ਵਾਸ਼ਿੰਗਟਨ, 10 ਅਕਤੂਬਰ, (ਪੋਸਟ ਬਿਊਰੋ)- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਬੁੱਧਵਾਰ ਨੂੰ ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਬਰਾਕ ਓਬਾਮਾ ਲਈ ਮੰਦੀ ਸ਼ਬਦੇ ਵਰਤਦੇ ਹੋਏ ਕਿਹਾ ਕਿ ਦੱਖਣੀ ਚੀਨ ਸਾਗਰ ਬਾਰੇ ਉਨ੍ਹਾਂ ਦਾ ਵਿਹਾਰ ‘ਨਿਪੁੰਸਕ` ਜਿਹਾ ਸੀ। ਉਨ੍ਹਾਂ ਨੇ ਕਿਹਾ ਕਿ ਓਬਾਮਾ ਪ੍ਰਸ਼ਾਸਨ ਦੀ ਕਮਜ਼ੋਰੀ ਕਾਰਨ ਹੀ ਚੀਨ ਇਸ ਇਲਾਕੇ ਵਿੱਚ ਆਪਣੀ ਹਕੂਮਤ ਵਧਾਉਣ ਵਿੱਚ ਸਫਲ ਰਿਹਾ ਸੀ। ਟਰੰਪ ਨੇ ਕਿਹਾ ਕਿ ਓਬਾਮਾ ਪ੍ਰਸ਼ਾਸਨ ਦੀ ਇਸੇ ਕਮਜ਼ੋਰੀ ਦੇ ਕਾਰਨ ਚੀਨ ਅੱਜ ਅਮਰੀਕਾ ਲਈ ਚੁਣੌਤੀ ਬਣ ਕੇ ਖੜ੍ਹਾ ਹੈ।
ਇਸ ਦੌਰਾਨ ਅਮਰੀਕਾ ਦੇ ਵਿਦੇਸ਼ ਮੰਤਰੀ ਮਾਈਕ ਪੋਂਪੀਓ ਨੇ ਇਸ ਹਫਤੇ ਚੀਨੀ ਲੀਡਰਸਿ਼ਪ ਨਾਲ ਹੋਈ ਬੈਠਕ ਦੇ ਬਾਰੇ ਟਰੰਪ ਨੂੰ ਦੱਸਿਆ। ਇਸੇ ਤੋਂ ਕੁਝ ਘੰਟੇ ਬਾਅਦ ਅਮਰੀਕੀ ਰਾਸ਼ਟਰਪਤੀ ਨੇ ਇਹ ਟਿੱਪਣੀ ਕੀਤੀ। ਪੱਤਰਕਾਰਾਂ ਨਾਲ ਗੱਲਬਾਤ ਵਿੱਚ ਟਰੰਪ ਨੇ ਕਿਹਾ ਕਿ ਓਬਾਮਾ ਸਰਕਾਰ ਦੱਖਣੀ ਚੀਨ ਸਾਗਰ ਬਾਰੇ ਕਮਜ਼ੋਰ ਸੀ। ਇਸੇ ਲਈ ਚੀਨ ਦੀ ਨੇਵੀ ਵਿਵਾਦਿਤ ਇਲਾਕੇ `ਚ ਅਮਰੀਕਾ ਦੇ ਸਾਹਮਣੇ ਚੁਣੌਤੀ ਬਣ ਕੇ ਖੜ੍ਹੀ ਹੈ।
ਵਰਨਣ ਯੋਗ ਹੈ ਕਿ ਦੱਖਣੀ ਚੀਨ ਸਾਗਰ ਬਾਰੇ ਚੀਨ ਦਾ ਵੱਖ-ਵੱਖ ਦੇਸ਼ਾਂ ਨਾਲ ਝਗੜਾ ਹੈ। ਪੂਰਬੀ ਸਾਗਰ ਬਾਰੇ ਉਸ ਦਾ ਜਾਪਾਨ ਨਾਲ ਵੀ ਵਿਵਾਦ ਚੱਲ ਰਿਹਾ ਹੈ। ਦੋਵੇਂ ਖੇਤਰ ਖਣਜ ਪਦਾਰਥਾਂ, ਤੇਲ ਤੇ ਹੋਰ ਕੁਦਰਤੀ ਸਾਧਨਾਂ ਵਾਲੇ ਹਨ। ਅਮਰੀਕਾ ਅਕਸਰ ਇਸ ਖੇਤਰ `ਚ ਗਸ਼ਤ ਕਰਦਾ ਰਹਿੰਦਾ ਹੈ। ਇਸ ਖੇਤਰ `ਤੇ ਆਪਣੇ ਕੰਟਰੋਲ ਸਥਾਪਿਤ ਕਰਨ ਲਈ ਚੀਨ ਨੇ ਕਈ ਟਾਪੂਆਂ `ਤੇ ਆਪਣੀਆਂ ਫੌਜੀ ਚੌਕੀਆਂ ਸਥਾਪਿਤ ਕੀਤੀਆਂ ਹਨ।