ਓਨਟਾਰੀਓ, 23 ਜੁਲਾਈ (ਪੋਸਟ ਬਿਊਰੋ) : ਨਵੀਆਂ ਸਕੂਲੀ ਇਮਾਰਤਾਂ ਤੇ ਚਾਈਲਡ ਕੇਅਰ ਸਪੇਸਿਜ਼ ਦੇ ਪਸਾਰ ਵਿੱਚ ਮਦਦ ਕਰਨ ਲਈ ਓਨਟਾਰੀਓ ਸਰਕਾਰ ਆਪਣੇ ਸਕੂਲ ਬੋਰਡਜ਼ ਭਾਈਵਾਲਾਂ ਨਾਲ ਰਲ ਕੇ ਕੰਮ ਕਰ ਰਹੀ ਹੈ। ਇਸ ਤੋਂ ਇਲਾਵਾ ਵੱਡੀਆਂ ਮੁਰੰਮਤਾਂ ਤੇ ਮੌਜੂਦਾ ਸਕੂਲੀ ਇਮਾਰਤਾਂ ਵਿੱਚ ਵਾਧੇ ਲਈ ਵੀ ਕੰਮ ਕੀਤਾ ਜਾ ਰਿਹਾ ਹੈ।
ਅੱਜ ਓਨਟਾਰੀਓ ਸਰਕਾਰ ਵੱਲੋਂ 2019-20 ਕੈਪੀਟਨ ਪ੍ਰਾਇਰਟੀਜ਼ ਪ੍ਰੋਗਰਾਮ ਲਾਂਚ ਕੀਤਾ ਗਿਆ। ਇਸ ਤਹਿਤ ਪ੍ਰੋਵਿੰਸ ਦੇ ਹਰੇਕ ਰੀਜਨ ਵਿੱਚ ਵੱਡੀ ਸਕੇਲ ਦੇ ਪ੍ਰੋਜੈਕਟਸ ਲਈ ਫੰਡ ਹਾਸਲ ਕਰਨ ਵਾਸਤੇ ਸਕੂਲ ਬੋਰਡਜ਼ ਨੂੰ ਪੂਰਾ ਮੌਕਾ ਮਿਲੇਗਾ। ਸਿੱਖਿਆ ਮੰਤਰੀ ਸਟੀਫਨ ਲੈਸੇ ਨੇ ਆਖਿਆ ਕਿ ਨਵੇਂ ਸਕੂਲਾਂ ਦਾ ਨਿਰਮਾਣ ਕਰਕੇ ਤੇ ਮੌਜੂਦਾ ਸਕੂਲਾਂ ਦੀ ਮੁਰੰਮਤ ਕਰਕੇ ਅਸੀਂ ਆਪਣੇ ਵਿਦਿਆਰਥੀਆਂ ਤੇ ਉਨ੍ਹਾਂ ਦੇ ਭਵਿੱਖ ਵਿੱਚ ਨਿਵੇਸ਼ ਕਰ ਰਹੇ ਹਾਂ। ਉਨ੍ਹਾਂ ਇਹ ਵੀ ਆਖਿਆ ਕਿ ਬਿਹਤਰ ਸਕੂਲਾਂ ਤੋਂ ਭਾਵ ਹੈ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਸਿੱਖਣ ਲਈ ਬਿਹਤਰ ਮਾਹੌਲ।
ਹੁਣ ਸਕੂਲ ਬੋਰਡਜ਼ 2023-24 ਤੱਕ ਮੁਕੰਮਲ ਹੋਣ ਵਾਲੀਆਂ ਨਵੀਆਂ ਸਕੂਲੀ ਇਮਾਰਤਾਂ ਜਾਂ ਮੁਰੰਮਤ ਦੇ ਕੰਮ ਲਈ ਫੰਡ ਹਾਸਲ ਕਰਨ ਵਾਸਤੇ ਅਪਲਾਈ ਕਰ ਸਕਣਗੇ। ਇਸ ਪ੍ਰੋਗਰਾਮ ਤਹਿਤ ਸਕੂਲ ਆਧਾਰਿਤ ਚਾਈਲਡ ਕੇਅਰ ਸਪੇਸਿਜ਼ ਲਈ ਵੀ ਫੰਡ ਮੁਹੱਈਆ ਕਰਵਾਏ ਜਾਣਗੇ। ਸਰਕਾਰ ਵੱਲੋਂ 10,000 ਨਵੀਆਂ ਚਾਈਲਡ ਕੇਅਰ ਸਪੇਸਿਜ਼ ਸਕੂਲਾਂ ਵਿੱਚ ਬਣਾਉਣ ਦਾ ਜਿਹੜਾ ਵਾਅਦਾ ਕੀਤਾ ਗਿਆ ਸੀ ਇਹ ਉਸ ਦਾ ਹੀ ਹਿੱਸਾ ਹੈ।
ਇੱਥੇ ਦੱਸਣਾ ਬਣਦਾ ਹੈ ਕਿ ਸਰਕਾਰ ਨੇ 2019 ਦੇ ਬਜਟ ਵਿੱਚ ਅਗਲੇ ਦਸ ਸਾਲਾਂ ਵਿੱਚ 13 ਬਿਲੀਅਨ ਡਾਲਰ ਕੈਪੀਟਲ ਗ੍ਰਾਂਟਸ ਵਿੱਚ ਖਰਚਣ ਦਾ ਟੀਚਾ ਮਿਥਿਆ ਸੀ ਤੇ ਸਰਕਾਰ ਇਸ ਪ੍ਰੋਗਰਾਮ ਲਈ ਵੀ ਕਈ ਮਿਲੀਅਨ ਡਾਲਰ ਖਰਚਣ ਦੇ ਹੱਕ ਵਿੱਚ ਹੈ ਤਾਂ ਕਿ ਬੱਚਿਆਂ ਦਾ ਭਵਿੱਖ ਸੰਵਾਰਿਆ ਜਾ ਸਕੇ।