ਟੋਰਾਂਟੋ, 16 ਜੁਲਾਈ (ਪੋਸਟ ਬਿਊਰੋ) : ਓਨਟਾਰੀਓ ਦੀ ਸਿਹਤ ਮੰਤਰੀ ਕ੍ਰਿਸਟੀਨ ਐਲੀਅਟ ਨੇ ਸੋਮਵਾਰ ਨੂੰ ਆਖਿਆ ਕਿ ਇਸ ਸਾਲ ਦਾ ਫਲੂ ਸੀਜ਼ਨ ਕਾਫੀ ਖਰਾਬ ਜਾਣ ਵਾਲਾ ਹੈ। ਉਨ੍ਹਾਂ ਆਖਿਆ ਕਿ ਪ੍ਰੋਵਿੰਸ ਇਸੇ ਲਈ ਪਹਿਲਾਂ ਤੋਂ ਹੀ ਤਿਆਰੀ ਕਰ ਰਹੀ ਹੈ ਤੇ ਵਾਧੂ ਸਟਰੈਂਥ ਵਾਲੀਆਂ ਦਵਾਈਆਂ ਵੀ ਮੰਗਾਈਆਂ ਜਾ ਰਹੀਆਂ ਹਨ।
ਐਲੀਅਟ ਨੇ ਆਖਿਆ ਕਿ ਜੋ ਕੁੱਝ ਆਸਟਰੇਲੀਆ ਵਿੱਚ ਹੋ ਰਿਹਾ ਹੈ ਉਸ ਦਾ ਖਿਆਲ ਵੀ ਸਾਨੂੰ ਰੱਖਣਾ ਚਾਹੀਦਾ ਹੈ ਤੇ ਜੋ ਕੁੱਝ ਓਨਟਾਰੀਓ ਵਿੱਚ ਹੋਣ ਜਾ ਰਿਹਾ ਹੈ ਉਸ ਬਾਰੇ ਅਗਾਊਂ ਇੰਤਜ਼ਾਮ ਕਰਨੇ ਚਾਹੀਦੇ ਹਨ। ਆਸਟਰੇਲੀਆਈ ਸਿਹਤ ਅਧਿਕਾਰੀਆਂ ਵੱਲੋਂ ਫਲੂ ਸੈਸ਼ਨ ਜਲਦ ਸ਼ੁਰੂ ਹੋਣ ਦੀ ਰਿਪੋਰਟ ਕੀਤੀ ਗਈ ਹੈ। ਆਸਟਰੇਲੀਆ ਦੇ ਸਿਹਤ ਮੰਤਰਾਲੇ ਅਨੁਸਾਰ ਇਸ ਵਾਰੀ ਇਸ ਅਰਸੇ ਦੌਰਾਨ ਹਸਪਤਾਲ ਵਿੱਚ ਦਾਖਲ ਹੋਣ ਵਾਲਿਆਂ ਦੀ ਗਿਣਤੀ ਪਹਿਲਾਂ ਦੇ ਮੁਕਾਬਲੇ ਤਿੰਨ ਗੁਣਾ ਜਿ਼ਆਦਾ ਹੈ। ਹੁਣ ਤੱਕ ਉੱਥੇ 200 ਤੋਂ ਵੀ ਵੱਧ ਮੌਤਾਂ ਹੋ ਚੁੱਕੀਆਂ ਹਨ।
ਐਲੀਅਟ ਦੇ ਬੁਲਾਰੇ ਨੇ ਆਖਿਆ ਕਿ ਪਿਛਲੇ ਸਾਲ ਦੇ ਮੁਕਾਬਲੇ ਓਨਟਾਰੀਓ ਵੱਲੋਂ ਪਹਿਲਾਂ ਹੀ 300,000 ਤੋਂ ਵੱਧ ਫਲੂ ਵੈਕਸੀਨਜ਼ ਦੀਆਂ ਹਾਈ ਡੋਜ਼ ਦਾ ਆਰਡਰ ਦਿੱਤਾ ਜਾ ਚੁੱਕਿਆ ਹੈ। ਇਸ ਨਾਲ ਕੁੱਲ ਆਰਡਰ 1.2 ਮਿਲੀਅਨ ਡੋਜਿ਼ਜ਼ ਦਾ ਹੋ ਗਿਆ ਹੈ। ਇਸ ਵੈਕਸੀਨ ਵਿੱਚ ਨਿਯਮਿਤ ਫਲੂ ਸੌਟ ਨਾਲੋਂ ਚਾਰ ਗੁਣਾਂ ਵੱਧ ਮਾਤਰਾ ਐਂਟੀਜਨਜ਼ ਦੀ ਹੈ। ਇਹ ਵੈਕਸੀਨ ਕਮਜ਼ੋਰ ਲੋਕਾਂ ਜਿਵੇਂ ਕਿ ਬਜ਼ੁਰਗਾਂ ਨੂੰ ਦਿੱਤੀ ਜਾ ਰਹੀ ਹੈ। ਇਸ ਵੈਕਸੀਨ ਨੂੰ ਹਸਪਤਾਲਾਂ, ਲਾਂਗ ਟਰਮ ਕੇਅਰ ਹੋਮਜ਼ ਵਿੱਚ ਪ੍ਰਾਇਮਰੀ ਕੇਅਰ ਪ੍ਰੋਵਾਈਡਰਜ਼ ਵੱਲੋਂ ਦਿੱਤਾ ਜਾ ਸਕਦਾ ਹੈ।
ਐਲੀਅਟ ਨੇ ਆਖਿਆ ਕਿ ਪਿਛਲੇ ਸਾਲ ਇਸ ਦੀ ਮਹੱਤਤਾ ਸਿੱਧ ਹੋ ਚੁੱਕੀ ਹੈ। ਉਨ੍ਹਾਂ ਆਖਿਆ ਕਿ ਸਰਕਾਰ ਇਸ ਸਬੰਧੀ ਐਡਵਰਟਾਈਜਿ਼ੰਗ ਕੈਂਪੇਨ ਵੀ ਚਲਾਵੇਗੀ ਤੇ ਲੋਕਾਂ ਨੂੰ ਫਲੂ ਸ਼ੌਟਸ ਲਵਾਉਣ ਲਈ ਪ੍ਰੇਰਿਤ ਕਰੇਗੀ। ਉਨ੍ਹਾਂ ਆਖਿਆ ਕਿ ਸੱਭ ਤੋਂ ਪਹਿਲਾਂ ਤਾਂ ਇਸ ਫਲੂ ਦੀ ਰੋਕਥਾਮ ਹੀ ਜ਼ਰੂਰੀ ਹੈ ਪਰ ਸਾਨੂੰ ਉਸ ਸਮੇਂ ਲਈ ਵੀ ਤਿਆਰ ਰਹਿਣਾ ਚਾਹੀਦਾ ਹੈ ਜਦੋਂ ਫਲੂ ਦਾ ਪ੍ਰਕੋਪ ਫੈਲੇਗਾ। ਸਾਨੂੰ ਹੌਸਪਿਟਲ ਕੇਅਰ, ਹੋਮ ਕੇਅਰ ਤੇ ਕਮਿਊਨਿਟੀ ਕੇਅਰ ਲਈ ਵੀ ਤਿਆਰੀ ਕਰਨੀ ਹੋਵੇਗੀ।