ਨਵੀਂ ਦਿੱਲੀ, 16 ਜੁਲਾਈ (ਪੋਸਟ ਬਿਊਰੋ)- ਸੁਪਰੀਮ ਕੋਰਟ ਨੇ ਕੱਲ੍ਹ ਕੁਝ ਵਕੀਲਾਂ ਦੇ ਬੇਅਦਬ ਵਿਹਾਰ ਅਤੇ ਬਹੁਤ ਜ਼ਰੂਰੀ ਮਾਮਲਿਆਂ ਨੂੰ ਸੂਚੀਬੱਧ ਕੀਤੇ ਜਾਣ ਵਿੱਚ ਰਜਿਸਟਰੀ ਦੇ ਅਧਿਕਾਰੀਆਂ ਦੇ ਕੰਮਕਾਜ ਦੇ ਢਿੱਲੜ ਤਰੀਕੇ ਨੂੰ ਲੈ ਕੇ ਨਾਖੁਸ਼ੀ ਜ਼ਾਹਰ ਕੀਤੀ ਹੈ। ਚੀਫ ਜਸਟਿਸ ਰੰਜਨ ਗੋਗੋਈ ਨੇ ਉਸ ਕੇਸ ਨੂੰ ਸੂਚੀ ਤੋਂ ਹਟਾਉਣ ਲਈ ਰਜਿਸਟਰੀ ਦੇ ਇਕ ਅਧਿਕਾਰੀ ਦੀ ਨਿੰਦਾ ਕੀਤੀ, ਜਿਸ ਕੇਸ ਨੂੰ ਉਨ੍ਹਾਂ ਦੀ ਅਗਵਾਈ ਵਾਲੀ ਬੈਂਚ ਨੇ ਬਹੁਤ ਲਾਜ਼ਮੀ ਦੇ ਆਧਾਰ 'ਤੇ ਸੁਣਵਾਈ ਲਈ ਸੂਚੀਬੱਧ ਕਰਨ ਲਈ ਕਿਹਾ ਹੋਇਆ ਸੀ। ਇਸ ਬੈਂਚ ਵਿੱਚ ਜਸਟਿਸ ਦੀਪਕ ਗੁਪਤਾ ਵੀ ਸਨ।
ਨਾਰਾਜ਼ ਹੋਈ ਅਦਾਲਤ ਨੇ ਕਿਹਾ ਕਿ ਇਹ ਕੀ ਹੋ ਰਿਹਾ ਹੈ? ਉਨ੍ਹਾਂ ਨੇ (ਮਹਿਲਾ ਵਕੀਲ ਨੇ) ਪਿਛਲੇ ਹਫਤੇ ਕੁਝ ਵਰਨਣ ਕੀਤਾ ਸੀ ਤੇ ਅਸੀਂ ਆਦੇਸ਼ ਦਿੱਤਾ ਸੀ ਕਿ ਕੇਸ ਨੂੰ ਸੂਚੀ ਤੋਂ ਹਟਾਇਆ ਨਾ ਜਾਵੇ, ਜਦ ਹੁਕਮ ਪਾਸ ਕੀਤੇ ਜਾਂਦੇ ਹਨ ਤਾਂ ਤੁਹਾਨੂੰ ਕੀ ਸਮਝ ਨਹੀਂ ਆਉਂਦਾ? ਸਟਾਫ ਕੀ ਕਰ ਰਿਹਾ ਹੁੰਦਾ ਹੈ? ਦਿਨ ਦਾ ਕੰਮ ਖਤਮ ਹੋਣ ਤੋਂ ਪਹਿਲਾਂ ਚੀਫ ਜਸਟਿਸ ਉਸ ਵੇਲੇ ਫਿਰ ਨਾਰਾਜ਼ ਦਿਸੇ, ਜਦ ਅਦਾਲਤ ਦੀ ਨਵੀਂ ਇਮਾਰਤ ਵਿੱਚ ਵਕੀਲਾਂ ਨੂੰ ਚੈਂਬਰ ਅਲਾਟ ਕਰਨ ਦੀ ਅਰਜ਼ੀ ਬਾਰੇ ਵਕੀਲਾਂ ਨੇ ਇਕੱਠੇ ਬੋਲਣਾ ਸ਼ੁਰੂ ਕਰ ਦਿੱਤਾ। ਗੋਗੋਈ ਨੇ ਉਨ੍ਹਾਂ ਦੇ ਵਿਹਾਰ ਨੂੰ ਬੇਅਦਬ ਦੱਸਿਆ ਅਤੇ ਇਸ ਪਟੀਸ਼ਨ ਦੀ ਸੁਣਵਾਈ ਤੋਂ ਖੁਦ ਨੂੰ ਵੱਖ ਕਰ ਲਿਆ।