ਟੋਰਾਂਟੋ, 16 ਜੁਲਾਈ (ਪੋਸਟ ਬਿਊਰੋ) : ਟੋਰਾਂਟੋ ਦੇ ਸਕੂਲਾਂ ਦੇ ਅੰਦਰ ਮੌਜੂਦ ਡੇਅਕੇਅਰਜ਼ ਵੱਲੋਂ ਮਾਪਿਆਂ ਨੂੰ ਚੇਤਾਵਨੀ ਦਿੱਤੀ ਜਾ ਰਹੀ ਹੈ ਕਿ ਇਸ ਸਾਲ ਦੇ ਅੰਤ ਵਿੱਚ ਐਕਸਪਾਇਰ ਹੋਣ ਜਾ ਰਹੀ ਸਿਟੀ ਸਬਸਿਡੀ ਨੂੰ ਜੇ ਸੈਂਟਰ ਗੁਆ ਬੈਠਦਾ ਹੈ ਤਾਂ ਪਹਿਲਾਂ ਤੋਂ ਹੀ ਆਸਮਾਨ ਛੋਹ ਰਹੀਆਂ ਚਾਈਲਡ ਕੇਅਰ ਫੀਸਾਂ ਹੋਰ ਸ਼ੂਟ ਵੱਟ ਸਕਦੀਆਂ ਹਨ।
ਸਿਟੀ ਆਫ ਟੋਰਾਂਟੋ ਵੱਲੋਂ ਲੱਗਭਗ 350 ਲਾਇਸੰਸਸੁ਼ਦਾ ਚਾਈਲਡ ਕੇਅਰ ਪ੍ਰੋਗਰਾਮਜ਼, ਜੋ ਕਿ ਸਕੂਲ ਦੀਆਂ ਪ੍ਰਾਪਰਟੀਜ਼ ਉੱਤੇ ਹਨ, ਨੂੰ ਮਿਲਣ ਵਾਲੀ ਓਕਿਊਪੈਂਸੀ ਗ੍ਰਾਂਟ ਦਿੱਤੀ ਜਾਂਦੀ ਹੈ। ਇਸ ਹਫਤੇ ਸਿਟੀ ਕਾਉਂਸਲ ਇਸ ਸਬੰਧ ਵਿੱਚ ਵੋਟ ਪਾਵੇਗੀ ਕਿ 2020 ਵਿੱਚ ਇਸ ਸਬਸਿਡੀ ਨੂੰ ਜਾਰੀ ਰੱਖਿਆ ਜਾਵੇਗਾ ਜਾਂ ਨਹੀਂ। ਇੱਥੇ ਇਹ ਵੀ ਦੱਸਣਾ ਬਣਦਾ ਹੈ ਕਿ ਸਿਟੀ ਨੂੰ ਰਸਮੀ ਤੌਰ ਉੱਤੇ ਅਗਸਤ ਦੇ ਅੰਤ ਤੱਕ ਇਸ ਸਕੀਮ ਵਿੱਚ ਸ਼ਾਮਲ ਸਕੂਲ ਬੋਰਡਜ਼ ਨੂੰ ਇਹ ਦੱਸਣਾ ਹੋਵੇਗਾ ਕਿ ਇਸ ਵਿੱਚ ਕੋਈ ਤਬਦੀਲੀ ਕੀਤੀ ਜਾ ਰਹੀ ਹੈ ਜਾਂ ਨਹੀਂ।
ਟੋਰਾਂਟੋ ਡਿਸਟ੍ਰਿਕਟ ਸਕੂਲ ਬੋਰਡ (ਟੀਡੀਐਸਬੀ) ਚੇਅਰ ਰੌਬਿਨ ਪਿਲਕੇ ਨੇ ਚਾਈਲਡ ਕੇਅਰ ਆਪਰੇਟਰਜ਼ ਨੂੰ ਇੱਕ ਚਿੱਠੀ ਲਿਖ ਕੇ ਇਹ ਦੱਸਿਆ ਹੈ ਕਿ ਜੇ ਇਨ੍ਹਾਂ ਫੰਡਾਂ ਵਿੱਚ ਕਟੌਤੀ ਹੁੰਦੀ ਹੈ ਤਾਂ ਸਕੂਲ ਬੋਰਡਜ਼ ਨੂੰ ਲੀਜ਼ ਕੌਸਟ ਸਿੱਧਿਆਂ ਡੇਅਰਕੇਅਰਜ਼ ਤੋਂ ਮਿਲ ਜਾਵੇਗੀ। ਉਨ੍ਹਾਂ ਆਖਿਆ ਕਿ ਇਸ ਗ੍ਰਾਂਟ ਦੇ ਬੰਦ ਹੋਣ ਨਾਲ ਸੱਭ ਤੋਂ ਵੱਧ ਬੋਝ ਤੁਹਾਡੇ ਸੈਂਟਰਜ਼ ਤੇ ਪਰਿਵਾਰਾਂ ਉੱਤੇ ਪਵੇਗਾ।