ਭਾਗਿਆਸ੍ਰੀ ਦੇ ਬੇਟੇ ਅਭਿਮੰਨਿਊ ਦਾਸਾਨੀ ਨੇ ‘ਮਰਦ ਕੋ ਦਰਦ ਨਹੀਂ ਹੋਤਾ’ ਫਿਲਮ ਨਾਲ ਬਾਲੀਵੁੱਡ ਡੈਬਿਊ ਕੀਤਾ ਸੀ। ਇਹ ਫਿਲਮ ਬੇਸ਼ੱਕ ਬਾਕਸ ਆਫਿਸ ਉੱਤੇ ਕੋਈ ਕਮਾਲ ਨਹੀਂ ਦਿਖਾ ਸਕੀ, ਪਰ ਅਨੋਖੀ ਕਹਾਣੀ ਅਤੇ ਅਭਿਮੰਨਿਊ ਦੇ ਐਕਸ਼ਨ ਸੀਨਾਂ ਨੇ ਤਾਰੀਫਾਂ ਜ਼ਰੂਰ ਲਈਆਂ ਸਨ। ਅੱਗੋਂ ਅਭਿਮੰਨਿਊ ‘ਨਿਕੰਮਾ' ਬਣ ਕੇ ਖੁੱਲ੍ਹ ਕੇ ਐਕਸ਼ਨ ਕਰਨ ਦੀ ਤਿਆਰੀ ਵਿੱਚ ਹੈ। ਇਹ ਉਸ ਦੀ ਆਉਣ ਵਾਲੀ ਫਿਲਮ ਦਾ ਨਾਂਅ ਹੈ, ਜੋ ਐਕਸ਼ਨ ਇੰਟਰਟੇਨਰ ਹੋਵੇਗੀ।
ਇਸ ਖਬਰ ਦੀ ਪੁਸ਼ਟੀ ਖੁਦ ਅਭਿਮੰਨਿਊ ਦਾਸਾਨੀ ਨੇ ਕੀਤੀ ਹੈ। ਉਸ ਨੇ ਸੋਸ਼ਲ ਮੀਡੀਆ ਉੱਤੇ ‘ਨਿਕੰਮਾ’ ਦੀ ਪਹਿਲੀ ਝਲਕ ਦਿਖਾਉਂਦੇ ਹੋਏ ਇੱਕ ਤਸਵੀਰ ਸਾਂਝੀ ਕੀਤੀ ਹੈ। ਐਕਸ਼ਨ ਇੰਟਰਟੇਨਰ ਜਾਨਰ ਨੂੰ ਲੈ ਕੇ ਅਭਿਮੰਨਿਊ ਦਾ ਕਹਿਣਾ ਹੈ ਕਿ ਇਹ ਫਿਲਮ ਚੁਣੌਤੀਆਂ ਦਾ ਪੂਰਾ ਭੰਡਾਰ ਹੈ, ਜਿਸ ਨੂੰ ਨਿਭਾਉਣਾ ਬੇਹੱਦ ਰੋਮਾਂਚਕ ਹੋਵੇਗਾ। ਫਿਲਮ ਦਾ ਪਹਿਲਾ ਸ਼ਡਿਊਲ ਖਤਮ ਹੋ ਚੁੱਕਾ ਹੈ, ਇੱਕ ਗਾਣੇ ਅਤੇ ਫਿਲਮ ਦੇ ਕੁਝ ਦਿ੍ਰਸ਼ਾਂ ਦੀ ਸ਼ੂਟਿੰਗ ਹੋ ਚੁੱਕੀ ਹੈ। ‘ਬਾਗੀ’ ਅਤੇ ‘ਹੀਰੋਪੰਤੀ’ ਵਰਗੀਆਂ ਫਿਲਮਾਂ ਦਾ ਨਿਰਦੇਸ਼ਨ ਕਰ ਚੁੱਕੇ ਨਿਰਦੇਸ਼ਕ ਸ਼ੱਬੀਰ ਖਾਨ ‘ਨਿਕੰਮਾ’ ਦਾ ਨਿਰਦੇਸ਼ਨ ਕਰਨਗੇ। ਸ਼ੱਬੀਰ ਜ਼ਬਰਦਸਤ ਐਕਸ਼ਨ ਫਿਲਮਾਂ ਅਤੇ ਨਵੀਆਂ ਪ੍ਰਤਿਭਾਵਾਂ ਨੂੰ ਮੌਕਾ ਦੇਣ ਦੇ ਲਈ ਪ੍ਰਸਿੱਧ ਹਨ। ਇਸ ਫਿਲਮ ਵਿੱਚ ਅਭਿਮੰਨਿਊ ਦੇ ਨਾਲ ਗਾਇਕਾ ਅਤੇ ਸੋਸ਼ਲ ਮੀਡੀਆ ਸੇਂਸ਼ੇਸਨ ਸ਼ਰਲੀ ਸੇਤੀਆ ਵੀ ਹੋਵੇਗੀ।