ਕੇਪ ਕੈਨੇਵਰਲ, 17 ਜੁਲਾਈ (ਪੋਸਟ ਬਿਊਰੋ)- ਅੱਜ ਤੋਂ 50 ਸਾਲ ਪਹਿਲੇ 16 ਜੁਲਾਈ 1969 ਨੂੰ ਚੰਦਰਮਾ ਉੱਤੇ ਪਹਿਲੀ ਸਫਲ ਮਨੁੱਖੀ ਮੁਹਿੰਮ ਅਪੋਲੋ-11 ਨੂੰ ਭੇਜਿਆ ਗਿਆ ਸੀ। ਇਸ ਮੌਕੇ ਉਸ ਮੁਹਿੰਮ ਵਿੱਚ ਸ਼ਾਮਲ ਰਹੇ ਅਮਰੀਕੀ ਪੁਲਾੜ ਯਾਤਰੀ ਫਿਰ ਕੈਨੇਡੀ ਸਪੇਸ ਸੈਂਟਰ ਦੇ ਉਸ ਸਥਾਨ 'ਤੇ ਇਕੱਠੇ ਹੋਏ, ਜਿਥੋਂ ਉਨ੍ਹਾਂ ਦੇ ਪੁਲਾੜ ਜਹਾਜ਼ ਨੇ ਚੰਦਰਮਾ ਲਈ ਉਡਾਣ ਭਰੀ ਸੀ। ਕੱਲ੍ਹ ਇਸ ਪ੍ਰੋਗਰਾਮ ਵਿੱਚ ਪੁਲਾੜ ਯਾਤਰੀ ਐਡਵਿਨ ਐਲਡਰਿਨ (89) ਤੇ ਮਾਈਕਲ ਕੋਲਿਨਸ (88) ਨੇ ਅਪੋਲੋ-11 ਦੀ 50ਵੀਂ ਵਰ੍ਹੇਗੰਡ ਦੇ ਜਸ਼ਨ ਦੀ ਸ਼ੁਰੂਆਤ ਕੀਤੀ ਜੋ ਇਕ ਹਫਤੇ ਤੱਕ ਜਾਰੀ ਰਹੇਗਾ।
ਅਪੋਲੋ-11 ਦੇ ਕਮਾਂਡਰ ਅਤੇ ਚੰਦਰਮਾ ਦੀ ਜ਼ਮੀਨ 'ਤੇ ਪਹਿਲਾ ਕਦਮ ਰੱਖਣ ਵਾਲੇ ਨੀਲ ਆਰਮਸਟਰਾਂਗ ਦਾ 2012 ਵਿੱਚ ਦੇਹਾਂਤ ਹੋ ਗਿਆ ਸੀ। ਇਸ ਲਈ ਇਸ ਪ੍ਰੋਗਰਾਮ ਵਿੱਚ ਸਭ ਦੀਆਂ ਨਜ਼ਰਾਂ ਐਲਡਰਿਨ 'ਤੇ ਹੀ ਟਿੱਕੀਆਂ ਸਨ, ਜੋ ਨੀਲ ਪਿੱਛੋਂ ਚੰਦਰਮਾ 'ਤੇ ਉਤਰੇ ਸਨ। ਚੰਦਰਮਾ 'ਤੇ ਅੱਜ ਤੱਕ ਕੇਵਲ 12 ਲੋਕ ਉਤਰੇ ਹਨ, ਜਿਨ੍ਹਾਂ ਵਿੱਚੋਂ ਚਾਰ ਹੀ ਜ਼ਿੰਦਾ ਹਨ। ਅਮਰੀਕੀ ਪੁਲਾੜ ਜਹਾਜ਼ ਨੂੰ ਚੰਦਰਮਾ 'ਤੇ ਉਤਰਨ ਲਈ ਚਾਰ ਦਿਨ ਲੱਗੇ ਸਨ। 20 ਜੁਲਾਈ 1969 ਨੂੰ ਜਹਾਜ਼ ਚੰਦਰਮਾ ਦੀ ਸਤ੍ਹਾ 'ਤੇ ਉਤਰਿਆ ਸੀ। ਇਸ ਪਿੱਛੋਂ ਨੀਲ ਚੰਦਰਮਾ ਦੀ ਸਤ੍ਹਾ ਉਤੇ ਉਤਰਨ ਵਾਲੇ ਦੁਨੀਆ ਦੇ ਪਹਿਲੇ ਅਤੇ ਐਲਡਰਿਨ ਦੂਜੇ ਵਿਅਕਤੀ ਬਣੇ ਸਨ। ਕੋਲਿਨਸ ‘ਕੋਲੰਬੀਆ' ਨਾਮਕ ਮੁੱਖ ਜਹਾਜ਼ ਵਿੱਚ ਰੁਕੇ ਸਨ। ਇਸ ਜਹਾਜ਼ ਰਾਹੀਂ ਤਿੰਨੋਂ ਧਰਤੀ 'ਤੇ ਪਰਤੇ ਸਨ। ਅਪੋਲੋ-11 ਕਿਸੇ ਆਕਾਸ਼ੀ ਪਿੰਡ 'ਤੇ ਮਨੁੱਖ ਨੂੰ ਉਤਾਰਨ ਦੀ ਪਹਿਲੀ ਮੁਹਿੰਮ ਸੀ ਜਿਸ ਦੀ ਸਫਲਤਾ ਨੇ ਪੁਲਾੜ ਵਿਗਿਆਨ ਦੇ ਖੇਤਰ ਵਿੱਚ ਨਵਾਂ ਕੀਰਤੀਮਾਨ ਰੱਚ ਦਿੱਤਾ।