2014 ਵਿੱਚ ਫਿਲਮ ‘ਫਗਲੀ' ਨਾਲ ਸੁਨਹਿਰੇ ਪਰਦੇ 'ਤੇ ਕਦਮ ਰੱਖਣ ਵਾਲੀ ਕਿਆਰਾ ਅਡਵਾਨੀ ਨੂੰ ਪਿਛਲੇ ਸਾਲ ਵੈੱਬ ਫਿਲਮ ‘ਲਸਟ ਸਟੋਰੀਜ਼’ ਨੇ ਚਮਕਾ ਦਿੱਤਾ। ਇਸ ਵਿੱਚ ਵਿੱਕੀ ਕੌਸ਼ਲ ਦੀ ਪਤਨੀ ਦਾ ਰੋਲ ਨਿਭਾਉਣ ਵਾਲੀ ਕਿਆਰਾ ਦੇ ਰੋਲ ਦੀ ਖੂਬ ਪ੍ਰਸ਼ੰਸਾ ਹੋਈ ਤੇ ਫਿਲਮ ਦੇ ਕੁਝ ਦਿ੍ਰਸ਼ ਸੋਸ਼ਲ ਮੀਡੀਆ 'ਤੇ ਕਾਫੀ ਵਾਇਰਲ ਹੋਏ ਸਨ। ਇਸ ਨਾਲ ਚਰਚਾ ਵਿੱਚ ਆਈ ਕਿਆਰਾ ਦੀ ਝੋਲੀ ਵਿੱਚ ਅਚਾਨਕ ਫਿਲਮਾਂ ਦਾ ਢੇਰ ਲੱਗ ਗਿਆ। ਸਾਲ 2019 ਵਿੱਚ ਕਿਆਰਾ ਲਈ ਬਹੁਤ ਚੰਗਾ ਜਾ ਰਿਹਾ ਹੈ। ਪਹਿਲਾਂ ਫਿਲਮ ‘ਕਲੰਕ’ ਵਿੱਚ ਉਸ ਦੇ ਆਈਟਮ ਗੀਤ ਦੀ ਖੂਬ ਤਾਰੀਫ ਹੋਈ ਅਤੇ ਪਿੱਛੇ ਜਿਹੇ ਰਿਲੀਜ਼ ਰੋਈ ਫਿਲਮ ‘ਕਬੀਰ ਸਿੰਘ’ ਨੇ ਬਾਕਸ ਆਫਿਸ 'ਤੇ ਆਸ ਤੋਂ ਜ਼ਿਆਦਾ ਕਮਾਈ ਕੀਤੀ ਹੈ।
ਉਸ ਦੀ ਝੋਲੀ ਵਿੱਚ ਜੋ ਹੋਰ ਚਾਰ ਫਿਲਮਾਂ ਹਨ, ਉਨ੍ਹਾਂ ਵਿੱਚ ਫਿਲਮ ‘ਗੁੱਡ ਨਿਊਜ਼’ ਇਸ ਸਾਲ ਦਸੰਬਰ ਵਿੱਚ ਰਿਲੀਜ਼ ਹੋਵੇਗੀ। ਉਹ ਇਸ ਫਿਲਮ ਵਿੱਚ ਇੱਕ ਪੰਜਾਬੀ ਕੁੜੀ ਦੇ ਰੋਲ ਵਿੱਚ ਨਜ਼ਰ ਆਏਗੀ। ਇਹ ਰੋਮਾਂਟਿਕ ਕਾਮੇਡੀ ਹੈ। ਫਿਲਮ ਸਰੋਗੇਸੀ ਦੇ ਮੁੱਦੇ ਉੱਤੇ ਆਧਾਰਤ ਹੈ। ਸੂਤਰਾਂ ਦੇ ਮੁਤਾਬਕ ਕਿਆਰਾ ਇੱਕ ਵਾਰ ਫਿਰ ਇਸ ਫਿਲਮ ਵਿੱਚ ਆਪਣਾ ਜ਼ਬਰਦਸਤ ਕਿਰਦਾਰ ਕਰਨ ਵਾਲੀ ਹੈ। ਅਗਲੇ ਸਾਲ ਫਿਲਮ ‘ਲਕਸ਼ਮੀ ਬੰਬ’ ਵੀ ਕਰ ਰਹੀ ਹੈ। ਇਹ ਤਮਿਲ ਫਿਲਮ ‘ਮੁਨੀ 2-ਕੰਚਨਾ’ ਦਾ ਹਿੰਦੀ ਰੀਮੇਕ ਹੋਵੇਗੀ। ਅਗਲੇ ਸਾਲ ਆ ਰਹੀ ਉਸ ਦੀ ਅਗਲੀ ਫਿਲਮ ‘ਸ਼ੇਰਸ਼ਾਹ’ ਹੋਵੇਗੀ, ਜਿਸ ਵਿੱਚ ਸਿਧਾਰਥ ਮਲਹੋਤਰਾ ਕੈਪਟਨ ਵਿਕਰਮ ਬੱਤਰਾ ਦਾ ਰੋਲ ਕਰੇਗਾ। ਫਿਲਮ ਦੀ ਸ਼ੂਟਿੰਗ ਜਲਦੀ ਸ਼ੁਰੂ ਹੋਣ ਵਾਲੀ ਹੈ। ਇਸ ਤੋਂ ਇਲਾਵਾ ਉਹ ਕਾਮੇਡੀ ਫਿਲਮ ‘ਇੰਦੂ ਕੀ ਜਵਾਨੀ' ਵਿੱਚ ਵੀ ਨਜ਼ਰ ਆਏਗੀ।