(ਹਰਜੀਤ ਬੇਦੀ): ਬਰੈਂਪਟਨ ਦੀ ਸਰਗਰਮ ਰੈੱਡ ਵਿੱਲੋ ਸੀਨੀਅਰਜ਼ ਕਲੱਬ ਆਪਣੇ ਮੈਂਬਰਾਂ ਦੇ ਮਨੋਰੰਜਨ ਲਈ ਟਰਿੱਪ ਅਤੇ ਮੇਲਿਆ ਵਿੱਚ ਜਾਣ ਦਾ ਪਰਬੰਧ ਕਰ ਕੇ ਆਪਣੇ ਮੈਂਬਰਾਂ ਦੇ ਮਨੋਰੰਜਨ ਅਤੇ ਸੈਰ ਸਪਾਟੇ ਦਾ ਕੋਈ ਮੌਕਾ ਹੱਥੋਂ ਨਹੀਂ ਜਾਣ ਦਿੰਦੀ। ਆਪਣੀ ਇਸ ਪਰੰਪਰਾ ਅਨੁਸਾਰ ਪਿਛਲੇ ਦਿਨੀਂ ਕਲੱਬ ਵਲੋਂ ਪਰਧਾਨ ਗੁਰਨਾਮ ਸਿੰਘ ਗਿੱਲ ਦੀ ਰਹਿਨੁਮਾਈ ਵਿੱਚ ਸੈਂਟਰ ਆਈਲੈਂਡ ਟੋਰਾਂਟੋ ਂ ਵਿੱਚ ਲੱਗੇ 47ਵੇਂ ਫੈਸਟੀਵਾਲ ਇੰਡੀਆ ਵਿੱਚ ਜਾਣ ਦਾ ਪਰਬੰਧ ਕੀਤਾ ਗਿਆ। ਔਰਤਾਂ ਅਤੇ ਮਰਦ ਮੈਂਬਰ ਤਿੰਨ ਬੱਸਾਂ ਵਿੱਚ ਸਵਾਰ ਹੋ ਕੇ ਸਵੇਰੇ ਤਕਰੀਬਨ 9:30 ਵਜੇ ਡਾਊਨ ਟੋਰਾਂਟੋ ਲਈ ਚੱਲ ਪਏ। ਇਸ ਦਾ ਪਰਬੰਧ ਬਹੁਤ ਹੀ ਸੁਚੱਜੇ ਢੰਗ ਨਾਲ ਨਾਲ ਅਮਰਜੀਤ ਸਿੰਘ, ਜੋਗੰਦਰ ਸਿੰਘ ਪੱਡਾ, ਮਾਸਟਰ ਕੁਲਵੰਤ ਸਿੰਘ,ਸਿ਼ਵਦੇਵ ਸਿੰਘ ਰਾਏ, ਮਹਿੰਦਰ ਕੌਰ ਪੱਡਾ, ਨਿਰਮਲਾ ਪਰਾਸ਼ਰ ਅਤੇ ਬਲਜੀਤ ਸੇਖੋਂ ਅਤੇ ਇੰਦਰਜੀਤ ਗਿੱਲ ਦੀ ਟੀਮ ਦੁਆਰਾ ਕੀਤਾ ਗਿਆ। ਟੋਰਾਂਟੋ ਪਹੁੰਚ ਕੇ ਫੈਰੀ ਰਾਹੀਂ ਸੈਂਟਰ ਆਈਲੈਂਡ ਜਾਣ ਲਈ ਲੰਬੀ ਲਾਈਨ ਵਿੱਚ ਲੱਗਣਾ ਪਿਆ ਕਿਉਂਕਿ ਇਸ ਦਿਨ ਫੈਸਟੀਵਲ ਕਾਰਣ ਭੀੜ ਬਹੁਤ ਸੀ। ਫੈਰੀ ਦੇ ਸਫਰ ਦੌਰਾਨ ਸਾਹਮਣੇ ਟੋਰਾਂਟੋ ਦੀਆਂ ਉਚੀਆਂ ਬਿਲਡਿੰਗਾਂ ਖਾਸ ਤੌਰ ਤੇ ਸੀ ਐਨ ਟਾਵਰ ਦਾ ਨਜਾਰਾ ਬਹੁਤ ਹੀ ਖੂਬਸੂਰਤ ਲਗਦਾ ਸੀ।
