ਓਟਵਾ, 16 ਜੁਲਾਈ (ਪੋਸਟ ਬਿਊਰੋ) : ਕਿਊਬਿਕ ਵਿੱਚ ਐਨਡੀਪੀ ਦੀ ਮੌਜੂਦਾ ਸਥਿਤੀ ਦੇ ਬਾਵਜੂਦ ਨੈਸ਼ਨਲ ਡੈਮੋਕ੍ਰੈਟਿਕ ਪਾਰਟੀ ਦੇ ਆਗੂ ਜਗਮੀਤ ਸਿੰਘ ਦਾ ਕਹਿਣਾ ਹੈ ਕਿ ਪ੍ਰੋਵਿੰਸ ਵਿੱਚ ਸਾਡੀ ਪਾਰਟੀ ਦੇ ਪੱਲਰਣ ਦੀ ਸੰਭਾਵਨਾ ਕਾਫੀ ਜਿ਼ਆਦਾ ਹੈ।
ਇੱਕ ਇੰਟਰਵਿਊ ਵਿੱਚ ਜਗਮੀਤ ਸਿੰਘ ਨੇ ਆਖਿਆ ਕਿ ਪ੍ਰੋਵਿੰਸ ਵਿੱਚ ਪਾਰਟੀ ਦੀ ਜਿੱਤ ਦੀ ਸੰਭਾਵਨਾ ਨੂੰ ਲੈ ਕੇ ਉਹ ਚਿੰਤਤ ਨਹੀਂ ਹਨ। ਉਨ੍ਹਾਂ ਆਖਿਆ ਕਿ ਸਾਬਕਾ ਆਗੂ ਜੈੱਕ ਲੇਯਟਨ ਨੂੰ ਵੀ 2011 ਦੀਆਂ ਚੋਣਾਂ ਤੋਂ ਪਹਿਲਾਂ ਅਜਿਹੇ ਹਾਲਾਤ ਦਾ ਹੀ ਸਾਹਮਣਾ ਕਰਨਾ ਪਿਆ ਸੀ ਪਰ ਪਾਰਟੀ ਨੇ ਉਸ ਸਮੇਂ ਵੀ ਕਿਊਬਿਕ ਵਿੱਚ ਆਪਣੀ ਚੰਗੀ ਪੈਠ ਬਣਾ ਲਈ ਸੀ। ਜਗਮੀਤ ਸਿੰਘ ਸੋਮਵਾਰ ਨੂੰ ਮਾਂਟਰੀਅਲ ਵਿੱਚ ਸਨ ਤੇ ਅੱਜ ਉਹ ਸ਼ੇਰਬਰੁੱਕ ਪਹੁੰਚ ਗਏ ਹਨ। ਇੱਥੇ ਐਨਡੀਪੀ ਕਲਾਈਮੇਟ ਚੇਂਜ ਨਾਲ ਨਜਿੱਠਣ ਲਈ ਤੇ ਟਰਾਂਜਿ਼ਟ ਨਿਵੇਸ਼ ਦੇ ਹਿੱਸੇ ਵਜੋਂ ਦੋ ਸ਼ਹਿਰਾਂ ਦਰਮਿਆਨ ਟਰੇਨ ਟਰੈਕ ਬਣਾਉਣ ਦਾ ਵਾਅਦਾ ਕਰ ਰਹੀ ਹੈ।
ਜਗਮੀਤ ਸਿੰਘ ਵੱਲੋਂ ਇਹ ਦੌਰਾ ਇਸ ਲਈ ਵੀ ਕੀਤਾ ਜਾ ਰਿਹਾ ਹੈ ਤਾਂ ਕਿ ਚੋਣਾਂ ਵਿੱਚ ਮੁਕਾਬਲੇਬਾਜ਼ੀ ਨੂੰ ਲੈ ਕੇ ਸ਼ਸੋ਼ਪੰਜ ਵਿੱਚ ਪਏ ਐਮਪੀਜ਼ ਤੇ ਪਾਰਟੀ ਮੈਂਬਰਾਂ ਦੀ ਹੌਸਲਾ ਅਫਜ਼ਾਈ ਕੀਤੀ ਜਾ ਸਕੇ। ਐਮਪੀਜ਼ ਤੇ ਪਾਰਟੀ ਮੈਂਬਰ ਪਾਰਟੀ ਨੂੰ ਦਰਪੇਸ਼ ਚੁਣੌਤੀਆਂ, ਜਿਵੇਂ ਕਿ ਫੰਡਰੇਜਿ਼ੰਗ ਤੇ ਡਿੱਗੇ ਹੋਏ ਹੌਸਲੇ, ਨੂੰ ਇਸ ਟੂਰ ਰਾਹੀਂ ਜਗਮੀਤ ਸਿੰਘ ਘਟਾਉਣਾ ਚਾਹੁੰਦੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜਨਤਾ ਦੀ ਰਾਇ ਸਿਰਫ 21 ਅਕਤੂਬਰ ਨੂੰ ਹੀ ਸਾਹਮਣੇ ਆਵੇਗੀ, ਉਸ ਤੋਂ ਇਲਾਵਾ ਕੋਈ ਪਬਲਿਕ ਪੋਲ ਮਾਇਨੇ ਨਹੀਂ ਰੱਖਦੇ। ਉਨ੍ਹਾਂ ਭਰੋਸਾ ਪ੍ਰਗਟਾਇਆ ਕਿ ਰਸਮੀ ਕੈਂਪੇਨ ਦੌਰਾਨ ਲੋਕ ਉਨ੍ਹਾਂ ਦੀਆਂ ਗੱਲਾਂ ਵੱਲ ਵਧੇਰੇ ਧਿਆਨ ਦੇਣਗੇ।