ਓਟਵਾ, 10 ਅਕਤੂਬਰ (ਪੋਸਟ ਬਿਊਰੋ) : ਪੀਪਲਜ਼ ਪਾਰਟੀ ਆਫ ਕੈਨੇਡਾ ਦੇ ਆਗੂ ਮੈਕਸਿਮ ਬਰਨੀਅਰ ਨੇ ਬੁੱਧਵਾਰ ਸਵੇਰੇ ਇਲੈਕਸ਼ਨਜ਼ ਕੈਨੇਡਾ ਦੇ ਹੈੱਡਕੁਆਰਟਰਜ਼ ਦਾ ਦੌਰਾ ਕਰਕੇ ਆਪਣੀ ਨਵੀਂ ਸਿਆਸੀ ਪਾਰਟੀ ਨੂੰ ਰਜਿਸਟਰ ਕਰਵਾਉਣ ਲਈ ਅਰਜ਼ੀ ਦਿੱਤੀ।
ਇਲੈਕਸ਼ਨਜ਼ ਕੈਨੇਡਾ ਦੇ ਅਧਿਕਾਰੀ ਨੂੰ ਇਸ ਸਬੰਧੀ ਕਾਗਜ਼ਾਤ ਸੌਂਪਣ ਤੋਂ ਬਾਅਦ ਬਰਨੀਅਰ ਨੇ ਆਖਿਆ ਕਿ ਇਹ ਸਾਡੇ ਲਈ ਬਹੁਤ ਵੱਡਾ ਦਿਨ ਹੈ। ਇਹ ਸਾਡੀ ਨਵੀਂ ਪਾਰਟੀ ਦੇ ਨਿਰਮਾਣ ਤੇ ਉਸ ਨੂੰ ਮਾਨਤਾ ਮਿਲਣ ਵੱਲ ਚੁੱਕਿਆ ਗਿਆ ਵੱਡਾ ਕਦਮ ਹੈ। ਜੇ ਇਲੈਕਸ਼ਨਜ਼ ਕੈਨੇਡਾ ਵੱਲੋਂ ਉਨ੍ਹਾਂ ਦੀ ਅਰਜ਼ੀ ਮਨਜ਼ੂਰ ਕਰ ਲਈ ਜਾਂਦੀ ਹੈ ਤਾਂ ਬਰਨੀਅਰ ਵੱਲੋਂ ਭਵਿੱਖ ਵਿੱਚ ਹੋਣ ਵਾਲੀਆਂ ਜਿ਼ਮਨੀ ਚੋਣਾਂ ਵਿੱਚ ਉਮੀਦਵਾਰ ਖੜ੍ਹੇ ਕੀਤੇ ਜਾਣ ਦੀ ਯੋਜਨਾ ਹੈ। ਇਸ ਦੇ ਨਾਲ ਹੀ ਅਗਲੀਆ ਫੈਡਰਲ ਚੋਣਾਂ ਤੱਕ ਬਰਨੀਅਰ ਆਪਣੇ 338 ਉਮੀਦਵਾਰਾਂ ਨੂੰ ਉਤਾਰਨ ਦੀ ਯੋਜਨਾ ਵੀ ਰੱਖਦੇ ਹਨ।
ਇਲੈਕਸ਼ਨਜ਼ ਕੈਨੇਡਾ ਅਨੁਸਾਰ ਬਰਨੀਅਰ ਵੱਲੋਂ ਪਾਰਟੀ ਨੂੰ ਰਜਿਸਟਰ ਕਰਨ ਲਈ ਦਿੱਤੀ ਗਈ ਅਰਜ਼ੀ ਵਿੱਚ, ਉਨ੍ਹਾਂ ਦੀ ਸਿਆਸੀ ਪਾਰਟੀ ਦਾ ਪੂਰਾ ਨਾਂ, ਜੇ ਕੋਈ ਲੋਗੋ ਹੈ ਤਾਂ ਉਸ ਦਾ ਵੇਰਵਾ, ਪਾਰਟੀ ਆਗੂ ਦਾ ਪੂਰਾ ਪਤਾ, ਪਾਰਟੀ ਦੇ ਮੁੱਖ ਆਫਿਸ ਦਾ ਪਤਾ, ਪਾਰਟੀ ਦੇ ਹੋਰਨਾਂ ਅਧਿਕਾਰੀਆਂ ਬਾਰੇ ਜਾਣਕਾਰੀ-ਜਿਵੇਂ ਕਿ ਆਡੀਟਰ, ਸਾਰਿਆਂ ਦੇ ਨਾਂ, ਪਤੇ ਤੇ ਪਾਰਟੀ ਦੇ ਮੈਂਬਰ 250 ਇਲੈਕਟਰਜ਼ ਦੇ ਦਸਤਖ਼ਤ ਆਦਿ ਸ਼ਾਮਲ ਹੋਣੇ ਚਾਹੀਦੇ ਹਨ।
ਇੱਕ ਵਾਰੀ ਫੈਡਰਲ ਇਲੈਕਸ਼ਨਜ਼ ਏਜੰਸੀ ਵੱਲੋਂ ਪੀਪਲਜ਼ ਪਾਰਟੀ ਨੂੰ ਫੈਡਰਲ ਪਾਰਟੀ ਵਜੋਂ ਰਜਿਸਟਰ ਕਰ ਲਏ ਜਾਣ ਤੋਂ ਬਾਅਦ ਪਾਰਟੀ ਜਿ਼ਮਨੀ ਚੋਣਾਂ ਜਾਂ ਜਨਰਲ ਚੋਣਾਂ ਵਿੱਚ ਆਪਣੇ ਉਮੀਦਵਾਰ ਖੜ੍ਹੇ ਕਰ ਸਕੇਗੀ। ਅਜੇ ਤੱਕ ਬਰਨੀਅਰ ਵੱਲੋਂ ਆਪਣੇ ਇਲਾਵਾ ਕਿਸੇ ਹੋਰ ਮੈਂਬਰ ਦਾ ਨਾਂ ਨਹੀਂ ਦੱਸਿਆ ਗਿਆ ਜਿਹੜਾ ਪੀਪਲਜ਼ ਪਾਰਟੀ ਦੇ ਬੈਨਰ ਹੇਠ ਚੋਣ ਲੜੇਗਾ। ਬਰਨੀਅਰ ਦਾ ਕਹਿਣਾ ਹੈ ਕਿ ਉਹ ਜਨਵਰੀ ਤੋਂ ਉਮੀਦਵਾਰਾਂ ਦੀ ਪੁਸ਼ਟੀ ਕਰਨੀ ਸ਼ੁਰੂ ਕਰਨਗੇ।