ਬੀਜਿੰਗ, 17 ਜੁਲਾਈ (ਪੋਸਟ ਬਿਊਰੋ)- ਸ੍ਰੀਲੰਕਾ ਨੂੰ ਆਕਰਸ਼ਿਤ ਕਰਨ ਦੀਆਂ ਕੋਸ਼ਿਸ਼ਾਂ ਦੇ ਲਈ ਚੀਨ ਨੇ ਉਸ ਨੂੰ ਇੱਕ ਜੰਗੀ ਬੇੜਾ (ਪੀ 625) ਤੋਹਫੇ ਵਿੱਚ ਦਿੱਤਾ ਹੈ। ਪਿਛਲੇ ਹਫਤੇ ਇਹ ਕੋਲੰਬੋ ਪਹੁੰਚ ਗਿਆ। ਇਸ ਨੂੰ ਚੀਨ ਵੱਲੋਂ ਹਿੰਦ ਮਹਾਸਾਗਰ ਵਿੱਚ ਦਬਦਬਾ ਵਧਾਉਣ ਦੀ ਜੁਗਤ ਦੇ ਤੌਰ 'ਤੇ ਦੇਖਿਆ ਜਾ ਰਿਹਾ ਹੈ।
ਦੱਸਣਾ ਬਣਦਾ ਹੈ ਕਿ 052 ਟਾਈਪ ਦੇ ਇਸ ਜੰਗੀ ਬੇੜੇ ਨੂੰ ਚੀਨ ਦੀ ਸਮੁੰਦਰੀ ਫੌਜ ਵਿੱਚ 1994 ਵਿੱਚ ਸ਼ਾਮਲ ਕੀਤਾ ਗਿਆ ਸੀ। 2300 ਟਨ ਵਜ਼ਨੀ ਇਸ ਜੰਗੀ ਬੇੜੇ ਨੂੰ 2014 ਵਿੱਚ ਸਮੰੁਦਰੀ ਫੌਜ ਤੋਂ ਰਿਟਾਇਰ ਕਰ ਦਿੱਤਾ ਗਿਆ ਸੀ। ਇਸ ਦੇ ਬਾਅਦ ਇਸ ਨੂੰ ਸ੍ਰੀਲੰਕਾ ਨੇਵੀ ਨੂੰ ਤੋਹਫੇ ਵਿੱਚ ਦਿੱਤਾ ਗਿਆ। ਸ੍ਰੀਲੰਕਾ ਸਮੁੰਦਰੀ ਫੌਜ ਦੇ ਕਮਾਂਡਰ ਵਾਈਸ ਐਡਮਿਰਲ ਪਿਅਲ ਡੀਸਿਲਵਾ ਨੇ ਜੰਗੀ ਬੇੜੇ ਦੇ ਲਈ ਚੀਨ ਨੂੰ ਧੰਨਵਾਦ ਕੀਤਾ ਹੈ। ਸ੍ਰੀਲੰਕਾ ਦੀ ਸਮੰੁਦਰੀ ਫੌਜ ਨੇ ਲਿੱਟੇ ਦੇ ਖਿਲਾਫ ਸੰਘਰਸ਼ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ। ਮੌਜੂਦਾ ਸਮੇਂ ਵਿੱਚ ਉਸ ਦੇ ਕੋਲ ਕਰੀਬ 50 ਲੜਾਕੂ, ਸਪੋਰਟ ਸ਼ਿਪ ਅਤੇ ਸਮੁੰਦਰੀ ਇਲਾਕਿਆਂ ਦੀ ਨਿਗਰਾਨੀ ਦੇ ਲਈ ਗਸ਼ਤੀ ਪਲੇਨ ਹਨ, ਜੋ ਮੁੱਖ ਰੂਪ ਤੋਂ ਭਾਰਤ, ਅਮਰੀਕਾ, ਚੀਨ ਅਤੇ ਇਜਰਾਈਲ ਤੋਂ ਮਿਲੇ ਹਨ।