ਯੇਰੂਸ਼ਲਮ, 10 ਅਕਤੂਬਰ (ਪੋਸਟ ਬਿਊਰੋ)- ਦੁਨੀਆ ਭਰ ਨੂੰ ਹਥਿਆਰ ਵੇਚਣ ਵਾਲੇ ਅਮਰੀਕਾ ਨੇ ਆਪਣੀ ਫੌਜ ਲਈ ਬਖਤਰਬੰਦ ਵਾਹਨਾਂ ਦੀ ਸੁਰੱਖਿਆ ਵਾਸਤੇ ਇਜ਼ਰਾਈਲ ਤੋਂ ਫ਼ੌਜੀ ਹਥਿਆਰ ਸਿਸਟਮ ‘ਟਰਾਫੀ` ਨੂੰ ਖ਼ਰੀਦਣ ਦਾ ਸੌਦਾ ਕੀਤਾ ਹੈ। ਅਮਰੀਕਾ ਨੂੰ ਇਹ ਪ੍ਰਣਾਲੀ 50 ਕਰੋੜ ਡਾਲਰ ਵਿੱਚ ਮਿਲੇਗਾ।
ਮਿਲੀ ਜਾਣਕਾਰੀ ਅਨੁਸਾਰ ਟਰਾਫੀ ਫ਼ੌਜੀ ਵਾਹਨਾਂ ਨੂੰ ਮਿਜ਼ਾਈਲ ਅਤੇ ਮੋਰਟਾਰ ਹਮਲੇ ਤੋਂ ਬਚਾਉਂਦੀ ਹੈ। ਇਸ ਦੇ ਨਾਲ ਹੀ ਇਹ ਫ਼ੌਜੀ ਵਾਹਨਾਂ ਵੱਲੋਂ ਆਈ ਮਿਜ਼ਾਈਲ ਅਤੇ ਮੋਰਟਾਰ ਨੂੰ ਤਬਾਹ ਕਰਨ ਦੀ ਸਮਰੱਥਾ ਰੱਖਦੀ ਹੈ। ਇਸ ਨੂੰ ਇਜ਼ਰਾਈਲੀ ਕੰਪਨੀ ਰਫਾਇਲ ਐਡਵਾਂਸ ਡਿਫੈਂਸ ਸਿਸਟਮ ਨੇ ਬਣਾਇਆ ਹੈ। ਪਿਛਲੇ ਸਾਲ ਜੂਨ `ਚ ਵੀ ਅਮਰੀਕੀ ਫ਼ੌਜ ਨੇ ਆਪਣੇ ਏਬਰੈਮਸ ਟੈਂਕਾਂ ਦੀ ਸੁਰੱਖਿਆ ਲਈ ਰਫਾਇਲ ਤੋਂ 19.3 ਕਰੋੜ ਡਾਲਰ ਵਿੱਚ ਇਹ ਸਿਸਟਮ ਖਰੀਦ ਕੀਤਾ ਸੀ। ਉਸ ਨੇ ਜ਼ਿਆਦਾ ਟੈਂਕਾਂ ਦੀ ਸੁਰੱਖਿਆ ਲਈ ਨਵਾਂ ਸਮਝੌਤਾ ਕੀਤਾ ਹੈ। ਰਫਾਇਲ ਅਮਰੀਕੀ ਫ਼ੌਜ ਨੂੰ ਟਰਾਫੀ ਦਾ ਹਲਕਾ ਐਡੀਸ਼ਨ ਵੇਚਣ ਦੀ ਯੋਜਨਾ `ਤੇ ਵਿਚਾਰ ਕਰ ਰਹੀ ਹੈ। ਇਸ ਨਾਲ ਅਮਰੀਕੀ ਬਖਤਰਬੰਦ ਟੈਂਕਾਂ ਬ੍ਰੈਡਲੀ ਅਤੇ ਸਟਰਾਈਕਰ ਦੀ ਸੁਰੱਖਿਆ ਹੋ ਸਕੇਗੀ। ਟਰਾਫੀ ਦਾ ਹਲਕਾ ਐਡੀਸ਼ਨ ਵੀ 300 ਤੋਂ ਜ਼ਿਆਦਾ ਟੈਂਕ ਰੋਕੂ ਮਿਜ਼ਾਈਲ ਅਤੇ ਮੋਰਟਾਰ ਨੂੰ ਰੋਕਣ ਦੀ ਸਮਰੱਥਾ ਰੱਖਦਾ ਹੈ।