ਜਲੰਧਰ, 16 ਜੁਲਾਈ (ਪੋਸਟ ਬਿਊਰੋ)- ਕਾਰ ਲਾਕ ਹੋਣ 'ਤੇ ਇੰਜਣ ਸਟਾਰਟ ਨਾ ਹੋਣ ਦਾ ਦਾਅਵਾ ਕਰਕੇ ਵੇਚੀ ਗਈ ਕਾਰ ਨੂੰ ਚੋਰ ਨਕਲੀ ਚਾਬੀ ਨਾਲ ਸਿਰਫ 16 ਮਿੰਟ 'ਚ ਚੋਰੀ ਕਰਕੇ ਲੈ ਗਿਆ। ਇਸ ਦੀ ਸ਼ਿਕਾਇਤ ਮਿਲਣ ਤੋਂ ਬਾਅਦ ਜ਼ਿਲਾ ਕੰਜ਼ਿਊਮਰ ਫੋਰਮ ਨੇ ਹੁੰਡਈ ਕੰਪਨੀ ਨੂੰ ਕਾਰ ਦੀ ਕੀਮਤ ਅਤੇ 9 ਫੀਸਦੀ ਵਿਆਜ ਸਮੇਤ 8.54 ਲੱਖ ਰੁਪਏ, ਡਿਫੈਕਟਿਵ ਲਾਕ ਸਿਸਟਮ ਬਦਲੇ ਇਕ ਲੱਖ ਤੇ ਲਿਟਿਗੇਸ਼ਨ ਖਰਚ ਦੇ ਤੌਰ 'ਤੇ 15 ਹਜ਼ਾਰ ਰੁਪਏ ਦੇਣ ਦੇ ਹੁਕਮ ਦਿੱਤੇ ਹਨ ਅਤੇ ਪੈਸਾ ਦੇਣ ਇਕ ਮਹੀਨੇ ਦਾ ਸਮਾਂ ਦਿੱਤਾ ਹੈ। ਫੋਰਮ ਨੇ ਕਾਰ ਦੇ ਲਾਕ ਸਿਸਟਮ 'ਚ ਮੈਨੂੰਫੈਕਚਰਿੰਗ ਡਿਫੈਕਟ ਹੋਣ ਦੇ ਬਾਵਜੂਦ ਗਲਤ ਭਰੋਸਾ ਦੇਣ 'ਤੇ ਕਾਲ ਡੀਲਰ ਦਾ ਇਸ ਨੂੰ ਅਨਫੇਅਰ ਟਰੇਡ ਪ੍ਰੈਕਟਿਸ ਕਰਾਰ ਦਿੱਤਾ।
ਹਰਦੀਪ ਸਿੰਘ ਵਾਸੀ ਕਰੋਲ ਬਾਗ ਨੇੜੇ ਰੇਲ ਵਿਹਾਰ ਮੰਦਰ ਜੀ ਐਨ ਡੀ ਯੂ ਰੋਡ ਨੇ ਕੰਜ਼ਿਊਮਰ ਫੋਰਮ ਵਿੱਚ ਸ਼ਿਕਾਇਤ ਦਿੱਤੀ ਸੀ ਕਿ 26 ਫਰਵਰੀ 2016 ਨੂੰ ਉਸ ਨੇ 11.54 ਲੱਖ 'ਚ ਗੋਇਲ ਆਟੋਮੋਟਿਵ ਲਿਮਟਿਡ ਤੋਂ ਹੁੰਡਈ ਵਰਮਾ ਫਲਯੂੂਡਿਕ ਕਾਰ ਖਰੀਦੀ ਸੀ। ਕਾਰ ਖਰੀਦਦੇ ਸਮੇਂ ਡੀਲਰ ਨੇ ਭਰੋਸਾ ਦਿੱਤਾ ਸੀ ਕਿ ਕਾਰ 'ਚ ਐਂਟੀ ਥੈਫਟ ਲਾਕ ਸਿਸਟਮ ਲੱਗਾ ਹੈ। ਇਸ 'ਚ ਗੱਡੀ ਲਾਕ ਹੋਣ 'ਤੇ ਇਸ ਦਾ ਇੰਜਣ ਆਪਣੇ ਆਪ ਲਾਕ ਹੋ ਜਾਂਦਾ ਹੈ ਅਤੇ ਚੋਰੀ ਹੋਣ ਦੀ ਕੋਈ ਗੁੰਜਾਇਸ਼ ਨਹੀਂ ਹੈ। ਦੋ ਅਗਸਤ 2018 ਨੂੰ ਉਹ ਦਿੱਲੀ ਗਏ ਤਾਂ ਉਥੇ ਪੱਛਮ ਵਿਹਾਰ ਨੇੜੇ ਜਾਵਾ ਨਰਸਿੰਗ ਹੋਮ ਤੋਂ ਕਾਰ ਚੋਰੀ ਹੋ ਗਈ। ਇਸ ਦਾ ਕੇਸ ਰਜਿਸਟਰ ਕਰਾਉਣ ਪਿੱਛੋਂ ਉਨ੍ਹਾਂ ਸੀ ਸੀ ਟੀ ਵੀ ਫੁਟੇਜ ਵੇਖੀ ਤਾਂ ਚੋਰ ਨੇ ਸਿਰਫ 16 ਮਿੰਟ 'ਚ ਕਾਰ ਦਾ ਲਾਕ ਖੋਲ੍ਹਿਆ ਅਤੇ ਉਸ ਨੂੰ ਚੋਰੀ ਕਰ ਲਿਆ ਸੀ। ਉਸ ਨੇ ਡੀਲਰ ਤੇ ਕੰਪਨੀ ਖਿਲਾਫ ਕੰਜ਼ਿਊਮਰ ਪ੍ਰੋਟੈਕਸ਼ਨ ਐਕਟ ਹੇਠ ਸ਼ਿਕਾਇਤ ਦੇ ਦਿੱਤੀ ਕਿ ਡੀਲਰ ਨੇ ਉਸ ਨੂੰ ਗੁਮਰਾਹ ਕੀਤਾ ਕਿ ਕਾਰ 'ਚ ਅਜਿਹਾ ਲਾਕ ਲੱਗਾ ਹੈ, ਜਿਸ ਨਾਲ ਕਾਰ ਚੋਰੀ ਨਹੀਂ ਹੋ ਸਕਦੀ। ਇਸ ਬਾਰੇ ਡੀਲਰ ਤੇ ਕੰਪਨੀ ਨੇ ਫੋਰਮ ਨੂੰ ਸਾਂਝਾ ਬਿਆਨ ਦਿੱਤਾ ਕਿ ਕਾਰ ਦੀ ਵਾਰੰਟੀ ਦੋ ਸਾਲ ਸੀ, ਜਦ ਕਿ ਸ਼ਿਕਾਇਤ ਇਸ ਤੋਂ ਬਾਅਦ ਦਿੱਤੀ ਗਈ ਹੈ। ਇਸ ਤੋਂ ਇਲਾਵਾ ਕਾਰ ਦੇ ਲਾਕ ਸਿਸਟਮ 'ਚ ਕੋਈ ਮੈਨੂੰਫੈਕਚਰਿੰਗ ਡਿਫੈਕਟ ਵੀ ਨਹੀਂ ਸੀ, ਕਿਉਂਕਿ 15 ਜੁਲਾਈ 2018 ਨੂੰ ਕਾਰ ਉਨ੍ਹਾਂ ਕੋਲ ਆਈ ਸੀ, ਪਰ ਉਸ ਸਮੇਂ ਸ਼ਿਕਾਇਤ ਕਰਤਾ ਨੇ ਲਾਕ ਸਿਸਟਮ ਦੀ ਕੋਈ ਸ਼ਿਕਾਇਤ ਨਹੀਂ ਕੀਤੀ ਸੀ। 20 ਲੱਖ ਦਾ ਕਲੇਮ ਕੰਜ਼ਿਊਮਰ ਦੀ ਆਰਥਿਕ ਜਿਊਰੀਡਿਕਸ਼ਨ ਤੋਂ ਵੀ ਬਾਹਰ ਹੈ। ਇਹ ਸਟੇਟ ਕਮਿਸ਼ਨ ਪੰਜਾਬ ਕੋਲ ਜਾਣੀ ਚਾਹੀਦੀ ਹੈ। ਹੁੰਡਈ ਕੰਪਨੀ ਦੇ ਦਫਤਰ ਦੀ ਖੇਤਰੀ ਜਿਊਰੀਡਿਕਸ਼ਨ ਵੀ ਫੋਰਮ ਦੇ ਦਾਇਰੇ 'ਚ ਨਹੀਂ ਆਉਂਦੀ।
