾ ਹੁਕਮ ਦਿੱਤਾ ਸੀ ਤੇ ਪ੍ਰਭਾਵਿਤ ਵੋਟਰਾਂ ਦੇ ਚਾਰਟਰ ਅਧਿਕਾਰਾਂ ਦੀ ਉਲੰਘਣਾਂ ਰੋਕਣ ਲਈ ਕੋਈ ਵਿਚਲਾ ਰਾਹ ਕੱਢਣ ਦੀ ਹਦਾਇਤ ਕੀਤੀ ਸੀ। ਪਰ ਪੇਰਾਲਟ ਨੇ ਸੋਮਵਾਰ ਨੂੰ ਇਹ ਸਪਸ਼ਟ ਕਰ ਦਿੱਤਾ ਕਿ ਇਸ ਸਮੇਂ ਉੱਤੇ ਆ ਕੇ ਤਰੀਕ ਵਿੱਚ ਕੀਤੀ ਜਾਣ ਵਾਲੀ ਤਬਦੀਲੀ ਜਨਤਾ ਦੇ ਹਿਤ ਵਿੱਚ ਨਹੀਂ ਹੈ। ਇਸ ਲਈ ਕਿਸੇ ਤਰ੍ਹਾਂ ਦੀ ਤਬਦੀਲੀ ਦੀ ਸਿਫਾਰਿਸ਼ ਨਹੀਂ ਕੀਤੀ ਗਈ ਹੈ।