ਤਹਿਰਾਨ, 16 ਜੁਲਾਈ (ਪੋਸਟ ਬਿਊਰੋ)- ਈਰਾਨ ਵੱਲੋਂ ਐਟਮੀ ਪ੍ਰੋਗਰਾਮ ਸ਼ੁਰੂ ਕਰਨ ਦੀ ਧਮਕੀ ਦੇਣ ਪਿੱਛੋਂ ਯੂਰਪੀ ਯੂਨੀਅਨ ਐਟਮੀ ਸਮਝੌਤੇ ਨੂੰ ਬਚਾਉਣ ਦੀਆਂ ਕੋਸ਼ਿਸਾਂ ਵਿੱਚ ਤੇਜ਼ੀ ਨਾਲ ਲੱਗ ਗਿਆ ਹੈ।
ਬ੍ਰਿਟੇਨ ਨੇ ਸਾਵਧਾਨ ਕੀਤਾ ਹੈ ਸਮਝੌਤੇ ਨੂੰ ਬਚਾਉਣ ਦੇ ਮੌਕੇ ਘੱਟ ਹੁੰਦੇ ਜਾਂਦੇ ਹਨ। ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਂ ਨੇ ਕੱਲ੍ਹ ਕਿਹਾ ਕਿ ਮੱਦ ਪੂਰਬ ਵਿੱਚ ਤਣਾਅ ਘੱਟ ਕਰਨ ਲਈ ਉਹ ਈਰਾਨੀ ਰਾਸ਼ਟਰਪਤੀ ਹਸਨ ਰੂਹਾਨੀ, ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਅਤੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨਾਲ ਇਸ ਹਫਤੇ ਗੱਲ ਕਰਨਗੇ। ਇਸ ਦੌਰਾਨ ਯੂਰਪੀ ਯੂਨੀਅਨ 'ਤੇ ਦਬਾਅ ਵਧਾਉਂਦੇ ਹੋਏ ਈਰਾਨ ਨੇ ਕੱਲ੍ਹ ਕਿਹਾ ਕਿ ਅਮਰੀਕੀ ਪਾਬੰਦੀਆਂ ਤੋਂ ਉਸ ਨੂੰ ਰਹਿਤ ਦਿਵਾਉਣ ਲਈ ਉਹ ਠੋਸ ਉਪਾਅ ਕਰੇ। ਅਜਿਹਾ ਨਾ ਹੋਇਆ ਤਾਂ ਉਹ 2015 ਦੇ ਸਮਝੌਤੇ ਤੋਂ ਪਹਿਲਾਂ ਦੇ ਆਪਣੇ ਐਟਮੀ ਪ੍ਰੋਗਰਾਮ ਨੂੰ ਫਿਰ ਸ਼ੁਰੂ ਕਰ ਦੇਵੇਗਾ। ਈਰਾਨ ਦੀ ਇਸ ਧਮਕੀ ਦੇ ਬਾਅਦ ਬਰੱਸਲਸ ਵਿੱਚ ਯੂਰਪੀ ਯੂਨੀਅਨ ਦੇ ਵਿਦੇਸ਼ ਮੰਤਰੀਆਂ ਦੀ ਬੈਠਕ ਹੋਈ। ਬ੍ਰਿਟੇਨ ਦੇ ਵਿਦੇਸ਼ ਮੰਤਰੀ ਜੇਰੇਮੀ ਹੰਟ ਨੇ ਕਿਹਾ ਕਿ ਸਮਝੌਤਾ ਅਜੇ ਖਤਮ ਨਹੀਂ ਹੋਇਆ। ਉਨ੍ਹਾਂ ਕਿਹਾ ਕਿ ਈਰਾਨ ਨੂੰ ਐਟਮੀ ਹਥਿਆਰ ਬਣਾਉਣ ਵਿੱਚ ਅਜੇ ਵਕਤ ਲੱਗੇਗਾ। ਸਮਝੌਤੇ ਨੂੰ ਬਣਾਈ ਰੱਖਣ ਦੇ ਲਈ ਅਜੇ ਵੀ ਕੁਝ ਉਮੀਦ ਬਚੀ ਹੈ।
ਆਈ ਏ ਐੱਨ ਐੱਸ ਦੇ ਮੁਤਾਬਕ ਇਸ ਤੋਂ ਪਹਿਲਾਂ ਰੂਹਾਨੀ ਨੇ ਕਿਹਾ ਸੀ ਕਿ ਜੇ ਪਾਬੰਦੀ ਹਟਾਈ ਜਾਵੇ ਤਾਂ ਉਨ੍ਹਾਂ ਦਾ ਦੇਸ਼ ਅਮਰੀਕਾ ਨਾਲ ਗੱਲਬਾਤ ਕਰਨ ਦੇ ਲਈ ਤਿਆਰ ਹੈ। ਈਰਾਨ ਦੀ ਮੇਹਰ ਨਿਊਜ਼ ਏਜੰਸੀ ਨੇ ਰੂਹਾਨੀ ਦੇ ਹਵਾਲੇ ਨਾਲ ਕਿਹਾ, ਅਸੀਂ ਹਮੇਸ਼ਾ ਗੱਲਬਾਤ ਲਈ ਤਿਆਰ ਹਾਂ। ਮੈਂ ਤੁਹਾਨੂੰ ਕਹਿੰਦਾ ਹਾਂ ਕਿ ਧੌਂਸ ਦਿਖਾਉਣਾ ਬੰਦ ਕਰ ਦਿਓ ਤੇ ਪਾਬੰਦੀਆਂ ਨੂੰ ਹਟਾ ਕੇ ਫਿਰ ਦਲੀਲ ਵਾਲੇ ਅਤੇ ਗੰਭੀਰ ਬਣ ਜਾਓ। ਅਸੀਂ ਤਿਆਰ ਹਾਂ। ਈਰਾਨੀ ਵਿਦੇਸ਼ ਮੰਤਰੀ ਨੂੰ ਅਮਰੀਕਾ ਨੇ ਬਿਨਾਂ ਸ਼ਰਤ ਵੀਜ਼ਾ ਦਿੱਤਾ-ਅਮਰੀਕਾ ਨੇ ਈਰਾਨ ਦੇ ਵਿਦੇਸ਼ ਮੰਤਰੀ ਮੁਹੰਮਦ ਜਵਾਦ ਜਰੀਫ ਨੂੰ ਆਪਣੇ ਇਥੇ ਆਉਣ ਦੇ ਲਈ ਬਿਨਾਂ ਸ਼ਰਤ ਵੀਜ਼ਾ ਜਾਰੀ ਕਰ ਦਿੱਤਾ ਹੈ। ਜਰੀਫ ਕੱਲ੍ਹ ਅਮਰੀਕਾ ਰਵਾਨਾ ਹੋ ਰਹੇ ਹਨ।