ਦੋਵੇਂ ਧਿਰਾਂ ਨੂੰ ਸੁਣਨ ਪਿੱਛੋਂ ਕੰਜ਼ਿਊਮਰ ਫੋਰਮ ਨੇ ਪਾਇਆ ਕਿ ਕਾਰ ਦੀ ਵਾਰੰਟੀ ਦੋ ਸਾਲ ਨਹੀਂ, ਤਿੰਨ ਸਾਲ ਦੀ ਸੀ। ਆਨਰਸ ਮੈਨੂੰਅਲ ਤੇ ਸਰਵਿਸ ਬੁੱਕ 'ਚ ਵਾਰੰਟ ਪੀਰੀਅਡ 36 ਮਹੀਨੇ ਲਿਖਿਆ ਸੀ। ਕਾਰ 26 ਫਰਵਰੀ 2016 ਨੂੰ ਖਰੀਦੀ ਗਈ ਸੀ, ਇਸ ਲਈ ਉਸ ਦੀ ਵਾਰੰਟੀ 26 ਫਰਵਰੀ 2019 ਤੱਕ ਬਣਦੀ ਸੀ, ਕਾਰ ਇਸ ਤੋਂ ਪਹਿਲਾਂ ਦੋ ਅਗਸਤ 2018 ਨੂੰ ਚੋਰੀ ਹੋ ਗਈ ਸੀ। ਕਾਰ ਦੇ ਲਾਕ ਨਾ ਹੋਣ ਦੇ ਦਾਅਵੇ ਨੂੰ ਵੀ ਫੋਰਮ ਨੇ ਆਨਰਸ ਮੈਨੂੰਅਲ 'ਚ ਦਿੱਤੇ ਟਰਮਸ ਐਂਡ ਕੰਡੀਸ਼ਨ 'ਚ ਸਹੀ ਪਾਇਆ, ਜਿਸ 'ਚ ਦੱਸਿਆ ਗਿਆ ਕਿ ਕਾਰ ਇਲੈਕਟ੍ਰਾਨਿਕ ਇੰਜਣ ਇੰਮੋਬਲਾਈਜ਼ਰ ਸਿਸਟਮ ਨਾਲ ਲੈਸ ਹੈ, ਜਿਸ 'ਚ ਇਸ ਦੇ ਨਾਜਾਇਜ਼ ਵਰਤੋਂ ਦਾ ਖਤਰਾ ਘੱਟ ਰਹਿੰਦਾ ਹੈ। ਚਾਬੀ ਸਹੀ ਹੋਣ 'ਤੇ ਇੰਜਣ ਸਟਾਰਟ ਹੋਵੇਗਾ, ਕਿਉਂਕਿ ਕਾਰ ਦੀਆਂ ਦੋਵੇਂ ਚਾਬੀਆਂ ਸ਼ਿਕਾਇਤ ਕਰਤਾ ਕੋਲ ਸਨ। ਇਸ ਲਈ ਸਾਫ ਹੈ ਕਿ ਚੋਰ ਨੇ ਕਾਰ ਦੇ ਲਾਕ 'ਚ ਮੈਨੂੰਫੈਕਟਰਿੰਗ ਡਿਫੈਕਟ ਦੇ ਕਾਰਨ ਡੁਪਲੀਕੇਟ ਚਾਬੀ ਨਾਲ ਗੱਡੀ ਚੋਰੀ ਕੀਤੀ ਹੈ। ਫੋਰਮ ਨੇ ਪਾਇਆ ਕਿ ਡੀਲਰ ਤੇ ਕੰਪਨੀ ਨੇ ਗਲਤ ਭਰੋਸਾ ਦੇ ਕੇ ਕਾਰ ਵੇਚੀ। ਫੋਰਮ ਨੇ ਡੀਲਰ ਦੇ ਗਲਤ ਭਰੋਸੇ ਨੂੰ ਅਨਫੇਅਰ ਫਰੇਡ ਪ੍ਰੈਕਟਿਸ ਕਰਾਰ ਦਿੱਤਾ। ਕਾਰ ਮਾਲਕ ਨੇ 18 ਫੀਸਦੀ ਵਿਆਜ ਸਣੇ ਕਾਰ ਦੀ ਕੀਮਤ ਦੇ 11.54 ਲੱਖ ਰੁਪਏ ਅਤੇ ਪਰੇਸ਼ਾਨੀ ਬਦਲੇ 6 ਲੱਖ ਰੁਪਏ ਮੰਗੇ ਸੀ। ਫੈਸਲਾ ਦਿੰਦੇ ਸਮੇਂ ਫੋਰਮ ਨੇ ਦੋ ਸਾਲ ਕਾਰ ਇਸਤੇਮਾਲ ਹੋਣ ਦੀ ਵਜ੍ਹਾ ਨਾਲ ਪ੍ਰਤੀ ਸਾਲ ਡੇਢ ਲੱਖ ਯਾਨੀ ਤਿੰਨ ਲੱਖ ਦੀ ਕਟੌਤੀ ਕਰ ਦਿੱਤੀ।