ਸੈਂਟਰ ਆਈਲੈਂਡ ਵਿੱਚ ਵੱਖੋ ਵੱਖ ਰੰਗਾਂ ਨਸਲਾਂ ਦੇ ਲੋਕਾਂ ਦਾ ਠਾਠਾਂ ਮਾਰਦਾ ਇਕੱਠ ਬੜਾ ਹੀ ਦਿਲਕਸ਼ ਲੱਗ ਰਿਹਾ ਸੀ। ਮੈਂਬਰਾਂ ਨੇ ਉੱਥੇ ਪਹੁੰਚ ਕੇ ਇਕੱਠੇ ਹੋ ਕੇ ਚਾਹ ਪਾਣੀ ਦਾ ਆਨੰਦ ਮਾਣਿਆ ਅਤੇ ਅੱਡ ਅੱਡ ਗਰੁੱਪਾਂ ਵਿੱਚ ਫੈਸਟੀਵਲ ਦੀਆਂ ਆਈਟਮਾਂ ਦੇਖਣ ਦਾ ਮੌਕਾ ਪ੍ਰਾਪਤ ਕੀਤਾ। ਫੈਸਟੀਵਲ ਵਿੱਚ ਵੱਖ ਵੱਖ ਤਰ੍ਹਾਂ ਦੇ ਸਮਾਨ ਦੀ ਨੁਮਾਇਸ਼ ਲੱਗੀ ਹੋਈ ਸੀ ਕੁੱਝ ਇੱਕ ਨੇ ਨਿਸ਼ਾਨੀ ਵਜੋਂ ਛੋਟੀਆਂ ਛੋਟੀਆਂ ਚੀਜਾਂ ਦੀ ਖਰੀਦਦਾਰੀ ਕੀਤੀ। ਹਰੇ ਰਾਮਾ ਮਿਸ਼ਨ ਦੁਆਰਾ ਕਰਵਾਏ ਜਾਂਦੇ ਇਸ ਫੈਸਟੀਵਲ ਵਿੱਚ ਸਾਦੇ ਪਰ ਸੁਆਦੀ ਸ਼ਾਕਾਹਾਰੀ ਲੰਗਰ ਦਾ ਖੁੱਲ੍ਹਾ ਪਰਬੰਧ ਹੁੰਦਾ ਹੈ ਜਿੱਥੋਂ ਮੈਬਰਾ ਨੇ ਲੋੜ ਅਨੁਸਾਰ ਪੇਟ-ਪੂਰਤੀ ਕੀਤੀ। ਇਸ ਬਾਅਦ ਫਿਰ ਪੰਡਾਲ ਵਿੱਚ ਜਾ ਕੇ ਕਲਾਸੀਕਲ ਨਾਚ, ਗੀਤਾਂ ਅਤੇ ਨਾਟਕੀ ਝਾਕੀਆ ਦਾ ਆਨੰਦ ਮਾਣਦੇ ਰਹੇ।
ਬਹੁਤ ਸਾਰੇ ਮੈਂਬਰਾਂ ਨੇ ਸੁੰਦਰ ਅਤੇ ਵਿਸ਼ਾਲ ਪਾਰਕ ਦੀ ਸੈਰ ਕੀਤੀ। ਲੇਕ ਤੇ ਬੀਚ `ਤੇ ਗੇੜਾ ਲਾਇਆ। ਬੀਬੀਆਂ ਨੇ ਪਾਰਕ ਦੇ ਇੱਕ ਹਿੱਸੇ ਵਿੱਚ ਇਕੱਠੇ ਹੋ ਕੇ ਆਪਣੇ ਬਚਪਨ ਨੂੰ ਯਾਦ ਤਾਜਾ ਕਰਦੇ ਹੋਏ ਗਿੱਧੇ ਦਾ ਪਿੜ ਭਖਾ ਲਿਆ। ਦੂਜੀਆਂ ਕਮਿਊਨਿਟੀਆਂ ਦੇ ਲੋਕ ਗਿੱਧੇ ਵਿੱਚ ਬੋਲੀਆਂ ਪਾਕੇ ਨੱਚ ਰਹੀਆਂ ਬੀਬੀਆਂ ਦੀ ਕਲਾ ਨੇ ਮੰਤਰ ਮੁਗਧ ਕਰ ਦਿੱਤੇ । ਕਲੱਬ ਸਬੰਧੀ ਕਿਸੇ ਵੀ ਪ੍ਰਕਾਰ ਦੀ ਜਾਣਕਾਰੀ ਲਈ ਪਰਧਾਨ ਗੁਰਨਾਮ ਸਿੰਘ ਗਿੱਲ 416-908-1300, ਜਨਰਲ ਸਕੱਤਰ ਕੁਲਵੰਤ ਸਿੰਘ 647-202-7696, ਉੱੱਪ-ਪਰਧਾਨ ਅਮਰਜੀਤ ਸਿੰਘ 416-268-6821,ਪਰਮਜੀਤ ਬੜਿੰਗ 647-963-0331, ਜੋਗਿੰਦਰ ਸਿੰਘ ਪੱਡਾ 416-219-2542 ਜਾਂ ਸਿ਼ਵਦੇਵ ਸਿੰਘ ਰਾਏ 647-643-6396 ਨਾਲ ਸੰਪਰਕ ਕੀਤਾ ਜਾ ਸਕਦਾ ਹੈ।